Diretór Jerál Indústria MTKI, António da Costa.

DILI, 15 novembru 2019 (TATOLI) – Ministériu Turizmu Komérsiu no Indústria (MTKI) liuhosi Diresaun Jerál Industria aprezenta projetu ida atu halo estudu viabilidade ba parke industriál, ne’ebé hetan aprovasaun hosi reuniaun ordinária Konsellu Administrasaun ba Fundu Infraestrutura (CAFI, sigla portugés), iha Ministériu Finansa, Aitarak-Laran, ohin.

Diretór Jerál Indústria, António da Costa, informa projetu ne’e hetan ona aprovasaun, nune’e MTKI bele halo ona estudu viabilidade parke industriál iha Liquiça iha área suku Vatuovou, atubele prepara kondisaun, nune’e bele atrai investidór sira mai investe iha Timor-Leste.

“Investidór sira durante ne’e mai haree fatin, bainhira sira fila, sira nunka mai fali, ida ne’e maka ita presiza haree prioridade oinsá kria kondisaun atu ita bele atrai investidór sira”, salienta António da Costa.

Termu referénsia, parte MTKI submete ona ba Ajénsia Dezenvolvimentu Nasionál (ADN) atu modifika no iha diskusaun ohin, hetan ona aprovasaun no MTKI prontu atu serbisu hodi realiza duni programa 2020 to’o 2022.

Parke industriál lokaliza iha Vatuovou, zona ne’ebé prepara atu sai zona indústria, hahú hosi Tibar to’o Loes, tanba área iha kondisaun espasu no sai pilotu dahuluk, hafoin haree fali fatin seluk.

Notísia relevante : 2020, Governu Konstrui Parke Industriál iha Likisá

Jornalista : Zezito Silva        
Editora : Maria Auxiliadora     

HAKEREK NO HATÁN

Please enter your comment!
Please enter your name here