Kazál Timoroan, José Soares Pereira no Angela Soares, hakuak sira nia-oan ho tanis, hafoin rona desizaun finál iha Tribunál Atambua, Indonézia, kuarta (26/02/2020). Imajen/Eugénio Pereira

DILI, 17 juñu 2020 (TATOLI) – Tribunál Distritál Dili (TDD), ohin, adia julgamentu ba kazu pratika tráfiku droga no atividade ilísitu ne’ebé deskonfia envolve husi arguidu ho inisiál JGB ne’ebé antes ne’e haruka kazál timoroan lori Pil Ecstasy sai husi territóriu Timor-Leste liu hosi Motain, Indonézia iha 2019.

Notísia Relevante : Kazál Timoroan ba Kazu Droga: “Ami Vítima no Inosente”

Tuir loloos audiénsia julgamentu ne’e akontese tuku 9:00 Otl, hodi rona deklarasaun arguidu JGB nian, ne’ebé marka mós prezensa husi Ministériu Públiku liuhusi Prokuradór Luis Hernánio no Defensor Públiku Eustáquio Guterres.
Maibé, ho razaun juis koletivu seidauk prienxe, tanba ne’e Tribunál deside adia hikas  julgamentu ba loron 8 jullu,  tinan ne’e.

Tuir faktu akuzasaun ne’ebé arrola husi Ministériu Públiku katak iha loron 29 maiu 2019, Polísia Investigasaun Nasionál Diresaun Narkótika nian simu informasaun via WhatsApp, husi Polisia Repúblika Indonézia (POLRI) iha Atambua Motain, iha loron ne’ebá maizumenus tuku 15h30 Otl, POLRI, detein ona kazál timoroan iha Motain ne’ebé mak pertensia ba territóriu Indonézia nian, tanba lori droga ho tipu Ecstasy.

Bainhira POLRI halo detensaun no pasa revista ba kazál Timoroan ne’e deskobre katak sira lori duni Pil Ecstasy husi territóriu Timor-Leste ho nia kuantidade  grama 4.874 ho nia modelu ne’ebé maka hanesan, maibé kór maka lahanesan no balun kór matak, azúl no kór kafé.

Bainhira autoridade indonézia halo pasa revista no halo mós inkéritu ba kazál timoroan ne’e, sira deklara katak, arguidu JGB maka haruka sira na’in-rua lori printer (tau droga iha laran) sira ne’e ba Indonézia.

Bainhira autoridade Polísia Nasional Timor-Leste (PNTL) hatene ona katak arguidu JGB iha hela Timor-Leste, nune’e polísia halo kedas detensaun ba arguidu JGB no iha inkéritu arguidu deklara katak nia parte mak haruka duni kazál Timoroan lori mákina impremi nian ba Indonézia atu fó ba ema ne’ebé maka nia identifika ona ho númeru telefone Indonézia nian iha Kupang.

Iha aktu husi MP nian ne’e mós haktuir katak, arguidu hetan sasán droga sira-ne’e husi ema afrikanu ida husi Nigeria no naran inisiál VCO, modelu atu transforma sasán sira-ne’e husi estranjeiru ho nia destinasaun maka Indonézia, maibé sasán ilísitu sira ne’e tenke tama lai mai territóriu timor liu husi arguidu nia kompañia JVK, hafoin maka arguidu haruka fali ba Indonézia liuhusi Kupang.

Arguidu mós haruka ona sasán ba Indonézia ho nia modelu hanesan dala tolu ona no sasán sira-ne’e mai husi sidadaun afrikanu ho inisiál VCO ba arguidu hafoin arguidu transforma fali sasán sira-ne’e ba Indonézia.

Arguidu simu sasán pakote mákina imprime (printer) ho marka Epson,  droga iha laran, iha loron 2 maiu 2019 husi sidadaun Afrika VCO. Nune’e, iha loron-ne’e kedas, arguidu tranfere  printer (droga) ne’e ba Indonézia liuhusi Motain, Atambua no ema ne’ebé maka lori mak kazál timoroan.

Ho aktu sira-ne’e hotu MP konsidera arguidu halo ho forma livre, deliberada no konsentimentu hatene momoos katak simu husi ema seluk (rede internasionál ) hodi rai no haruka ka transfere sasán ilísitu (droga), atu nune’e, arguidu arguidu bele hetan vantajen husi hahalok ilísitu ne’e, no arguidu halo duni hahalok sira-ne’e hanesan meiu ka instrumentu ida ne’ebé mak aptu no adekuadu.

Arguidu mós hatene hela katak hahalok ka konduta ne’ebé maka nia halo proibidu tuir lei penal. Tanba ne’e, MP promove arguidu JGB hanesan autoria materiál ba pratika krime 2,Tráfiku no atividade ilísitu tuir artigu 7 númeru 1 no krime Asosiasaun Kriminoza tuir artigu 10 númeru 1, hUsi lei númeru 2/2017, kona-ba kombate Tráfiku Ilísitu, ho forma konsumada, ho nia agravasaun tuir artigu 9 alínea E,K husi lei ne’ebé mak hanesan.

Jornalista   : Nelson de Sousa

Editór        : Francisco Simões

HAKEREK NO HATÁN

Please enter your comment!
Please enter your name here