Vise Ministru Justisa, José Edmundo Caetano. Imajen/Mídia CAC.

DILI, 14 jullu 2020 (TATOLI)–Vise Ministru Justisa, José Edmundo Caetano, hateten Ggovernu sei esforsu makaas atu koopera ho entidade relevante sira atu kombate korrupsaun liuhosi implementasaun lei númeru 1/V/I-Medida Prevensaun no Kombate Korrupsaun ne’ebé Komisaun A Parlamentu Nasionál konklui no aprova ona iha diskusaun espesialidade hodi hein aprezenta iha finál globál.

Notísia Relevante: Komisaun A Konklui Ona LAC, Aban Hatama Relatóriu Finál ba PN

“Ami hosi parte administrasaun justisa ninian, sei prepara, kolabora ho instituisaun relevante sira hotu, oinsa atu halo kapasitasaun, fó formasaun ba majistradu sira, atu nune’e bele koopera malu, hodi kombate korrupsaun ne’ebé ita hare katak mosu iha ita nia rain, liuhusi implementasaun Lei ne’e ita prodús daudaun,” dehan José Edmundo Caetano iha mensajen ikus diskusaun lei Medida Preventiva no Kompate Korrupsaun (MPCC, sigla portugés) iha Mukit Guest House Aisirimou, Aileu, foin lalais ne’e. 

Governante ne’e fó obrigadu tanba durante ne’e Komisaun A hamutuk ho entidade relevante sira halo esforsu makaas, lakon enerjia, halo diskusaun naruk liu, harmoniza normativu sira no konsege aprova projetu lei ida-ne’e iha ne’ebé  prosesu ne’e la’o tuir dalan konstituisaun nian.

“Tanba ne’e, ami agradese ba ita-nia vontade polítika hodi aprova projetu lei ida-ne’e, atu bele kombate korrupsaun iha ita-nia rai doben ida-ne’e,” nia dehan. 

Nia hatutan, hosi parte justisa nian sei esforsu aan tomak no husu ba lejisladór sira ho sira ninia inisiativa hodi prepara norma ne’ebé bele kompleta liután lei refere.

“Ami mós husu esforsu nafatin atu aban bairua ninia implementasaun ne’e bele la’o di’ak” nia hateten.

Entretantu, durante diskusaun ne’e, Vise Ministru Justisa, akompaña hosi  diretór Nasionál Assessoria Jurídika no Lejislasaun (DNAJL, sigla Portugés) Ministériu Justisa, Nelinho Vital, partisipa ativu hodi fó sira-nia hanoin iha parte tékniku no jurídika nian liga ho lei  ‘Medida Prevensaun no Kombate Korrupsaun’.

Notísia Relevante: Konklui Projetu Lei Númeru1/V/I, Komisaun A Agradese Entidade Hotu

Jornalista : Cipriano Colo

Editór       : Cancio Ximenes

HAKEREK NO HATÁN

Please enter your comment!
Please enter your name here