Mákina perfurasaun mina-matan Drilling Rig to’o iha Suai husi EUA. Imajen/Timor Resources Pty.Ltd.

DILI, 13 jullu 2020 (TATOLI) – Relasiona ho surtu COVID-19 ne’ebé sei eziste iha mundu tomak, Kompañia Timor Resources Pty.Ltd deside adia instalasaun mákina perfurasaun mina-matan hanaran Drilling Rig, iha Kosta Súl, Postu Administrativu Suai, Munisípiu Covalima, Postu Administrativu Same, Munisípiu Manufahi no sei instala iha setembru tinan ne’e.

Tuir planu empreza australiana ne’e atu halo instalasaun iha marsu no hahú perfurasaun iha jullu 2020, maibé atividade iha Kosta Súl suspende provizóriu tanba Timor-Leste tama iha períodu Estadu Emerjénsia tanba kauza husi surtu COVID-19.

“Ita planu instalasaun mákina perfurasaun Drilling Rig iha setembru tinan ne’e, bainhira tékniku no enjeñeiru husi estranjeiru bele mai tanba mákina sira iha ona Suai,” tenik Diretór Operasaun Kompañia Timor Resources, Luís Pereira ba Agência Tatoli via telefónika, segunda ne’e.

Notísia Relevante: Mákina Drilling Rig ba Perfurasaun Mina-Matan To’o Ona Suai

Tuir nia, razaun adia instalasaun tanba maski Timor-Leste nia implementasaun períodu Estadu Emerjénsia ramata ona, maibé pandemia globál ne’e sei nafatin eziste no nasaun barak maka deside taka aeroportu, tanba ne’e tékniku no enjeñeiru sira husi Estadu Unidu Amérika  (EUA) seidauk bele hala’o viajen.

Timor Resources koordena ona ho Governu atu tékniku no enjeñeiru bele mai Timor-Leste, maibé nasaun hanesan Indonézia, Austrália no EUA ne’e seidauk loke Aeroportu no bainhira  mai  tenki tuir prosesu kuarentena ne’ebé  balun família la autoriza.

Molok atu halo perfurasaun iha setembru, Autoridade Nasionál Petróleu no Minerál (ANPM) sei halo verifikasaun.

Tuir planu, Empreza Timor Recourses hakarak foku uluk ba posu dahuluk hanaran Karau ne’ebé lokaliza iha Suku Matai, Postu Administrativu Maucatar, Munisípiu Covalima, ho durasaun instalasaun no perfuransaun kuaze loron 40, hafoin atividade ne’e realiza maka muda fali ba posu daruak lokaliza iha Aldeia Sanfuc, Suku Camenaça, Postu Administrativu Suai Villa, Munisípiu Covalima.

Timor GAP no empreza Timor Resources atu hahú iha tinan ne’e nia rohan hodi halo perfurasaun dahuluk iha fatin tolu to’o lima husi bloku ne’ebé maka iha lisensa ona hodi halo’o atividade esplorasaun ho produsaun petróleu iha Timor-Leste.

Tékniku sira identifika ona fatin tolu iha bloku A hanesan fatin ne’ebé potensiál ba perfurasaun.

Bloku A lokaliza iha Munisípiu Covalima no Bloku C iha Munisípiu Manufahi ho Ainaro ne’ebé hola parte ona iha rejime kontratu partilla produsaun Timor Resources, ne’ebé hanesan empreza australiana ne’ebé hola parte husi Nepean Group.

Enkuantu bloku B haruka ona ba Timor GAP Onshore Block, ne’ebé hanesan subsidiáriu ida husi empreza públika petrolífera Timor-Leste nian (Timor GAP).

Planu inisiál tinan hitu ba esplorasaun prévia ba peskiza tinan-rua, husi tinan daruak ba tinan datoluk hahú ho perfurasaun to’o tama tinan-haat maka kompleta estudu no husi tinan-lima ba oin iha posibilidade hahú esplorasaun.

Jornalista: Florêncio Miranda Ximenes

Editora: Julia Chatarina

HAKEREK NO HATÁN

Please enter your comment!
Please enter your name here