DILI, 07 outubru 2019 (TATOLI)-Governu Timor-Leste hato’o agradesementu ba Governu Xina liu husi Akademia Militár DALIAN Navál Xina nian ne’ebé kada tinan kontinua simu membru Komponente Navál FALINTIL-Forsa Defeza Timor-Leste (F-FDTL) ba tuir formasaun iha Xina.
Notísia Relevante : Ró Militár Xina ho Forsa 500 Vizita TL
Ministru Defeza no Ministru Interior Interinu, Filomeno da Paixão de Jesus lori povu no governu Timor-Leste nia naran hato’o agradesimentu bainhira hamutuk ho Vise Xefe Estadu Maiór Jenerál FALINTIL-Forsa Defeza Timor-Leste (F-FDTL), Brigadeiru Jenerál, Falur Rate Laek hala’o enkontru ho Komandante Ró Militár Contra- Almirante, Yu Wenbing, akompaña husi Embaixadór Xina mai Timor-Leste, Xiao Jiangua, durante hala’o vizita ba ró Militár “Qi Ji Guang”, ohin, iha Portu Dili.
“Ita agradese tanba kada tinan Ró Akademia Militár DALIAN Xina nian mós simu ita nia forsa Navál liu nain 18 ba tuir formasaun navál nian iha Xina no agora daudaun ita nia membru ida ba tuir hela formasaun,” Ministru Filomeno Paixão hateten.
Iha vizita ne’e, Ministru Filomeno no Brigadeiru Jenerál, Falur Rate Laek, hato’o benvindu ba ekipa forsa Xina ho delegasaun na’in 500 liu durante loron haat estadia iha Timor-Leste.
Jornalista : Eugénio Pereira
Editór : Francisco Simões
