Deputadu sira hosi Komisaun A PN hala'o diskusaun ba LAC iha iha Mukit Guest House Aisirimou Aileu, sesta (03/07/2020). Imajen/Mídia CAC.

DILI, 05 jullu 2020 (TATOLI)-–Artigu 27 ne’ebé ko’alia kona-ba autoridade kompetente hosi titulu I Medidas Prevenção kapitulu II Rejime Deklarasaun Bens no Intereses,  sesaun II Autoridade Kompetenete, projetu-lei númeru 1/V/I-Lei Anti Corrupção (LAC) fó kompeténsia ba Instituisaun Comissão Anti Corrupação (CAC) mak simu deklarasaun propriedade no interese sira.

Notísia Relevante: LAC Sei Kriminaliza Partidu Polítiku Halo Kobransa ba Apoiante

Komissaun A Parlamentu Nasionál asuntu Konstitusionál no Justisa hamutuk ho entidade relevante sira diskute no aprova ona artigu ne’e, hamutuk ho artigu 24 seluk ne’ebé pertense ba projetu LAC titulu I Medidas Prevenção kapitulu II Rejime Deklarasaun Bens no Intereses.

Iha diskusaun ba artigu ne’e, iha Otél Uma Liurai Babulo Manufahi, 26 juñu tinan ne’e mosu diferensa ideia hosi deputadu sira no mós hosi entidade relevante sira, ne’ebé balun hakarak atu hili CAC mak sai hanesan órgaun ida-ne’ebé simu deklarasaun Bens no Interese maibé balun hakarak atu fó ba Tribunál mak responsabiliza asuntu ne’e.

Nune’e, iha intervensaun dahuluk, Asesór Prinsipál Gabinete Prezidenti Parlamentu Nasionál, José António das Neves ‘Samalarua’, propoin atu alende fó kompeténsia konsentra ba CAC de’it, bele mós fahe ba rua no ida ba tribunál supremu.

“Ita bele fahe hanesan hahú hosi diretór  jerál mai  kraik dirije ba CAC no sira seluk inklui kargu politiku sira ho órgaun soberania haat ne’e, dirije ba tribunál supremu atu halo ekilibriu. Se lae, CAC ninia funsaun bele todan liután,” Samalarua sujere.

Entretantu, Provedora Provedoria Direitus Humanus no Justisa (PDHJ), Jesuinha Gomes, konkorda ho proposta ne’ebé hato’o husi Samalarua, atu oinsá fahe servisu liuliu sira ne’ebé mak iha dirasaun administrasaun nian, fó ba CAC no sira seluk fó ba Tribunál Supremu atu bele hakmaan servisu.

Ideia hanesan mai hosi Diretór Nasionál Assessoria Jurídika no Lejislasaun (DNAJL sigla Portugés) Ministériu Justisa, Nelinho Vital, konkorda katak artigu ida-ne’e sei iha ligasaun ho artigu 28 kona-ba sé-sé mak atu ba deklara rikusoin, nune’e iha ne’eba sei inklui mós órgaun soberanu sira hanesan Prezidente Repúblika ho sira seluk tan.

“Tanba ne’e, ha’u sujere se bele fahe kompeténsia CAC ho Tribunál supremu mak simu deklarasaun bens no interes, atu nune’e servisu bele kamaan,” Nelinho mós propoin.

Iha biban hanesan, Komisariu Comissão Antí Corrupão (CAC), Sérgio Hornai, mós konkorda tebes ho ideia ida-ne’e  tanba haree liu ba efisiensia no efikasia servisu.

“Ha’u mós hanaoin ne’e loos tanba ita hakarak haree liu ba efisiensia no efikasia servisu atu labele iha desentralizasaun, nune’e diversa ita-ninia konsentrasaun. Ne’e asuntu ida-ne’ebé ita hotu tenke konsidera. Seluk maka, ami haree katak se iha sentralizasaun, iha kumulasaun de podér, ida-ne’e presiza rekursu ida-ne’ebé natoon atu bele fó resposta ne’ebé di’ak, ba konteúdu artigu ida-ne’e nian ezisténsia. Tanba ne’e mak ami mós tetu katak, ita halo lei ne’e la’ós tinan ida ka rua ita halo ona alterasaun, maibé ita halo lei ba tempu naruk,” nia fó hanoin.

Deputadu Patrocíno Fernandes iha hanoin seluk katak, fundamentu hosi lei ne’e mak atu kombate. Tanba ne’e, atu Prezidente Repúblika ka funsionáriu baibain ida mak komete kazu ne’e, entaun ne’e nafatin korrupsaun.

Tanba ne’e, deputadu ne’e iha deit opsaun ida katak bainhira hakarak entrega kompeténsia ba CAC, entaun husik CAC mak resposabiliza maibé bainhira hakarak atu fó fali kompeténsia ba Tribunál Supremu, entaun husik ba iha tribunál laos de’it, la presiza separa.

“Se ita ba separa fali, entaun ita loke fali interpretasaun oin seluk iha públiku. Separasaun ne’e ninia objetivu ne’e saida, ne’e bele loke marjen ba públiku ladún di’ak,” nia hateten.

Kona-ba kestaun efisiensia no efikasia servisu, fatin diak liu ona mak iha CAC, atu nune’e bele kontinua monitoriza no kontinua halo atuasaun karik iha duni kazu krime korrupsaun.

Tanba ne’e nia hatutan, estadu iha obrigasaun atu reforsa CAC iha kapasidade finanseiru no rekursu umanu, hodi responde preokupasaun sira-ne’e.

Ba asuntu ne’e, Deputadu Francisco Miranda Branco iha opiniaun kontrariu katak tenke konsentra ba  iha Ministériu Públiku, tanba bainhira Prezidente Repúblika mak halo korrupsaun ou funsionáriu baibain ida mak sei halo korrupsaun, ida-ne’e tenke iha tratamentu hanesan de’it.

“Tanba ne’e mak ita labele haree fali ninia nível autoridade tuir estrutura estadu ninian tanba komete kazu krime hanesan deit,”  Branco sujere.

Hosi parte Deputada Carmelita Caetano Moniz hakarak atu kompeténsia ne’e fó ba Tribunál de’it mak simu deklarasaun bens no interese tanba atu simu deklarasaun bens no interese ne’e presiza sistema, kria mekanizmu, liuhosi orsamentu.

“Tanba ne’e maka se ita harii órgaun rua atu haree de’it servisu ne’ebé hanesan, ita iha uitoan dúvida tanba ita sei iha interpretasaun diferente hosi públiku. Alende ne’e, ninia mekanizmu implementasaun mós dalaruma bele iha diferensa.  Liu tan ida-ne’e, ita sei presiza kustu ne’ebé boot liu, tanba ita tenke monta servisu hanesan ba órgaun rua. Entaun CAC ho PSIK mak ita haruka ba iha Tribunál tanba iha konflitu interese, no seluk ba iha CAC de’it, atu nia servisu ne’e uniforme ho orsamentu ne’e ida de’it. Tanba ne’e estadu presiza atu reforsa de’it mak ita entrega tomak ba tribunál tanba iha ona esperiénsia ba servisu ida-ne’e,” Carmelita sujere atu fó ba Tribunál.

Kona-ba asuntu hirak ne’e, Aasesór Juridiku Komisaun A PN,  Anildo da Cruz, hateten CAC de’it mak iha konflitu interese tanba nia labele monitoriza ninia aan rasik.

Nia dehan, bainhira hili modelu instituisaun ida de’it nia vantajen maka iha intensaun ida de’it ho nia aplikasaun ba lei ne’e ida de’it. Maibé, se iha instituisaun rua, ne’e iha intensaun rua no aplikasaun lei ne’e mos la hanesan no ida-ne’e sei kria problema ba nasaun.

Ho várias opiniaun ne’e, ikus mai Prezidente Komisaun A, Joaquim dos Santos, konklui katak hotu-hotu konkorda artigu ne’e fó kompeténsia tomak ba CAC hodi responsabiliza ka simu deklarasaun propriedade no interese, eseptu CAC mak sei ba deklara iha Tribunál tanba iha konflitu intereses.

Entretantu, artigu ne’e hakerek orijinál ho lian Portugés  ne’ebé seidauk iha tradusaun ofisiál ba lian Tetum hanesan tuir mai ne’e; Secção II, Autoridade Competente, Artigo 27Autoridade Competente;

  1. A Autoridade competente para receber e verificar as declarações é a Comissão Anti Corrupção, exceto quanto aos agentes públicos da Comissão Anti Corrupção, cuja declaração é recebida e verificada pelo Supremo Tribunál de Justiça.
  2. Sem prejuízo das demais competências previstas na presente lei, compete ainda à autoridade competente:
  3. Elaborar um guia com explicações sobre o preenchimento da declaração;
  4. Estabelecer um mecanismo de consulta por telephone ou por email, por meio do qual os declarantes podem esclarecer as suas dúvidas sobre o preenchimento da declaração e outras obrigações relacionadas com a declaração;
  5. A aplicação das sanções previstas na presente lei punidas com coimas;
  6. A autoridade competente produz um relatório estatístico bienal que contem:
  7. O número de pessoas obrigadas a declarer
  8. O número de pessoas que não apresentaram a declaração dentro do prazo;
  9. O número de pessoas que foram sancionadas administrativa, disciplinar ou penalmente, indicado a violação e a sanção aplicada;
  10. O número de pessoas cuja verificação da declaração conduziu a adoção de medidas para prevenir ou por fim a uma situação de conflito de interesse.

Jornalista : Cipriano Colo

Editór       :  Cancio Xiemens

HAKEREK NO HATÁN

Please enter your comment!
Please enter your name here