Deputadu proponente hosi Komisaun A Parlamentu Nasionál (PN), Francisco de Vasconcelos. Imajen/ Egas Cristovao.

AILEU, 09 jullu 2020 (TATOLI)–Deputadu proponente hosi Komisaun A Parlamentu Nasionál (PN), Francisco de Vasconcelos, propoin atu altera títulu projetu Lei númeru 1/V/I-Lei Anti Corrupção ba ‘Medidas Prevensaun no Kombate Korrupsaun’ tanba konsidera títulu ne’e refleta konteúdu tomak hosi lei ne’e rasik.

Notísia Relevante: Komisaun A Altera LAC Tanba Proposta Orijinál Laiha Matéria Prevensaun no Deklarasaun Bens

“Ami deputadu proponente sira hili títulu ‘Medidas Prevensaun no Kombate Korrupsaun’ tanba artigu sira ne’ebé kontein iha lei ne’e nia laran, abranje hotu kedan kapítulu sira hotu.  Títulu ida primeiru ne’e mós laiha problema, hanesan de’it, tanba la muda ninia konteúdu maibé deputadu sira konkorda ho proposta alterasaun ne’e katak, atu uza títulu ne’e, entaun ikus mai ita aprova duni,” Deputadu  Francisco de Vasconcelos esplika, hafoin aprova proposta alterasaun, iha diskusaun ne’ebé hala’o iha Mukit Guest House, Airirimou, Aileu, kinta ne’e. 

Entretantu, Komissáriu Comissão Anti Corrupção (CAC), Sérgio Hornai, konkorda ho proposta atu muda títulu ne’e, tanba hanesan dei’t no la muda lei ne’e rasik ninia esénsia no konteúdu tomak.

“Em prinsípiu ha’u hakarak akresenta katak Parlamentu Nasionál, liuliu deputadu sira hosi Komisaun A ne’ebé inklui iha diskusaun Lei Anti Corrupção (LAC) ne’ebé maka hala’o tiha ona, sira iha kompeténsia tuir konstituisaun, tuir lei, tuir rejimentu Parlamentár nian. Sira iha kompeténsia atu bele halo medidas liuliu halo aditamentu, halo alterasaun ka revogasaun, atu muda iha dentru projetu de lei balun, konkretamente iha lei ne’ebé mak  iha LAC. Realmente, iha situasaun ida-ne’e, prova iha duni proposta ne’ebé mai hosi deputadu sira, hanesan proponente ne’ebé maka hakarak halo alterasaun ba iha titulu LAC ninian, muda ba iha ‘Medidas Prevensaun no Kombate Korrupsaun’. Hosi medidas ka títulu ne’ebé maka iha, tuir perspetiva Comissão Anti Corrupção katak ida-ne’e la muda ninia esénsia no substánsia hosi Lei Anti Corrupção ne’e rasik, no ida ne’e laiha problema,”  Komisáriu CAC esplika.

Mudansa ba títulu ne’e, karik sei iha mós implikasaun ba Comissão Anti Corrupção ninia naran, Komisáriu ne’e dehan, konserteza ho lei ne’ebé mak atu mai, presiza halo ajustamentu, signifika presiza mós haree ba iha lei kona-ba kriasaun CAC, Lei númeru 8/2009, 15 fulan jullu, nu’udár lei ida dahuluk liu, hodi hamosu Comissão Anti Corrupção iha Timor-Leste.

“Ita hotu-hotu konserteza sei iha mudansa. Karik akontese no mudansa sira ne’e tenke bazeia ba lei. Ba CAC nia naran la’ós buat ida ne’ebé lulik (tabu) ka la’ós buat ida ne’ebé laiha mudansa. Importante liu esénsia, substánsia matéria ne’ebé maka kada kapítulu, kada seksaun, kada artigu iha ne’ebá refleta duni ba iha situasaun ne’ebé mak ita enfrenta,” Komissáriu ne’e subliña tan.

Komissáriu ne’e mós hateten, bainhira lei ne’e tama iha vigór, molok implementasaun, CAC rasik sei servisu hamutuk ho entidade sira atu halo sosializasaun liuliu haree kona-ba planu estratejiku.

“Kona-ba sosializasaun, liuliu iha kapítulu primeiru to’o kapitulu segundu, ita ko’alia kona-ba planu . Ha’u hanoin ita hotu-hotu presiza halo kooperasaun, koordenasaun institusionál, hotu-hotu bele envolve atu bele haree hamutuk planu estratéjiku ne’e rasik. Segundu kapítulu nian ko’alia kona-ba rejime deklarasaun de bens, rejime ida-ne’e atu hateten mai ita dehan katak ema hotu-hotu sei presta ninia deklarasaun, ba iha unidade kompetente. Konserteza rejime ida-ne’e, liuliu iha artigu 26 to’o iha ninia finalidade ne’e, liuliu ba iha responsabilidade, no mós órgaun ka autoridade kompetente bele asegura ba iha kestaun administrasaun, nune’e sasan sira ne’e bele rai didi’ak,” nia hateten.

Nia dehan, ba asuntu ida-ne’e presiza formasaun, esklaresimentu, sosializasaun ida liuliu ba iha deklarante sira hahú hosi liña ministeriál sira, sira ne’ebé mak kaer kargu xefia hahú kedan hosi Prezidente Repúblika to’o mai iha asesór nasionál ka asesór sira ne’ebé mak iha dependénsia renumerasaun ba iha Orsamentu Jerál Estadu (OJE). 

Aleinde ne’e, Komisáriu Adjuntu CAC, Augusto Castro, konsidera títulu ne’e refleta duni finalidade no objetivu hosi lei ne’e rasik.

“Ha’u hanoin, iha epígrafu ne’e refleta duni finalidade no objetivu hosi Lei ne’e rasik. Tanba ne’e maka deputadu sira husu mudansa ba ninia títulu ne’ebé antes ne’e projetu Lei Anti Corrupção, depois iha nia rohan. Tanba haree hosi progresu no dinámika diskusaun sira ne’ebé maka la’o, Komisaun A nota katak di’ak liu ita ta’u lei ne’e ninia objetivu loloos katak atu ko’alia kona-ba Medidas Preventivas no Kombate Korrupsaun, tanba ne’e mak muda tiha titulu ne’e. Kona-ba ninia epígrafu ne’e kompeténsia polítiku sira-nian no ba CAC rasik laiha problema,” Adjuntu Komissáriu hateten.

Adjuntu komissáriu CAC ne’e mós hateten, títulu ne’e kestaun tékniku liu, laiha influénsia ruma ba iha ninia implementasaun.

Koordenadór Unidade Monitorizasaun Parlamentu Nasionál ba plenária no Komisaun A asuntu Konstitusionál no Justisa hosi Organizasaun Naun Governamentál Programa Monitorizasaun ba Sistema judisiária (JSMP), José Perreira, mós iha perspetiva hanesan katak titulu ida-ne’e laiha problema, tanba iha konteúdu tomak ne’e la muda no titulu ne’e mós refleta tebes konteúdu.

“Ha’u hanoin katak, títulu ida prmieiru kona-ba Lei Anti Corrupção ne’e mós di’ak, tanba ninia medida ida maka prevensaun ne’e. Maibé, deputadu sira-nia hanoin ne’e katak prevensaun ne’e ita antesipa tiha antes tama ba korrupsaun ne’e akontese. Nune’e, deputadu sira hakarak muda mós hanesan de’it, di’ak hela,” José konkorda.

Tanba ne’e, JSMP husu entidade relevante sira liuliu CAC atu bainhira lei ne’e tama iha vigór, presiza halo sosializasaun, nune’e públiku bele hatene didi’ak kona-ba lei ne’e.

Entretantu, oras ne’e la’ós hanaran Lei Anti Corrupção (LAC) maibé hanaran ‘Medidas Perevensaun no Kombate Korrupsaun’ (Medidas de Prevenção e Combate à Corrupção).

Proposta alterasaun ba títulu ne’e hato’o hosi deputadu proponente na’in-tolu mak hanesan deputadu Francisco Miranda Branco, deputadu Dário Madeira no deputadu Francisco de Vasconcelos.

Proposta ne’ebé ho númeru 41, data 09/07/ 2020 ne’e pasa iha votasaun ho votus a-favór 7, kontra 0 no abstensaun 0, hosi deputadu komisaun A prezente mak hanesan, Prezidente Joaquim dos Santos ‘Boraluli’,  vise Francisco de Vasconcelos, Sekretáriu José Pacheco Soares, Membru Francisco Miranda Branco, Dário Madeira, Carmelita Moníz, no António Nobre Amaral Tilman.

Projetu Lei Númeru 1/V/I-Medidas Prevensaun no Kombate Korrupsaun, ne’ebé ho Titulu hamutuk tolu (III), Primiru (I) kona-ba medidas preventivas Kombate Korrupsaun, Segundu kona-ba Dispozisaun Kriminál, no Tersieru (III) kona-ba Dispozisaun Finál, ho artigu hamutuk 120.

Jornalista : Cipriano Colo

Editór      :  Cancio Ximenes

HAKEREK NO HATÁN

Please enter your comment!
Please enter your name here