SECOMS Mericio Juvinal "Akara" hala'o lansamentu ba Livro Biolojia, Manual de Resumos, iha Eskola Sekundaria Privadu Sao Pedro Comoro. Imajen/Antonio Gincalves.

DILI, 06 jullu 2020 (TATOLI)–Governu liuhosi Sekretáriu Estadu Komunikasaun Sosiál (SECOMS, sigla portugés), Mericio Juvinál ‘Akara’, ohin, lansa livru Biolojia, Manuál de Resumos, ba 10o-12o anu ba Ensinu Sekundária sira.

Iha lansamentu ne’e, Mericio  Akara apresia tebes ba profesór timoroan na’in-rua (2) ne’ebé mak hakerek (prodús) livru Biolojia (Manualde Resumos) no mós ba Diretór Eskola inklui ho padre sira ne’ebé mak fó apoiu morál no motiva sira hodi realiza duni lansamentu ba livru ne’e.

“Ha’u hakarak reprezenta VIII Governu Konstitusionál nia naran hodi apresia profesór timoroan na’in-rua (2) ne’ebé mak iha inisiativa rasik hodi hakerek no prodús livru Bilojia, Manual de Resumos, ba ba 10o-12o anu sira,” dehan Sekretáriu Estadu Komuikasaun Sosiál, Mericio Juvinál ‘Akara’, ba jornalista sira hafoin hala’o lansamentu livru Biolojia iha Salaun Eskola São Pedro, Comoro, Dili, segunda ne’e.

Tuir Akara, hein katak ho esforsu no inisiativa ne’e bele enokoraja no motiva profesór sira seluk nia-inspirasaun hodi hakerek livru ba estudante sira iha eskola.

“Espera katak ho ida-ne’e bele inspira timoroan sira seluk hodi hahú hakerek atu sai referénsia ba ita-nia estudante sira hotu iha Timor. Depois lansamentu ba oin, ita hahú ona hanoin no oinsá kolabora atu livru sira-ne’e bele distribui ba fatin hotu, liuliu eskola hirak ne’ebé mak iha área rurál sira,” nia hateten. 

Tanba ne’e, Akara dehan sei ko’alia asuntu ne’e ho Ministeriu Edukasaun Juventude no Desportu (MEJD) atu fó atensaun ba livru ne’ebé mak timoroan sira hakerek rasik no prodús ona.

“Duké ita hein importa ema-nia livru barak mai, ho prosesu ida ne’ebé mak presiza tradús tan ho lingua oin-oin. Tanba ne’e mak ita tenke hahú fasilita timoroan nia kreatividade hakerek ne’e,” nia dehan. 

Akara hateten, sei ko’alia ho Ministeriu Edukasaun, Juventude no Desportu (MEJD) atu oinsá teknikamnete ba oin ne’e bele fó apoia.

“Maibé SeCOMS nia parte mak oinsá loke sentru komunikasaun sira iha nivél suku no atividade balun mak ita hakrak promove mak bibleoteka komunitáriu. Entaun, ami hanoin atu kontinua kolabora atu livru sira-ne’e bele to’o iha sentru livru no bele tama iha bibleoteka komunitáriu, nune’e ita-nia alin sira bele lee,” nia esplika. 

Jornalsita : Osória Marques

Editór       : Cancio Xiemens

HAKEREK NO HATÁN

Please enter your comment!
Please enter your name here