Diretór Ezekutivu no Fundadór Operadór Telekomunikasaun Ceslink, Júlio Cardoso (klaran), akompaña ho ekipa, halo konferénsia impresa hodi deklara katak kontinua ezisténsia nu’udár operadór telekomunikasaun. Imajen Tatoli/Egas Cristovão

DILI, 14 jullu 2020 (TATOLI) – Diretór Ezekutivu no Fundadór Operadór Telekomunikasaun Ceslink, Júlio Cardoso, deklara prontu re-inisia filafali prosesu lisensiamentu, hafoin Autoridade Nasionál Komunikasaun (ANC, sigla portugés) foin daudaun deklara suspende prosesu lisensiamentu Ceslink.

“Ami halo ona komunikasaun ho parte ANC no ami simu ona karta ofisiál husi autoridade ne’e. Parte ANC deklara katak bainhira Ceslink prontu ona bele hatama dokumentu  filafali. Agora daudaun ami la’o ho parseiru seluk no ami sei kontinua nafatin prosesu ne’e,” tenik Dirijente ne’e liuhosi konferénsia imprensa iha edifísiu Ceslink, Metiaut, tersa ne’e.

Antes ne’e, Prezidente ANC, João Olívio Freitas, hateten Governu fó ona apoiu polítika no faze tuirmai maka lisensamentu tékniku ne’ebé responsabiliza husi parte ANC liuhosi konsellu administrasaun no deside kria ekipa espesífiku hodi foka ba lisensamentu operadór telekomunikasaun timor-oan ne’e, maski nune’e operadór ne’e seidauk konsege kompleta rekezitu.

“Dokumentu to’o agora seidauk kompletu no loron 12 juñu tuku lima lorokraik hanesan loron ikus ba Ceslink atu submete dokumentu, maibé tanba la submete dokumetu maka ami sei hapara sira-nia prosesu lisensamentu tanba la kumpre dateline,” dehan Prezidente ANC ba Agência Tatoli foin lalais ne’e.

Notísia Relevante: La Prenxe Rekezitu, ANC Suspende Prosesu Lisensamentu Ceslink

Júlio Cardoso rekoñese ANC suspende prosesu lisensiamentu tanba seidauk priense rekezitu ne’ebé fó durante tinan ida resin iha parte administrasaun finanseiru no tékniku.

“Ami kompleta duni administrasaun, maibé la kompleta iha parte finanseiru, maibé iha parte tékniku ami-nia ekipa prontu ona dezde tinan ida ho balun maibé tanba de’it Ceslink laiha finaseiru maka sira suspende,” nia esklarese.

Maski nune’e, Fundadór operadór telekomunikasaun ne’e rasik afirma katak sei la hakiduk no promete sei lansa iha tinan ne’e tanba daudaun Ceslik rasik iha ona parseiru foun ne’ebé hamutuk atu halo investimentu nu’udár operadór telekomunikasaun dahaat iha Timor-Leste.

“Ha’u nu’udár kompañia nain, ha’u garante katak Ceslink sei lansa iha tinan ida-ne’e hodi bele realiza ita-nia mehi kona-ba timor-oan rasik investe iha área telekomunikasaun,” nia subliña.

Kona-ba parseiru foun Ceslink, Diretór Ezekutivu ne’e seidauk fó hatene maibé tuir nia parseiru foun ne’e hanesan timor-oan hotu, nune’e bele garantia finansiamentu hamutuk no halo investimentu iha área telekomunikasaun.

“Ha’u hanoin ho parseiru foun Ceslink nian sei garante finansiamentu no ami sei avansa ba parte teknikú nian, tanba ne’e ami iha esperansa sei lansa iha tinan ne’e,” nia realsa.

Antes ne’e, Governu liuhosi reuniaun Konsellu Ministru 20 fevereiru 2019, aprova proposta investimentu operadór telekomunikasaun Ceslink ne’ebé fó biban halo operasaun iha Timor-Leste maibé presiza kompleta rekezitu administrasaun balun.

Iha aprezentasaun iha tinan kotuk ba Governu, Ceslink hamutuk ho investór konsórsiu Oka D’tel, Salvador Henrique koñesidu ho naran ‘Mauhoka’ maibé agora daudaun iha ona parseiru foun ne’ebé Dirijente operadór telekomunikasaun ne’e rejeita fó komentáriu razaun saida maka la hamutuk ona ho Oka D’tel.

Jornalista: Natalino Costa

Editora: Julia Chatarina

HAKEREK NO HATÁN

Please enter your comment!
Please enter your name here