Asessór Prinsipál Gabinete Prezidente Parlamentu Nasionál, José António das Neves ‘Samalarua’, Imajen/Mídia CAC.

DILI, 04 jullu 2020 (TATOLI)–Lei Númeru 1/V/2019-Lei Antí Corrupção (LAC) iha kapitulu I, Medida Jerál Prevensaun, sesaun I estratejia nasionál artigu 5, la fó fatin ba partidu polítiku sira liuliu líder sira atu halo kobransa ba ninia apoiante sira.

Notísia Relevante: LAC Konvida Sosiedade Tomak atu Partisipa iha Medida Prevensaun

Bainhira líder partidu polítiku ne’ebé pratika estorsaun (kobransa) ba ninia militante hodi la promove integridade no akuntabilidade, maibé lori partidu polítiku atu benefisia ninia an rasik, autoridade judisiál sei kriminaliza ho LAC.

Artigu ne’e ninia testu orijinál hosi lian Portugés ne’ebé seidauk iha tradusaun ofisiál, hanesan tuir mai ne’e.

Artigu 50  Medidas Relativas  a Partido Politicos

Os partidos politicos têm a obrigação de promover o conhecimento e a conciencialização dos seus militantes e dirigentes sobre os riscos de corrupção, bem como têm a responsabilidade de adotar medidas de prevenção.

Artigu ne’e husu ba Lider partidu politiku sira iha Timor-Leste atu konsiensializa ninia militante sira atu labele halo kobransa  ba apoiantes partidu rasik ho osan no materiál ruma, tantu individu, grupu inklui emprezáriu sira atu sai membru governu, kargu polítika no kargu Xefia ruma iha ezérsisiu funsaun publika.

Durante diskusaun loron tolu (3) iha otél Uma-Liurai Suku Babulo, Manufahi, deputadu sira Komisaun A Parlamentu Nasional Asuntu Konstitusionál no Justisa hamutuk ho entidade relevante sira, diskute kle’an artigu ne’e, no konsege aprova hamutuk ho artigu 24 seluk husi Lei Númeru 1/V/2019-Lei Antí Corrupção (LAC) kapitulu I sesaun I.

Durante diskusaun Asesór Prinsipál Gabinete Prezidente Parlamentu Nasionál, José António das Neves ‘Samalarua’, fó nia hanoin katak meiu atu evita abuzu funsaun no podér pesoál ida iha partidu, ne’ebé lori partidu nian naran manan benefisiu ba nia aan rasik konsidera vulneravel tebes.

Tanba, Samalarua hateten, militante baibain ne’ebé  ho koñesimentu ladún kle’an ba partidu, sei la haree líder partidu halo kobransa illegál ne’e hanesan individu, afinál ba benefisiu privadu ema ida ka ema rua iha partidu laran.

“Ita koloka kestaun ne’e, atu bele foti  imajen partidu politiku sira sai di’ak, nune’e bainhira kaer ukun labele komete krime korrupsaun. Entaun, ita tenke tau regra preventiva ida atu evita ida-ne’e,” Samalarua hateten.

Nia hatutan, artigu ne’e mós sei  ajuda duni lider partidu politiku sira hodi halo jestaun di’ak ba ida-idak nia partidu hahú hosi interna no to’o públiku bainhira kaer ukun.

“Fundamentu katak, partidu politiku nia ezisténsia atu ba kaer podér iha estadu no diskusaun Lei Anti Corrupção  presiza atu formula didi’ak hodi prevene korrupsaun iha Estadu tomak. Partidu politiku órgaun importante ida-ne’ebé iha posibilidade atu ba kaer ukun. Ninia jestaun interna ladi’ak, reflete ninia kapasidade ba ukun. Tanba ne’e mak ita impoin medida preventiva ba partidu atu kumpre. Atu aumenta partidu politiku ida ninia kapasidade hakarak ukun ne’e, ukun ho kualidade,” Samalarua sujere.

Entretantu, Diretór Polísia Sientífika Investigasaun Kriminál (PSIK), Vicente Fernandes Brito hateten, iha elaborasaun artigu ne’e mós presiza konsidera lei finansiamentu partidu politiku sira tanba bainhira haree hosi estratejia kombate korrupsaun, Lei finansiamentu partidu politiku ne’e iha ligasaun direta ho vontade politika (political will), ne’ebé iha fontes proibidu mai hosi estranjeiru no mai hosi kompañia.

“Ita fó ezemplu katak ha’u hanesan emprezáriu ida, sei fó ajudu ba partidu ida ne’ebé mak ha’u espera bele kaer Governu. Entaun, ha’u fó kontribuisaun boot. Maibé, kuandu partidu ne’e kaer Governu, nia tenke hatene ha’u. Iha ne’e bele hamate vontade politika. Entaun, iha parte prevensaun ita tenke elabora,” nia dehan.

Se, nia hateten, Timor-Leste konsistente atu halo Lei Antí Korrupsaun, ita bele konstitui ba krime partidu sira ne’ebé mak halo kobransa ba ninia militante sira, tanba partidu ida hanesan ne’e mak hamate vontade politika.

“Ita bele elabora artigu ida kona-ba finansiamentu partidu politika, maibé kontrola atu nune’e ita-nia partidu sira bainhira kaer Governu ruma sira respeita finansas proibidu ne’ebé mak bele hetan no kuota militante sira mak labele,” nia sujere.

Diretór PSIK ne’e mós propoin, autoridade judisiál bele konstitui hodi hatene direta faktu no konstitui ba iha estorsaun (kobransa) bainhira partidu ida komesa organiza ho maneira kriminoja atu benefisia ninia aan ho osan nu’udár produtu krime.

“Partidu hotu-hotu iha ninian orgaun fiskalizadór. Bainhira ninia órgaun fiskalizadór ne’e hare katak ninia dirijente partidu husu kuota liu padraun atu benefisia nia aan, fiskalizadór partidu obrigadu atu fó hatene ba orgaun kompetente. Bainhira la fó hatene, bele hetan responsabilidade kriminál ne’ebé hatuur iha artigu 22 LAC kona-ba Denuncia de atos de corrupcao e medidas de prevenção,” Vicente hateten.

Aleinde ne’e, iha intervensaun, Deputada Carmelita Moniz, hamosu mós problema ida katak dirijente partidu ida laiha servisu permanente, laiha kompañia atu kaer obra ruma, maibé iha rikeja ne’ebé boot.

Deputada ne’e fó ezemplu katak, líder partidu politiku ida iha uma tolu to’o haat ho folin uma ida kuaze liu rihun $200, oinsá bele deskobre rikeja sira-ne’e.

Hatán ba asubut ne’e, Komisáriu Comissão Antí Corrupção (CAC), Sérgio Hornai, hateten kobransa ne’ebé halo hosi líder partidu ida  ba ninia militante iha termu legál hanaran enrikesimentu ilísitu.

Nia dehan, Bainhira ko’alia kona-ba koasaun, katak ema ida uza ninia direitu no dever ho ezazeradu atu bele obriga ema ne’e atu halo tuir nia vontade.

Kestaun ne’e, Sérgio esplika, tuir lei militante no apoiante ida bele sujeta ninia líder partidu politiku hodi halo denunsia, hato’o keixa ho hahalok ne’ebé lider partidu politiku halo liuhosi organizasaun atu impoin lider nia hakarak ba iha ema ne’e ho ninia finalidade ba interese Pesoál.

“Iha lei partidu politiku mós fó biban ba organizasaun interna ninian atu halo auditoria no mós halo fiskalizasaun. Hosi rezultadu deskobrimentu ne’ebé mak iha, obrigadu tenke halo publisidade ne’ebé hatuur iha Kapitulu I artigu 24–informacao e educacao publicas, bainhira fiskalizadór sira deskobre katak bele tau iha kauza. Fora hosi angariasaun sira ne’ebé mak partidu politiku sira halo, karik fundu mai hosi estranjeiru, iha futuru bele abita ba iha influensia se partidu ne’e kaer ukun. Entaun, ida-ne’e fó posibilidade boot iha partidu ida-ne’e bele administra Governu ho di’ak,” nia hateten.

Komisariu CAC ne’e rekoñese katak, artigu ne’e fó importánsia ba partidu polítiku nu’udár organizasaun politika ne’ebé ninia finalidade naun-lukrativa maibé ba interese públiku, hadau podér atu ukun hodi bele halo dezenvolvimentu ba interese públiku.

Sérgio fó hanoin, lei partidu politiku hatuur prinsípiu transparánsia iha ne’ebé husu atu partidu politiku sira tenke iha dever jerál no mós debver espesiál, atu halo akuntabilidade, fiskalizasaun ba iha aktu hotu-hotu, reseitas, angarias hotu-hotu ne’ebé tama iha konta bankária partidu politiku ninian,  annualmente tenke fó sai ba iha públika atu iha koñesimentu.

Komisáriu CAC ne’e mós foti referénsia ida katak iha lei no dekretu-lei Comissão Anti Corrupção, dekretu lei Númeru 23/2015 artigu 7, fó ba Diresaun Prevensaun no Sensibilizasaun Públiku hodi konsiensializa partidu polítiku sira sensivel ba iha situasaun kobransa ba militante sira atu hetan kargu xefia, evita irregularidade no pratika aat sira liuliu kobransa ilegal ba militante kontra lei.

Tanba ne’e, nia dehan, CAC  iha obrigasaun atu realiza, identifika no klasifika fatór sira ne’ebé iha poténsia no posibilidade atu tama ba iha korrupsaun, inklui partidu politiku sira to’o iha lider komunitáriu sira ne’ebé simu orsamentu direta ka indireta liuhosi Orsamentu Jerál Estadu.

“Partidus politiku sira sujeta ba iha orsamentu subensaun públika annualmente, tantu iha kampaña eleisaun prezidensiál, kampañia eleisaun parlamentár ninian. Tamba ne’e, tuir CAC konsidera artigu 5 fó enfaze kona-ba transparánsia no akuntabilidade ba iha informasaun sira,” nia subliña.

Hosi várias diskusaun ba artigu ne’e, ikus mai Komisaun A Parlamentu Nasionál liuhosi Prezidente Joaquim dos Santos “Borluli” desidi hodi aprova medidas relativas a partidos politicos hatuur klausula ne’e iha artigu 5 Kapitulu I no sei reforsa artigu 5 LAC iha Kapitulu III kona-ba Kriminalizasaun.

“Klausula ne’e mosu ona iha parte prevensaun nian, sei hamosu mós artigu ida iha Kapitulu III Kriminalizasaun (pembuktian terbalik-prova inversa),” Prezidenti Komisaun A PN Deputadu Joaquim dos Santos Borluli deside.

Deputadu sira husi Komisaun A Parlamentu Nasionál Asuntu Konstitusionais no Justisa ne’ebé partisipa iha dikusaun ne’e mak hanesan Prezidente Joaquim dos Santos, Vise Prezidente Francisco de Vasconcelos, Sekretáriu José Pacheco Soares, Membru Francisco Miranda Branco, Dário Madeira, Patrocíno Fernandes, Carmelita Moníz, Óscar de Araújo, António Nobre Amaral Tilman, no  Francisco David Xavier Carlos, eseptu Adriano do Nascimento la marka prezensa tanba kaondisaun saúde.

Entidade relevante sira ne’ebé partisipa mós iha diskusaun ne’e mak hanesan diretór Nasionál Assessoria Jurídika no Lejislasaun (DNAJL sigla Portugés) Ministériu Justisa Nelinho Vital, Estrutura CAC kompostu husi komisáriu Sérgio Hornai, Komisáriu Adjuntu Augusto Castro, ho Luis Sampaio, Diretór Jerál Prevensaun no Sensibilizasaun Rosário de Araújo, akompaña husi Asesora Jurídika Mariman Oliveira, Diretór Polisia Sientifika Investigasaun Kriminál (PSIK), Vicente F.Brito, provedora Provedoria Direitus Umanus no Justisa Jesuinha Gomes, asesór Prinsipál gabinete Prezidenti Parlamentu Nasionál José António das Neves ‘Samalarua’, Asessór Jurídiku Komissaun A Parlamentu Nasionál, Anildo da Cruz ho Pedro Andrade, Diretora Ezekutiva Organizasaun Naun Governamentál Programa Monitarizasaun ba Sistema judisiária (JSMP), Ana Paula Marçal, Reprezentante Grupu Feto Parlamentár Timor-Leste (GMPTL sigla Portugés).

Jornalista : Cipriano Colo

Editór       :  Cancio Ximenes

HAKEREK NO HATÁN

Please enter your comment!
Please enter your name here