Ajente Polísia ho inisiál FSF baku joventuda ida iha Eskuadra Polísia Atabae, Bobonaro. Imajen/Screen shoot husi video ne’ebé viral iha Facebook

DILI, 08 jullu 2020 (TATOLI)- Komandu Polísia Nasionál Timor-Leste (PNTL) kondena aktu violénsia fíziku ne’ebé halo hosi Ajente Polísia ida ho inisiál F hasoru juventude ida  ho inisiál AB, foin lalais ne’e, iha Eskuadra Polísia Postu Administrativu Atabae, Munisípiu Bobonaro.

Liuhusi video ho durasaun 0:37 minutu ne’ebé viral iha rede sosiál Facebook dezde loron 07 jullu to’o agora, ajente Polísia ida ho nervozu maka’as tuku no tebe juventude ida ne’ebé deskonfia polísia halo detensaun ba nia tanba komete kazu balun.

Segundu Komandante Jerál PNTL, Komisáriu Mateus Fernandes, lamenta bainhira haree aktu violénsia ne’ebé ajente  polísia F rasik ne’ebé viral ona iha Facebook.

Mateus Fernandes hateten, parte Komandu PNTL hein hela relatóriu investigasaun hosi Komandu Polísia Munisípiu Bobonaro nian.

“Ita sei hein rezultadu investigasaun kona-ba motivu loloos tanba saída maka iha agresaun fíziku,” hateten Komisáriu Mateus Fernandes, ohin, ba jornalista iha Sentru Formasaun Polísia, Comoro, Dili.

Mateus konsidera aktu violénsia fíziku ne’e kontra regra, tanba polísia halo servisu atu respeita mós sidadaun sira nia direitu umanu.

“Aktu ida hanesan ne’e kontra regra dixiplinár polísia nian, tanba se investiga maka nia halo duni motivu violénsia hanesan ne’e, nia tenke simu konsekuénsia tuir lei dixiplinár,” Mateus Fernandes hateten.

Iha parte seluk, Komandante Polísia Munisípiu Bobonaro, Superientendente Xefe Octavio de Araújo, informa kazu ne’e sira-nia parte loke ona investigasaun hasoru Ajente Polísia ho inisiál  F hodi buka hatene motivu loloos baku joven ne’e.

“Ajente ne’e agora ha’u halo ona xamada agora submete ona ba Komandu Munisípiu Bobonaro hodi halo hela prosesu investigasaun kle’an,” nia hatete.

Nia dehan, razaun ajente polísia ne’e baku juventude  ho inisiál AB, tanba deskonfia envolve iha kazu krime balun ne’ebé akontese iha Munisípiu Liquiça, ikus mai suspeitu halai ba Atabae nian maka polísia kaer.

Nia hatutan, membru polísia ne’e agora Komandu Polísia Munisipiu Bobonaro sei halo hela investigasaun hodi aprezenta relatóriu ba Komandu Jerál PNTL.

Jornalista   : Eugénio Pereira

Editór        : Francisco Simões

HAKEREK NO HATÁN

Please enter your comment!
Please enter your name here