Prezidente CCLN, Vidal de Jesus 'Riak Leman’. Imajen Tatoli/António Gonçalves

DILI, 06 jullu 2010 (TATOLI) – Kongresu Nasionál Veteranu Kombatente Libertasaun Nasionál iha loron 21 dezembru 2019 estabelese ona estrutura Konsellu Kombatente Libertasaun Nasionál (CCLN, sigla portugés) ba períodu 2019 to’o 2024, maibé to’o oras ne’e konsellu seidauk iha edifísiu própriu atu hala’o serbisu.

Prezidente Administrasaun CCLN, Vidal de Jesus ‘Riak Leman’ ho ninia ekipa hasoru malu ho Primeiru-Ministru (PM), Taur Matan Ruak, hodi ko’alia kona-ba edifísiu ba konsellu ne’e.

“Ami reprezenta Konsellu Kombatente Libertasaun Nasional, mai hasoru Primeiru-Ministru hodi ko’alia kona-ba konsellu laiha fatin hodi hala’o servisu, maibé agora ami iha garantia ona tanba Primeiru-Ministru dehan katak deside ona fatin ba konsellu ba halo serbisu iha Arte Moris Comoro,” tenik Riak Leman hafoin ramata enkontru ho Xefe Governu iha Palásiu Governu, segunda ne’e.

Antes atu muda, fatin ne’ebé deside sai edifísiu ba CCLN sei hadi’a didi’ak tanba fatin ne’e nia kondisaun ladún di’ak.

“Tanba fatin ne’e nia kondisaun seidauk di’ak, konsellu sei hadi’a no Estadu mós sei ba ko’alia ho grupu ne’ebé hela iha fatin refere hodi muda ba fatin seluk maka konsellu bele uza fali,” nia akresenta.

Riak Leman subliña, konsellu presiza tebes fatin atu halo servisu, tanba durante ne’e laiha fatin.

Reuniaun ne’e mós hato’o atividade CCLN nian ba Xefe Governu hanesan atu rezolve kestaun ne’ebé ligadu ho veteranu.

Jornalista: Antónia Gusmão

Editora: Julia Chatarina

HAKEREK NO HATÁN

Please enter your comment!
Please enter your name here