Ezemplu fasilidade laboratoriu. Foto google

BAUCAU, 11 jullu 2020 (TATOLI)-Adjuntu Diretór Eskola Ensinu Sekundáriu Jerál 02 Vila Nova Munisípiu Baucau, Tito Almeida, hateten to’o oras ne’e seidauk iha fatin própriu atu rai ekipamentu no prátika laboratóriu ba estudante siénsia naturál.

“To’o agora ami seidauk iha fatin própriu ba laboratóriu, maske iha 2010 ami utiliza ona  materia prátika ba estudante siénsia naturál sira,”Informa Adjuntu Diretór ne’e iha ámbitu vizita Vise Ministru Edukasaun Juventude no Desportu, António Guterres, iha kinta (09/07) liubá.

Notísia Relevante :EESJ 02 Vila Nova Baucau Re-Ativa Prosesu Aprendizajen

Durante ne’e, EESJ 02 Vila Nova Baucau uza sala baibain hodi rai ekipamentu laboratóriu no halo prátika ba estudante sira tanba ne’e maka sasán balun hetan estragus no liu ona prazu.

“Sasán likuidu (cairan) ne’ebé mak liu ona prazu mak hanesan likuidu kímiku sira, ne’ebé parte eskola labele utiliza hodi halo prátika ba estudante siénsia naturál sira, no  fasilidade ne’ebé sei bele uza mak mikroskopu,”tenik tan.

Tito hatutan nia parte sempre relata situasaun ne’e ba Ministériu Edukasaun Munisípiu Baucau no aprezenta beibeik iha enkontru trimestrál nian maibé la rezolve ho rajaun Governu laiha orsamentu jerál estadu adekuadu tanba uza de’it orsamentu duodesimu.

“Ami nia dirijente sira sempre hato’o razaun ida ne’e mai ami ne’ebé to’o agora eskola EESJ 02 Vila Nova laiha materia prátika laboratóriu  ba estudante sira,”dehan nia.

Jornalista : Tomé Amado

Editór       : Agapito dos Santos 

HAKEREK NO HATÁN

Please enter your comment!
Please enter your name here