DILI, 02 jullu 2020 (TATOLI) – Ambiente iha Universidade da Paz (UNPAZ) ne’ebé to’o oras ne’e seidauk iha paz tanba konflitu, foin lalais ne’e, obriga Komandu Polísia Nasionál Timor-Leste (PNTL) tenke toma medida intervensaun. Ho nune’e, Komandu Jerál PNTL orienta ona Komandu Polísia Munisípiu Dili atu monta postu seguransa polísia nian iha arredores UNPAZ.
Notísia Relevante : Kazu Insidente iha UNPAZ La Afeta ba Prosesu Aprendizajen
Komandante Jerál PNTL, Komisáriu Faustino da Costa, preokupa tebes ho kazu tuda malu entre grupu família matebian Hendrique Maia Soares ho estudante sira UNPAZ nian iha UNPAZ kontinua akontese loron no kalan.
“Situasaun ida ne’e agora ita haree ona koordena ho korpu dosente sira hodi orienta komandu Munisípiu Dili atu bele monta seguransa para garante seguransa,” afirma Komisáriu Polísia Faustino da Costa, ohin, ba jornalista iha Komandu Polísia Munisípiu Dili.
Komandu PNTL husu ba família vítima atu koopera ho autoridade seguransa no parte lideransa sira hosi UNPAZ hodi evita konfrontasaun entre grupu hasoru lideransa no estudante UNPAZ.
Iha fatin hanesan, Komandante Munisípiu Dili, Superintendente Xefe, Hedrique da Costa, afirma sira-nia parte orienta ona ekipa seguransa hodi asegura konflitu entre grupu família matebian hasoru lideransa sira iha UNPAZ.
Komandante Hendrique dehan, nia parte la tolera kualkér kazu krime atu akontese iha kapitál Dili, maibé buka esforsu atu haklaken dame iha bairru hotu- hotu hodi kontribui ba dezenvolvimentu no moris hakmatek povu nian.
“Ha’u hakarak povu Dili bele moris ho seguru liuhosi kooperasaun servisu autoridade suku no parseiru sira hotu hanesan prezidente autoridade, universitáriu sira atu kria paz no dame iha Dili,” nia hateten.
Komandante ne’e promete sei tun direita ba fatin konflitu hodi halo intervensaun para buka diálogu entre grupu sira ne’ebé envolve iha konfrontasaun.
Komandu Polísia Munisípiu Dili rasik rejista kazu provokasaun tuda malu entre grupu juventude iha arredores UNPAZ rezulta vítima katuas ida kanek no parte PNTL too kedas fatin hodi halo intervensaun no akalma situasaun.
Jornalista : Eugénio Pereira
Editór : Francisco Simões
