Deputadu sira hosi Komisaun A Parlamentu Nasionál hamutuk ho entidade relevante sira, ohin, konklui ona Lei Krime Korrupsaun nian. Imajen/Mídia CAC.

AILEU, 08 jullu 2020 (TATOLI)–Deputadu sira hosi Komisaun A Parlamentu Nasionál hamutuk ho entidade relevante sira, ohin, halo diskusaun no konklui ona Lei Krime Korrupsaun nian ne’ebé pertense mós ba projetu Lei Númeru 1/V/2019-Lei Anti Corrupção (LAC).

Notísia Relevante: Komisaun A Aprova Tan Artigu 22-23 Lei Krime Korrupsaun

Lei Krime Korrupsaun ne’e iha kapitulu VI, ho artigu hamutuk 47, no ohin hahú halo diskusaun ba Kapitulu III kona-ba dispozisaun prosesuál penál ba artigu hamutuk 14 no artigu 3 mak la diskute, tanba inklui ona iha dispozisaun jerál.

Artigu sira ne’ebé diskute ne’e, iha artigu lubuk ida mak pasa la ho diskusaun barak, tanba konsidera ladún iha problema.

Iha artigu 29 kona-ba informasaun ba sasán, valór no kebra segredu mak deputadu sira ho entidade relevante sira konsege diskute barak, relasiona ho kestaun téknika bainhira no oinsá mak juiz bele halo pedidu ba informasaun.

Tanba ne’e, iha  intervensaun hosi Adjuntu Prokuradór Jerál Repúblika,  Alfonso Lopez, hateten molok juiz halo pedidu hodi halo mandadu ba instituisaun relevante atu hetan informasaun tenke liuhosi solisitasaun Miniatériu Públiku nian.

Deputadu sira mós hamosu proposta ida hodi sai artigu úniku ho razaun katak artigu 36 kona-ba reembolsu ba vitima denusiante no artigu 42 kona-ba konduta la punível,  prevee buat ne’ebé hanesan.

Iha sesaun ikus liu, deputadu ho entidade sira diskute Kapitulu VI kona-ba dispozisaun finál  artigu 47 kona-ba tama vigór. Iha desizaun ikus, deputadu sira deside atu Lei Antí Corrupção (LAC) tama ba vigór hafoin loron 180 (fulan neen) publikasaun LAC.

Ho eliminasaun ba artigu sira ne’ebé temi ona, parte tékniku sira halo hela redasaun ne’ebé sei hadi’a mós númerasaun sira, atu prepara ba aprovasaun iha aban.

Entretantu, Lei Krimi Korrupsaun ne’e kompostu hosi  kapitulu neen (VI), ho nia artigu hamutuk 47 no diskusaun ne’e hahú hosi kapitulu I kona-ba krime korrupsaun sesaun I ko’alia kona-ba krime korrupsaun pratikadu iha ezersísiu funsaun públika sira.

Sesaun ne’e iha artigu hamutuk sanulu resin ida (11) mak hanesan, artigu 1 kona-ba korrupsaun ka subornu passiva husi funsionáriu iha aktu ilísitu, artigu 2 kona-ba korrupsaun ka subornu passiva husi funsionáriu iha aktu lísitu, artigu 3 kona-ba korrupsaun ka subornu ativa husi funsionáriu, artigu 4 kona-ba pekulatu, artigu 5 kona-ba pekulatu uzu nian.

Artigu 6 kona-ba atentadu ba direitu partisipasaun no igualdade husi kandidatu sira iha konkursu aprovizionamentu, venda ka konsesaun, artigu 7 kona-ba abuzu podér, artigu 8 kona-ba partisipasaun ekonómika iha negósiu, artigu 9 kona-ba konflitu intereses, artigu 10 kona-ba agravasaun, artigu 11 kona-ba konseitu funsionáriu.

Sesaun II, Krime sira Korrupsaun pratikadu iha ezersísiu funsaun privada sira, artigu 12 kona-ba korrupsaun ka subornu passiva ba sira ne’ebé ezerse funsaun iha setór privadu, artigu 13 kona-ba korrupsaun ka subornu ativa ba sira ne’ebé ezerse funsaun iha setór privadu, artigu 14 kona-ba pekulatu iha setór privadu.

Sesaun III- Krime Korrupsaun Sira Seluk, artigu 15 kona-ba tráfiku influensia, artigu 16 kona-ba subornu kontra realizasaun justisa, artigu 17 kona-ba obstrusaun ba produsaun prova nian, artigu 18 kona-ba obstrusaun ba atividade majistradu ka funsionáriu, artigu 19 kona-ba fraude iha konstrusaun, artigu 20 kona-ba obstrusaun ka afastamentu husi konkorrente aprovizionamentu ka venda públika.

Artigu 21 kona-ba falta deklarasaun bens, rendimentus no intereses, (artigu ne’e (21) elimina tiha tanba komtempla ona iha testu anteriór kona-ba rejime deklarasaun de bens no intereses ne’ebé arova tiha ona iha diskusaun semana kotuk, artigu 22 kona-ba pose ba rikeza naun justifikada, artigu 23 kona-ba brankamentu.

Kapitlu II-Preskrisaun, artigu 24  ko’alia kona-ba preskrisaun prosedimentu kriminál, artigu 25 kona-ba preskrisaun husi Pena.

Kapitulu III-Responsabilidade Penál ba Pessoas Koletiva, artigu 26 responsabilidade penál ba pessoa koletiva, artigu 27 kona-ba pena aplikável ba pessoa koletiva, artigu 28 kona-ba pena assesoria aplikável ba pessoa koletiva.

Kapitulu IV-Dispozisaun kona-ba Prosesuál Espesiál sira, sesaun I identifikasaun, kebra segredu, no foti revista, artigu 29 kona-ba informasaun kona-ba bens, valores no kebra segredu, artigu 30 kona-ba buka, revista no rona telefonika sira.

Sesaun II Apreensaun sira, artigu 31 kona-ba konjelamentu ka apreensaun, artigu 32 kona-ba efetivasaun apreensaun no destinu husi bens apreendidu sira; sesaun III Lakon objetu no Produtu Krimi nian;  artigu 33 kona-ba  lakon objetu no produtu krime sira, artigu 34 kona-ba invalidade negósiu jurídiku, artigu 35 kona-ba Preveniénsia lísita, artigu 36 kona-ba Reembolsu ba Vítima denunsiante.

Sesaun IV protesaun ba testemuña sira, péritu no vítima sira, artigu 37 kona-ba protesaun ba testemuña sira, péritu no vítima sira; Sesaun V protesaun ba ema sira ne’ebé la fó informasaun, artigu 38 kona-ba Denúnsia anónima; sesaun VI Kooperasaun ho Autoridade kompetente sira, artigu 39 kona-ba Sirkunstánsia husi atenuasaun estraórdinária, artigu 40 kona-ba atenuasaun pena, artigu 41 kona-ba Protesaun, artigu 42 kona-ba Konduta la Punível; sesaun VII Responsabilidade Sivíl, artigu 43 kona-ba Indemizasaun.

Kapítulu V- Dispozisaun sira Naun Penais, Artigu 44 kona-ba Deklarasaun Bens no Interese, artigu 45 kona-ba Pose ba rikeza naun justifikada.

Kapítulu VI-Dispozisaun Finál, artigu 46 kona-ba revogasaun dispozisaun sira Kódigu penál nian, artigu 47 kona-ba entrada iha vigór.

Jornalista : Cipriano Colo

Editór       :  Cancio Ximenes

HAKEREK NO HATÁN

Please enter your comment!
Please enter your name here