Komandante Jerál PNTL, Komísariu Faustino da Costa ho Segundu Komandante Komísariu Mateus Fernandes. Imajen/Antonio Goncalves

DILI, 06 jullu 2020 (TATOLI)- Komandante Jerál Polísia Nasionál Timor-Leste (PNTL), Komisáriu Faustino da Costa, deklara zero toleránsia ba komandante Polísia sira ne’ebé halo juramentu ba organizasaun grupu arte marsiál (GAM).

Notísia Relevante : Komandu PNTL Simu Ona Lista Kona-ba Komandante Balun “Juramentu” Ba GAM

Komisáriu Faustino da Costa hateten Komandu PNTL  kontinua halo hela prosesu investigasaun ba  komandante polisia balun ne’ebé halo juramentu GAM ne’ebé pertense ba partidu polítiku balun.

“Komandu ninia kompeténsia haree hela prosesu sira ne’e ba oin. Klaru, komandu PNTL sei haree tuir regulamentu polísia nian ne’e zero toleránsia ba envolvimentu iha arte marsiál, loos duni arte marsiál loke fali, mais la signifika polísia atu envolve fali,” afirma Komisáriu Faustino da Costa, ba jornalista, hafoin enkontru ho Primeiru-Ministru, Taur Matan Ruak, ohin,  iha Palaçio do  Governo, Dili.

Kona-ba lista naran, komandante polísia ne’ebé ba halo juramentu subar iha partidu polítiku sira, Komisáriu Faustino, seidauk bele pronunsia  tanba sei hein prosesu investigasaun.

Iha parte seluk, Komisáriu Faustino no Segundu Komandante Jerál, Komisáriu Mateus Fernandes mós konvida Primeiru-Ministru nu’udar mós Ministru Interiór, Taur Matan Ruak, atu halo vizita ba Komandu Jerál Polísia Nasionál Timor-Leste hodi halo enkontru ho komandante PNTL munisípiu hotu- hotu no hato’o mensajen ba komandante sira oinsá kontinua asegura dame no estabilidade iha Timor-Leste.

“Ami diskute ajenda rua, ida kona-ba preparasaun simu vizita Primeiru-Ministru ba Komandu Jerál PNTL no asuntu segundu maka diskute kona-ba sitasaun balun kona-ba iha ministériu nian no kona-ba ami nia ofisiál polísia balun,” Faustino da Costa informa.

Iha parte seluk, Komisáriu Faustino deklara daudaun ne’e Komandu PNTL mós aprezenta polítika ba PM Taur Matan Ruak kona-ba rotasaun servisu komandante iha munisípiu hotu- hotu ne’ebé hala’o ona.

Jornalista   : Eugénio Pereira

Editór        : Francisco Simões

1 KOMENTÁRIU

  1. Konkorda ho Komisariu nian hanoin, maibe presiza haree mos ba sira ne’ebe juramentu antes tiha ona molok sai polisia, ne’ebe dala barak la hatudu imparsialidade iha sira-nia atuasaun. Seujestaun ida mos maka, karik halo rekrurtamentu foun, ema ne’ebe jura ona ba arte marsial labele liu husi selesaun.

HAKEREK NO HATÁN

Please enter your comment!
Please enter your name here