Komandante PNTL Munisípiu Dili, Superintendente Xefe Hendrique da Costa. Imajen/Eugénio Pereira

DILI, 06 jullu 2020 (TATOLI)- Durante  janeiru too jullu 2020, Komandu Polísia Munisípiu Dili rejista kazu hamutuk 748 maka akontese iha área jurizdisaun Munisípiu Dili nian.

Notísia Relevante : Kazu UNPAZ, Tribunál Aplika Aprezentasaun Periódika Ba Arguidu 16

Komandante Polísia Munisípiu Dili, Superintendente Xefe, Hendrique da Costa, informa hosi kazu 748 ne’e balun ninia prosesu aprezenta ona ba Ministériu Públiku no hein julgamentu iha Tribunál Distritál Dili  (TDD) no kazu krime balun sei pendente hela, tanba prosesu investigasaun seidauk remata.

“Entre kazu sira ne’e, iha kazu ba TDD aplika ona prizaun preventiva ba suspeitu sira, kazu balun suspeitu sira hetan TIR (Termu Identidade Rezidénsia) no kazu seluk tan hanesan ofensa integridade fíziku, violasaun doméstika no kazu krime balun tan,” informa Superintendente Henrique ba jornalista, ohin, iha edifísiu Prezidente Autoridade Munisípiu Dili.

Tuir dadus estatístika Komandu Dili nian kazu númeru boot liu maka ofensa integridade fíziku, ne’ebé akontese maka’as iha kapitál Dili.

Iha parte seluk, Komandante Henrique dehan, nia parte sei koordena ho Ministériu Públiku atu bele husu autorizasaun ba Tribunál Distritál Dili atu bele fó autorizasaun hodi loke prosesu leilaun ba motór, karreta, sasán evidénsia sira seluk tan ne’ebé PNTL halo apreensaun.

Sasán hirak ne’e PNTL halo apreensaun hahú kedas tinan 2000 too agora ninia prosesu ba kazu hotu ona, maibé na’in ba sasán hirak ne’e too agora la ba foti hodi halo sasán rai nakonu iha arredores Komandu Polísia Dili.

 “Motór no karreta barak maka rai butuk iha ne’ebá balun liga ho kazu krime, agora atu fó fila evidénsia sira ne’e ba na’in la’ós kompeténsia polísia nian maka atu deside, maibé ne’e kompeténsia ba Ministériu Públiku,” Hendrique esplika.

Kontinua Investiga Kazu UNPAZ

Iha parte seluk, Komandante Henrique dehan, parte investigadór inklui intelijénsia sira too agora sei kontinua halo nafatin investigasaun kle’an atu bele deskobre motivu hosi kazu krime ne’ebé akontese iha arredores Universidade da Paz (UNPAZ) hodi rezulta vítima Henrique Maia Soares (tinan 21) mate fatin.

Nia hatutan, kona-ba rezultadu autópsia ne’e parte Ministériu Públiku maka bele fó sai, bainhira kazu ne’e prosesa ona Tribunál Distritál Dili.

“Prosesu investigasaun ba kazu ida ne’e la remata sei kontinua nafatin, tanba iha sasin lubuk ida maka halo ona aprezentasaun, maibé ha’u hakarak dehan katak, ninia prosesu investigasaun ba krime sei kontinua ba oin,” nia hateten.

Antes ne’e, família no inan-rasik hosi matebian, Domingas Soares Maia husu atu PNTL investiga didi’ak kazu ne’e, tanba família deskonfia iha estudante balun maka oho vítima no soe hosi andár leten UNPAZ nian.

Jornalista   : Eugénio Pereira

Editór        : Francisco Simões

 

 

HAKEREK NO HATÁN

Please enter your comment!
Please enter your name here