Primeiru-Ministru, Taur Matan Ruak, konversa hela ho Ministru Defesa, Filomeno da Paixão de Jesus. Imajen/António Gonçalves

DILI, 09 juñu 2020 (TATOLI) – Primeiru-Ministru, Taur Matan Ruak, husu ba Ministru Defeza no Ministru Interiór interinu, Filomeno da Paixão de Jesus, atu selu lalais dívida  Polísia Nasionál Timor-Leste (PNTL) ho FALINTIL-Forsa Defeza Timor-Leste (F-FDTL) nian.

Ministru Filomeno dehan, PM Taur husu atu solusiona dívida husi instituisaun rua, nune’e bele prepara Orsamentu Jerál Estadu (OJE) 2021 atu  bele haree liu ba programa dezenvolvimentu infraestrutura forsa-rua nian.

Tuir relatóriu ne’ebé Ministru Filomeno simu husi instituisaun forsa-rua ne’e, instituisaun PNTL maka iha dívida boot no tenke solusiona lalais.

“Dívida barak liu maka iha PNTL, hahú kedas governasaun sira antes, ha’u haree maka’as liu maka dívida telekomunikasaun Telemor selu CCTV ne’ebé mota iha estrada sira, selu telefone, manutensaun ba karreta bele too milaun $2 ka milaun $3 ne’ebé ita tenke selu lalais,”  hateten Ministru Filomeno Paixão, ba jornalista, ohin,  iha Palaçio do Governo.

Ministru Filomeno sei hala’o enkontru ho Komandu F-FDTL ho PNTL iha tempu besik atu ezolve lalais dívida sira-ne’e.

Iha orsamentu foun 2021, Ministériu Defeza no Ministériu Interior hakarak fokus liu investe ba dezenvolvimentu infraestrutura hanesan harii doka ba atu halo manutensaun ba ró militár F-FDTL ho Unidade Polísia Marítima (UPM), estabelese kooperasaun serbisu F-FDTL no Forsa Austrália halo patrullamentu konjunta iha tasi Timór parte Kosta Súl no harii postu seguransa permanente iha Kosta Súl, Norte, Leste no Oeste fronteira.

Programa seluk tan maka kria kooperasaun serbisu ho Governu Amerika iha formasaun rekursu umanu no konstrui Aeroportu Baucau.

Jornalista       : Eugénio Pereira

Editór             : Francisco Simões

 

HAKEREK NO HATÁN

Please enter your comment!
Please enter your name here