Komandante Jerál PNTL, Komisáriu Faustino da Costa, kaer liman ho eis Komandante Polísia Munisípiu Dili, Superintendente Xefe Armando Monteiro atuál Komandante Polísia Munisípiu Baucau. Imajen/Eugénio Pereira

DILI, 02 jullu 2020 (TATOLI)- Komandante Jerál Polísia Nasionál Timor-Leste (PNTL), Komisáriu Faustino da Costa, deklara nia parte simu ona lista iha pesoál komandante superior polísia balun  ba halo juramentu ba Grupu Organizasaun Arte Marsiál (GAM) ne’ebé pertense ba partidu polítiku balun.

Notísia Relevante : Komisáriu Faustino da Costa Fó Pose Ofisiál Superior PNTL Na’in-25

Komisáriu Faustino  da Costa hateten, nia parte seidauk bele pronunsia naran ofisiais polísia balun ba jura iha GAM ne’ebé pertense ba partidu polítiku balun  tanba sei halo hela investigasaun profunda hodi hetan evidénsia forte atu submete tuir lei dixiplinár PNTL nian ba Konsellu Ministru.

“Ha’u iha ona provas ema sira-ne’e ita sei prosesa hotu kedas, ne’e la’ós ba partidu sira ne’ebé ita boot sira temi, iha ema ida na’in-rua ne’ebé komandu simu ona naran, agora sei husu sira justifika nune’e ka lae,” afirma  Komisáriu Faustino da Costa, ohin, ba jornalista iha Komandu Polísia Munisípiu Dili.

Ho lian maka’as, Komisáriu Faustino alerta ba membru komandante balun ne’ebé tama ba partidu polítiku tenke hatene katak, PNTL harii tuir Konstituisaun RDTL Artigu 147, katak, 1). Polisia ho Forsa Seguransa tenke defende legalidade demokrátika no garante seguransa interna ba sidadaun hotu no la inkilina ba partidu.

2). Prevensaun krime tenke bazeia ba respeitu direitus umanus no, 3). Lei maka determina regra no regulamentu ba polísia no forsa seguransa no forsa sira seluk.

“PNTL ne’e instituisaun Estadu ne’ebé la mete ba partidu ruma,” afirma Komisáriu Faustino da Costa hodi husu atu komandante no membru polísia sira atu evita aan envolve iha GAM, mezmu governu reativa ona atividade GAM.

“Labele interpreta sala Governu loke fali atividade grupu arte marsiál, ne’ebé polísia mós ba tama iha ne’ebá, ha’u dehan ida ne’e tanba, informasaun balun komesa treinu ona, Dili ne’e kloot ha’u hatene,” nia hateten.

Nia esplika, lei dixiplinár PNTL nian ne’ebé Konsellu Ministru aprova ona sai hanesan nehan kro’at ba PNTL atu uza hodi regula membru sira bainhira komete kazu no la kumpre regra no la respeita ierarkia.

Jornalista   : Eugénio Pereira

Editór        : Francisco Simões

1 KOMENTÁRIU

  1. Arte Marsial iha Timor-Leste ne’e aban bainrua sei sobu nasaun tanba ninia orientasaun ne’e laos ba kompetisaun maibe buka masa, ne’ebe ikus mai transforma an ba partidu. Desizaun Governu nian atu reativa fali sira-nia atividade ne’e hanesan rendisaun Estadu nian ba grupu sira-ne’e. Ida tan maka ita iha ona lei Arte Marsial nian, maibe ninia aplikasaun la iha tanba, GAM sira-ne’e ninia membru infiltra ona iha instituisaun Estadu nian sira hanesan Polisia, Forsa Armada ate tribunal sira. Pergunta maka ne’e, serake laho arte marsial Timor-Leste labele dezenvolve an hanesan nasaun ka?

HAKEREK NO HATÁN

Please enter your comment!
Please enter your name here