Eis Komandante Polísia Munisípiu Dili, Superintendente Xefe, Armando Monteiro entrega bandeira PNTL ba Komandante Polísia Munisípiu Dili foun, Superintendente Xefe, Hendrique da Costa, iha Komandu PNTL, Caicoli, Dili, kinta (02/07/2020). Imajen/Eugénio Pereira

DILI, 06 jullu 2020 (TATOLI)- Komandu Polísia Nasionál Timor-Leste (PNTL), Munisípiu Dili, hahú daudaun ona halo konsultasaun ba programa hametin paz no estabilidade iha Dili laran.

Notísia Relevante : Janeiru-Jullu, Polísia Dili Rejista Kazu 748

Komandante PNTL Munisípiu Dili, Superintendente Xefe Hendrique da Costa ho nia ekipa, ohin, halo  uluk konsultasaun ho Prezidente Autoridade Munisípiu Dili (PAMD), Gaspar Soares no nia estrutura hodi halo introdusaun ba programa hametin paz no estabilidade iha Dili laran.

“Ida ne’e primeiru enkontru koordenasaun ba ha’u hanesan komandante foun Munisípiu Dili hodi halo koordenasaun servisu ne’ebé ita fahe mós informasaun jerál kona-ba situasaun saida maka akontese iha Dili hodi ita prontu servisu hamutuk haree liu ba koordenasaun servisu promove paz no estabilidade iha munisípiu Dili,” informa  Komandante Polísia Munisípiu Dili, Hendrique  da Costa, ba jornalista iha ámbitu konsultasaun ne’e.

Hendrique dehan, Dili nu’udar kapitál nasaun Timor-Leste atu hetan paz, polisia labele servisu mesak, maibé tenke kria kooperasaun  di’ak ho autoridade suku, juventude, veteranu no lider Igreja sira inklui organizasaun hotu- hotu.

“Ita hakarak kria ita nia ligasaun di’ak ho parte hotu-hotu hodi garante seguransa iha Dili,” Superintendente Xefe Hendrique da Costa hateten.

Nia argumenta katak atu lori Dili sai kapitál ba dame presiza tebes ema hotu- hotu ninia komportamentu di’ak iha bairru sira hodi haklaken nafatin dame nu’udar xave ba susesu dezenvolvimentu nasaun Timor-Leste.

Daudaun ne’e membru PNTL hamutuk 400 koloka iha área jurizdisaun Dili servisu maka’as durante oras 24 nia laran hodi garante paz no kombate kazu krime sira iha Dili laran.

PNTL no AMD mós sei kontinua servisu hamutuk oinsá halo kontrolu ba movimentu sidadaun sira inklui estudante ne’ebé hahú atividade eskola atu kumpre nafatin regra hodi uza máskara no kumpre ba orientasaun sira Ministériu Saúde ho Organizasaun Mundial Saúde (OMS) kona-ba prevensaun surtu Coronavirus ka COVID-19.

Iha fatin hanesan, Prezidente Autoridade Munisípiu Dili (AMD), Gaspar Soares deklara, sira-nia parte prontu koopera nafatin ho Komandu Polísia Munisípiu Dili iha servisu hotu-hotu ne’ebé bele garante paz no hakmatek ba abitante sira iha kapitál Dili.

Autoridade Munisípiu Dili mós hato’o agradese ba kooperasaun servisu ne’ebé uluk hala’o ona ho eis Komandante Polísia Munisípiu Dili, Superintendente Xefe, Armando Monteiro, ne’ebé ho ekipa servisu maka’as ho AMD sosializa regra prevensaun ba surtu Coronavirus ka COVID-19 durante implementasaun Estadu Emerjénsia (EE)  to’o remata.

Jornalista   : Eugénio Pereira

Editór        : Francisco Simões

HAKEREK NO HATÁN

Please enter your comment!
Please enter your name here