Prezidente Autoridade Nasional Komunikasaun, João Olívio Freitas. Imajen Tatoli/Natalino Costa

DILI, 12 juñu 2020 (TATOLI) – Governu liuhosi reuniaun Konsellu Ministru 20 fevereiru 2019, aprova ona proposta investimentu operadór telekomunikasaun, Ceslink ne’ebé fó biban halo operasaun iha Timor-Leste, maibé presiza kompleta rekezitu administrasaun balun.

Prezidente Autoridade Nasionál Komunikasaun (ANC, sigla portugés) João Olívio Freitas, hateten Governu fó ona apoiu polítika no faze tuirmai maka lisensamentu tékniku ne’ebé responsabiliza husi parte ANC liuhosi konsellu administrasaun ne’ebé deside kria ekipa espesífiku hodi foka ba lisensamentu operadór telekomunikasaun timor-oan ne’e, maski nune’e operadór ne’e seidauk konsege kompleta rekezitu.

“Dokumentu to’o agora seidauk kompletu no loron 12 juñu tuku lima lorokraik hanesan loron ikus ba Ceslink atu submete dokumentu, maibé tanba la submete dokumetu maka ami sei hapara sira-nia prosesu lisensamentu tanba la kumpre dateline,” dehan Prezidente ANC ba Agência Tatoli, iha nia kna’ar fatin, sesta ne’e.

Notísia Relevante: Governu Aprova Investimentu Operadór Telekomunikasaun Ceslink

Baze legál ne’ebé maka ANC uza ba lisensiamentu maka Dekretu-Lei númeru 15/2012, ne’ebé iha kriteriu 14 maka kompañia operadór telekomunikasaun presiza kompleta, ida importante liu atu kumpre maka rejistrasaun no lisensamentu operadór telekomunikasaun.

Nune’e mós tenke kompleta dokumentu administrasaun, kapasidade finanseira atu halo funsaun hanesan operadór telekomunikasaun no mós kapasidade tékniku.

“Ezemplu ita-boot nia estatutu hanesan kompañia operadór telekomunikasaun, labele fó fali estatutu ne’ebé maka hakerek dehan iha kapitál $20.000 de’it, tanba maioria operadór telekomunikasaun bainhira mai investe ho kapitál entre millaun $10 to’o millaun $20 no kada tinan sempre sa’e,” nia esplika.

Nia haktuir, parte Ministrériu Transporte no Telekomunikasaun (MTK) no ANC ativu tebes iha prosesu ne’e, liuliu Ministru Transporte no Telekomunikasaun, José Agostinho da Silva, maibé aplikante ne’ebé iha devér la kumpre.

Tuir jerente autoridade komunikasaun ne’e, parte ANC konsege haruka muda estatutu husi Unipesoal Lda sai Lda ka sosiedade anónima, atu nune’e bele fó biban ba investór seluk ne’ebé maka iha kapitál bele tama iha laran atubele halo investimentu.

Iha prosesu kompleta dokumentu, ANC konsege halo estensaun kuaze dala-haat.

“Sira husu halo estensaun dala-rua, ANC apoiu halo estensaun dala ida, hafoin Ministru José Agostinho rasik maka husu tan estensaun, maibé to’o ohin loron sira seidauk konsege kompleta rekezitu. Parte ANC sempre nakloke halo komunikasaun maibé importante maka iha dokumentu formál,” nia akresenta.

Jerente ne’e konta, iha aprezentasaun inísiu Ceslink ba Konsellu Ministru, investór úniku maka Oka D’tel, Salvador Henrique koñesidu ho naran Mauhoka, maibé iha estatutu laiha investór timor-oan ne’e nia naran.

“Bainhira dokumentu administrativu no finanseiru konklui, tenke haree fali ba parte tékniku. Buat hotu loos ona maka lisensa foin sai no fó frekuénsia inklui númeru telefone,” nia reforsa.

João Olívio refere ba Ministru José Agostinho nia orientasaun katak investimentu iha Timor-Leste sei la’o tuir regra no koridór lei ninian, tanba ne’e labele halai ses husi regra.

“Señor Ministru orienta ba ami katak presiza fó dateline ba sira atu kompleta dokumentu. Bainhira la kompleta tenke hapara prosesu rejistrasaun lisensamentu ba Ceslink no suspende totál ninia prosesu,” nia salienta.

Antes ne’e, Xefe Departamentu Marketing Ceslink, Moniz Maia, informa Infraestrutura telekomunikasaun Ceslink iha Dili atinje ona porsentu 95, tanba ne’e tempu badak operadór telekomunikasaun ne’e sei halo lansamentu ofisiál.

Nune’e, mós prosesu dezenvolvimentu infraestrutura sei halo espansaun ba munisípiu iha inísiu 2020.

Infraestrutura ne’ebé Ceslink monta ona maka torre iha Dili laran iha área Ai-Mutin, Hudi-Laran, Kristu Rei, no Marabia, no iha Munisípiu Manatuto no Liquicá.

Jornalista: Natalino Costa

Editora: Julia Chatarina

2 KOMENTÁRIU

  1. Investimentu nebee Timor oan puro mak halo nee governo tenke fasilita no simplifika prosesu sira nee para ajuda no insentiva labele komplika fali ho buat sira nebee la importante..nasionalismo, patriotismo no Timorizasaun nee tenke iha ema idak2 nia fuan no kakutak

  2. Triste hare decisaun ne, nusa la buka ajuda tan investimento nacionais atu fo tempo ba sira. Sira mak uma nain neneik ba mas sei lao nusa mak hamate kedas nune? Bapa ou ema liur karik sira ajuda to jadi. Mas Timor oan ona ne hanesan ne.

HAKEREK NO HATÁN

Please enter your comment!
Please enter your name here