Prezidente KIESP-TL no Atuál Reitór IOB, Augusto Soares. Imajen/Evaristo Soares Martins.

DILI, 08 jullu 2020 (TATOLI)—Universidade hamutuk 10 ne’ebé hamahon-aan iha Klibur Instituisaun Superiór Privadu Timor-Leste (KIESP-TL) hato’o proposta 10 ho montante orsamentu millaun $5.8 ba Parlamentu Nasionál (PN) liuhosi Komisaun G ne’ebé trata asuntu Edukasaun, Juventude, Kultura no Sidadania, atu konsidera iha Orsamentu Jerál Estadu (OJE) 2020.

Notísia Relevante: Governu Diskute Ona Proposta KIESP-TL

Prezidente KIESP-TL atuál Reitór IOB, Augusto Soares, lidera Ensinu Superiór Privadu hamutuk 10 hala’o audiénsia ho Komisaun G hodi hato’o preokupasaun ne’ebé durante ne’e hasoru hodi ajuda Governu liuhosi dezenvolvimentu rekursu umanu iha rai ida-ne’e.

“Ami-nia proposta hamutuk 10 mak hanesan fó bolsu estudu ba ami-nia dosente sira, ami husu bolsu estudu ba ami-nia estudante sira, husu subsídiu salariál ba ami-nia dosente sira, husu fasilidade laboratóriu hanesan internete, komputadór no ami husu subsídiu kona-ba impréstimu ne’ebé ho funan kiik nune’e ami bele dezenvolve ami-nia instituisaun. Ami-nia proposta hamutuk orsamentu millaun $5.8 ba Ensinu Superiór Privadu 10,” dehan Augusto Soares ba jornalista sira hafoin finaliza audiénsia públika ho Komisaun G, iha Parlamentu Nasionál, kuarta ne’e.

Reitór IOB ne’e hateten, kada tinan Governu prevee orsamentu UNTL millaun nian $11 to’o millaun $13 entaun bele mós konsidera ensinu superiór privadu sira.

Prezidente KIESP-TL ne’e fó-sai, estudante ne’ebé oras ne’e iha Ensinu Superiór Privadu 10 hamutuk rihun 45 no dosente hamutuk rihun rua (2).

“Tanba ne’e mak ami lori proposta hato’o ba deputadu sira hanesan liman, ain no tilun povu nian, atu nune’e konsdera ami-nia proposta ne’e tau iha proposta Orsamentu Jerál Estadu para tulun ami ensinu superiór privadu sira. Labele haree de’it mak ensinu superiór públiku maibé bele mós konsidera ensinu superiór privadu, ne’ebe sai parseiru importante ba dezenvolvimentu iha nasaun Timor-Leste,” Reitór IOB ne’e propoin.

Nia akresenta, proposta ne’e rasik hatama ona ba Gabinete Primeiru-Ministru (GPM), Ministériu Ensinu Superiór, Siénsia no Kultura (MESSK), Prezidente Repúblika no Prezidente Parlamentu Nasionál.

“Agora, ami hakbesik-aan ba nai deputadu no deputada sira para rona ami-nia preokupasaun ne’e. Kuandu proposta Orsamentu Jerál Estadu 2020, se lae bele konsidera iha 2021, nia dehan.

 Jornalista : Evaristo Soares Martins

Editór         :  Cancio Ximenes

HAKEREK NO HATÁN

Please enter your comment!
Please enter your name here