Ministru Defeza, Filomeno da Paixão de Jesus, entrega sertifikadu apresiasaun ba Adidu Militár Xina nian mai Timor Leste, Koronél Huang. Imajen/Ministériu Defeza

DILI, 09 jullu 2020 (TATOLI)-Ministru Defeza Timor-Leste, Filomeno da Paixão de Jesus, ohin, entrega sertifikadu apresiasaun ba adidu militár Xina nian iha embaixada Repúblika Popular Xina mai Timor Leste, Koronél Huang  ne’ebé termina ona nia misaun iha Timor-Leste.

Notísia Relevante : TL Agradese Akademia Navál Xina Apoia Formasaun ba Forsa Navál

Adidu Militár Xina ne’e hala’o nia misaun iha Timor-Leste iha tinan haat (4 ) nia laran. Tanba iha tempu badak, Kolonel ne’e sei fila fali ba Xina hodi kumpre fali misaun foun.

Iha enkontru despedida, Koronél Huang apresia tebes kooperasaun no koordenasaun di’ak hosi Ministériu Defeza liuliu ho lideransa di’ak hosi Ministru Defeza Timor-Leste, Filomeno da Paixão de Jesus, ne’ebé kontribui tebetebes ba hametin liután lasu amizade entre nasaun rua iha setór defeza.

Durante nia misaun iha Timor-Leste, apoiu no asisténsia lubuk ona mak Xina fó ba Timor-Leste, no Xina komprometidu hodi kontinua sai belun di’ak Timor-Leste nian.

Ministru Defeza aproveita okaziaun ida ne’e hodi hato’o agradesimentu kle’an ba apoiu tomak hosi Xina ba dezenvolvimentu forsa defeza Timor-Leste nian no hato’o mós apresiasaun boot ba lideransa, dedikasaun no profisionalizmu tomak hosi Adidu Militár Xina nian ne’e.

Ministru dehan, Timor-Leste sei hametin liután parseria bilaterál defeza ho Repúblika Popular Xina no atribuisaun sertifikadu apresiasaun hosi Governu Timor-Leste liuhosi Ministériu Defeza Timor-Leste  ida ne’e tanba durante ne’e Koronél Huang  kontribui dedikasaun boot ba kooperasaun bilateral defeza entre Timor-Leste ho Xina.

Jornalista   : Eugénio Pereira

Editór        : Francisco Simões

HAKEREK NO HATÁN

Please enter your comment!
Please enter your name here