SECOMS, Mericio Akara.Imajen/Antonio Goncalves

DILI, 06 jullu 2020 (TATOLI)–Sekretáriu Estadu Komunikasaun Sosiál (SECOMS, Sigla potugés), Mericio Juvinál ‘Akara’, kontinua fó motivasaun ba timoroan sira atu labele iha kapasidade atu ko’alia de’it maibé iha kapasidade atu hakerek no hakerek.

Notísia Relevante: Governu Apresia ba Profesór Timoroan Na’in-2 Hakerek Livru Biolojia

Akara hatutan, hosi parte SECOMS hakarak enkorja no hahú halo diskusaun kona-ba desiminasaun informasaun hodi motiva ema oinsá atu hakerek no oinsá Governu atu fasilta mós.

“Ita rekonese katak ita timoroan mós badinas, matenek no iha kapasidade hodi konta istória ne’e, la halai ka la hakiduk maibé oinsá atu hakerek sai livru ida-ne’e, laiha. Hanesan Estadu no Governu atu motiva katak timoroan atu labele iha kapasidade atu ko’alia de’it maibé iha kapasidade mós atu hakerek,” dehan Sekretáriu Estadu Komuikasaun Sosiál, Mericio Juvinál ‘Akara’, ba jornalista sira hafoin hala’o lansamentu livru Livru Bioloia,  Manuál de Resumos, iha Ensinu Sekundária São Pedro, Comoro, Dili, segunda ne’e.

Nia hateten, iha kondisaun atuál ne’e susar duni tanba bainhira hakerek ne’e sé mak atu prodúz no sé mak atu sosa. Karik prodús, presiza osan no buat sira-ne’e foti hosi ne’ebé, ida-ne’e mak sai problema boot.

“Entaun, Governu tenke marka nia prezensa iha difikuldade hirak ne’e ho instituisaun sira hanesan ita-nia amu padre no diretór eskola sira, atu nune’e parte hotu bele kolabora ho sira no fasilita sira,” nia informa.

Oinsá Governu nia polítika ba timoroan hakerek-na’in sira, Akara hatán, politika Governu nian mak Governu hahú deskute atu oinsá mak bele falisita timoroan sira-nia kreatividade hakerek no prodús livru ba eskola sira.

“Ha’u sei transmite informasaun ida-ne’e ba parte kompetente sira bainhira iha Konsellu Ministru. Nune’e, agora ba oin, ita tenke hakerek no prodús mesak livru ho ita-nia lingua rasik, ita labele depedénsia liu ba livru hosi rai liur. Tenke diminui ona livru importasaun,” nia hateten. 

Sekretáriu Estadu ne’e hateten, hakerek no prodús livru ne’e importante tebes tanba hakerek istória hodi transmite ba públiku sira labele rai iha ulun de’it.

“Ita-boot sira iha kapasidade úniku tanba ema hotu la’ós iha hotu kapasidade hakerek no prodús livru hanesan ne’e. Ho ne’e, imi kontinua hakerek bá. Ha’u hatene imi-nia difukuldade iha maibé labele sente mesak tanba Governu nafatin suporta no apoiu ita-boot sira,” nia dehan. 

Nia hateten, produsaun ba livru ne’e importante iha setór edukasaun nian tanba ho livru mak ema bele koñese mundu no koñese ita-nia-aan, tanba ne’e prodúz livru ne’e importante no kontinua sai inspirasaun ba ema seluk.

Jornalista : Osória Marques

Editór     :  Cancio Xiemens

HAKEREK NO HATÁN

Please enter your comment!
Please enter your name here