Logotipu TDD. Imajen/Egas Cristóvão

DILI, 09 jullu 2020 (TATOLI) – Tribunál Distritál Dili (TDD) loke prosesu julgamentu hasoru  arguidu JGB ba kazu prátika droga no atividade ilísitu.

Notísia Relevante : TDD Adia Julgamentu ba Kazu Tráfiku Droga iha Ligasaun ho Kondenadu Kazál Timoroan

Tuir akuzasaun ne’ebé aprezenta hosi Ministériu Públiku (MP) liuhosi audiénsia julgamentu, kuarta loro-kraik, katak  arguidu JGB antes ne’e haruka kazál Timoroan  ho inisiál JSP ho AS lori droga  sai hosi territóriu Timor-Leste ba Indonézia liuhosi fronteira terrestre Motain iha tinan 2019.

Iha loron 29 maiu 2019, Polísia Investigasaun Nasionál Narkótika nian simu informasaun (via WhatsApp) hosi Polísia Repúblika Indonézia (POLRI) purvolta tuku 15: 30 Otl, katak, POLRI detein ona kazál Timoroan iha Motain ne’ebé mak pertensia ba territóriu Indonézia nian, tanba lori droga ho tipu Ecstasy.

Bainhira Polísia Indonézia halo detensaun no pasa revista ba kazál Timoroan ne’e, deteta katak, sira lori duni droga  Ecstasy hosi territóriu Timor-Leste ho nia kuantidade 4.874 ho nia modelu ne’ebé maka hanesan, maibé kór maka lahanesan no balun kór matak, azúl no kór kafé.

Iha investigasaun ba kazál Timoroan ne’e, deklara ba POLRI katak sira-nia patraun ne’ebé agora sai arguidu ho inisiál JGB maka haruka sira nain rua lori printer (tau droga iha laran) sira ne’e ba Indonézia.

Bainhira autoridade  Polísia Timor-Leste (PNTL) hatene ona katak, arguidu JGB iha hela Timor-Leste, nune’e polísia halo kedas detensaun ba arguidu JGB.

Iha prosesu  inkéritu arguidu  JGB deklara katak nia parte mak haruka duni kazál Timoroan lori sasán printer ba Indonézia atu fó ba ema ne’ebé maka nia identifika ona ho númeru telefone Indonézia nian iha Kupang.

Iha aktu hosi MP nian ne’e mós haktuir katak, arguidu hetan sasán droga sira ne’e husi ema afrikanu ida hosi Nijéria no naran inisiál VCO, modelu atu transforma sasán sira-ne’e hosi estranjeiru ho nia destinasaun maka Indonézia.

Tuir arguidu JGB, sasán ilísitu sira-ne’e tenke tama lai mai territóriu Timor liuhosi nia kompañia internasionál JVK hafoin maka arguidu haruka fali ba Indonézia liuhosi Kupang.

Arguidu mós haruka ona sasán ba Indonézia ho nia modelu hanesan dala tolu ona no sasán sira-ne’e mai hosi sidadaun Afrikanu ho inisiál VCO ba arguidu hafoin arguidu transfere fali sasán sira ne’e ba Indonézia.

Arguidu simu sasán pakete printer ho marka EPSON (droga iha laran) iha loron 2 maiu 2019 hosi sidadaun afrikanu VCO no iha loron ne’e kedas, arguidu orienta ba kazál Timoroan atu lori sasán ka printer ne’e ba Indonézia liuhosi Motain.

Timoroan ho JSP servisu hamutuk ho arguidu iha kompañia JVK internasionál enkuantu JSP no nia kaben AS akompaña de’it hodi halo vizita ba Kupang.

Ho aktu sira arguidu  JGB nian ne’e, Ministériu Públiku  konsidera arguidu halo ho forma livre, de liberada no konsentimentu hatene momoos katak, simu hosi ema seluk (rede internasionál ) no haruka ka transfere sasán ilísitu (droga) ba Indonézia.

Arguidu mós hatene hela katak, hahalok ka konduta ne’ebé maka nia halo proibidu tuir lei penal. Tanba ne’e, MP promove arguidu JGB hanesan autoria materiál ba pratika krime rua; tráfiku no atividade ilísitu iha artigu 7 númeru 1 no krime Asosiasaun Kriminoza iha artigu 10 númeru 1, hosi lei númeru 2/2017, kona-ba kombate Tráfiku Ilísitu, ho forma konsumada, ho nia agravasaun tuir artigu 9 alínea E,K hosi lei ne’ebé mak hanesan.

Hatán ba akuzasaun hirak ne’e arguidu JGB iha sala julgamentu hili ho dalan nonook ka lakohi ko’alia.

Sasin ho inisiál JF hanesan traballadór ne’ebé servisu hamutuk ho arguidu iha nia kompañia internasionál JVK dezde iha tinan 2006 hanesan staff baibain no iha tinan 2015 ate 2019 hala’o fali kna’ar funsaun servisu iha area broker nian, ne’ebé atende hodi prosesa no simu sasán importasaun no esportasaun hosi portu no aeroportu.

Nia esplika, kompañia internasionál JVK durante ne’e nia iha ajénsia ka ‘cabang’ iha nasaun 14 lokaliza iha Asia  no durante ne’e nia atividade simu ‘titipan’ ka hodi fasilita ema ne’ebé hakarak halo transportasaun ba importasaun no esportasaun ba sasán korreiu.

Prosesu audiénsia julgamentu ne’e prezide hosi juis koletivu Zulmira da Silva, João Ribeiro, Argentino Neves, Ministériu Públiku reprezenta hosi Prokuradór Luis Ernani no arguidu hetan asisténsia legal hosi advogadu privadu Domingos Pinto, José Andrade no Agostinho de Jesus.

Jornalista : Nelson de Sousa

Editór       : Francisco Simões

HAKEREK NO HATÁN

Please enter your comment!
Please enter your name here