Ministru ba Asuntus Kombatentes Libertasaun Nasionál, Júlio Sarmento da Costa "Meta Mali". Imajen/Egas Cristovão

DILI, 14 jullu 2020 (TATOLI)–Governu liuhosi Ministru Asuntu Kombatente Libertasaun Nasionál (MAKLN), Julio Sarmento da Costa ‘Meta Malik’, hateten MAKLN hamutuk Sekretáriu Estadu Antigu Kombatente (SEKLN) hala’o programa prioridade sira hodi hala’o vizita ba munisípiu sira hodi halo dialogu ho veteranu sira atu harii monumentu no jardín eroi hodi bele hakoi restus mortais ho dignu.

Nia hatutan,  MAKLN ninia programa no planu prinsipál bazea ba Orsamentu Jerál Estadu (OJE) mak rezolve restus mortais sira ne’ebé sei rai iha ‘Osuariu’, hapara ke’e mate-ruin “restus mortais” no sei kria monumentu iha postu administrativu 65 iha territóriu Timor laran tomak, no kria formuláriu hodi fahe ba uma-lisan iha Timor laran tomak hodi rekolla ema hirak ne’ebé mak lakon durante funu laran (1975-1999).

“Baibain ita dehan molok funu ramata ita-nia mate sira ne’e besik rihun 200, entaun realidade mak ida-ne’ebé. Tanba asaun pratikamente ladún halo buat boot ruma. Maibé ho ida-ne’e, ami halo sensibilizasaun polítika, halo diálogu ho komunidade no veteranu sira para depois sasán hotu ema komprende no kontribui. Ita bele halo buat hotu maibé asaun ne’e tenke konkretu liuhosi harii monumentu iha postu administrativu 65 iha Timor-Leste,” dehan Julio Sarmento da Costa ‘Meta Malik’ ba jornalista sira iha Palásiu Governu, Dili, tersa ne’e. 

Tuir nia, mate iha funu laran ne’e labele konta halo funu mak dehan mate maibé konta ho inan kous oan, inan dada oan mak mate, sira ne’e hotu prenxe kritériu ba resposta ba ema rihun 200-resin ne’ebé mate ne’e ka lae.

Ho ida ne’e, nia dehan, restus mortais iha ona jardín eroi sira iha Timor laran tomak ne’ebé besik rihun 10-resin, tenke fó solusaun no resposta hodi hakoi restus mortais hirak ne’e. Maibé dahuluk tenke haree jardín eroi sira katak preparadu ona ka lae, karik preparadu ona mak konserteza tenke haloot sira iha fatin dignu.

Politika Sekretáriu Estadu Asuntu Kombatente Libertasaun Nasionál (SEAKLN), nia hateten, mak tún ba terrenu hateten bae ma hotu atu kontribui hodi redús buka no kee mate-ruin sira no presiza buka polítika foun ida hodi solusiona ba kestaun hirak ne’e.

“Ita buka redús restus mortais sira, la’ós ita diskrimina mak lakohi ke’e, lae. Kee mak la hetan duni ona, buka mak la hetan duni ona, entaun ita redús tiha ida-ne’e. Halo fali polítika foun ida tanba Governu prepara hela atu tún ba terrenu la’o hale’u ba fatin hotu-hotu hodi rona, identifika, deskute, para depois ita halo iha 2021 ka 2022 atu bele hamosu monumentu iha postu 65,” dehan ‘Meta Malik’.

Nia dehan, Ministériu Konsellu Kombatente Libertasaun Nasionál (MKKLN) elebora nia planu no programa ne’ebé mak sei hala’o iha aban ka bainrua nian mak nia parte hasoru malu ho Primeiru-Ministru hodi hato’o planu balun ne’ebé mak atu subemete ba Orsamentu Jerál Estadu (OJE) 2021.

“Ita hotu hatene katak ho situasaun COVID-19 no orsamentu, servisu hotu ita tein no orsamentu 2020 nian kala mosu de’it fulan rua hanesan ne’e. Maibé presiza sukat mós orsamentu ba fulan rua nian ne’e, nune’e labele fó impaktu negativu ba ita-nia orsamentu 2021 nian,” dehan governante ne’e.

Jornalista : Osória Marques

Editór      : Cancio Ximenes

HAKEREK NO HATÁN

Please enter your comment!
Please enter your name here