Prezidente Parlamentu Nasional, Aniceto Longuinhos Guterres Lopez, .Imajen/Antonio Goncalves

AILEU, 04 jullu 2020 (TATOLI)–Prezidente Parlamentu Nasionál (PPN), Aniceto Longuinhos Guterres Lopez, konsidera deputadu sira hosi Komisaun A Parlamentu Nasionál (asuntu konstitusionál no justisa) ho entidade relevante sira ne’ebé oras ne’e diskute Lei Anti Corrupção (LAC), iha duni vontade no interese hodi aselera lei importante ne’e.

Notísia Relevante: Komisaun A Aprova Tan Kapítulu II LAC Rejime Deklarasaun Bens no Interese

Prezidente Parlamentu Nasionál hato’o konsiderasaun ne’e, hafoin partisipa diretamente diskusaun durante loron rua (3-4 jullu) iha diskusaun Lei Anti Corrupção ne’ebé hala’o iha Mukit Guest House Aisirimou, Aileu.

“Ha’u mai atu partisipa de’it iha diksuaun ne’e no ha’u haree katak deputadu sira, autoridade judisiál sira, ministériu públiku, hanesan autoridade kompetente atu kombate korrupsaun ne’e,  iha ne’e hotu. Ne’e hatudu katak, hotu-hotu iha interese, iha intervensun hotu-hotu ko’alia hanesan deputadu, iha direitu hanesan maski iha aprovasaun ne’e deputadu sira de’it mak iha direitu votu,” Aniceto Guterres hateten.

Prezidente PN ne’e mós observa, durante diskusaun ne’e iha partisipasaun ida ne’ebé di’ak tebes ne’ebé hatudu mós katak estadu tomak iha interese no komitmentu atu halo lei ida espesiál hodi  kombate korrupsaun nian iha Timor-Leste.

“Ida-ne’e mak Lei Anti Corrupção ne’ebé uluk bankada FRETILIN mak hola inisiativa no hetan apoiu mós hosi bankada Partidu Demokrátiku, agora prosesu la’o tinan rua ona, no ha’u hein katak mais tarde tinan ne’e tenke hetan aprovasaun no hetan ona promulgasaun hosi Prezidente Repúblika,” nia dehan. 

Líder másimu órgaun lejisladór ne’e observa katak tuir espetativa povu nian, públiku tomak nian katak, lei ida-ne’e importante tanba ne’e sei prosesu ne’e lais liu di’ak liután.

Deputadu sira husi Komisaun A Parlamentu Nasionál Asuntu Konstitusionais no Justisa ne’ebé partisipa iha dikusaun ne’e mak hanesan Prezidente Joaquim dos Santos, Vise Prezidente Francisco de Vasconcelos, Sekretáriu José Pacheco Soares, Membru Francisco Miranda Branco, Dário Madeira, Patrocíno Fernandes, Carmelita Moníz, Óscar de Araújo, António Nobre Amaral Tilman, no  Francisco David Xavier Carlos, eseptu Adriano do Nascimento la marka prezensa tanba kaondisaun saúde.

Entidade relevante sira ne’ebé partisipa mós iha diskusaun ne’e mak hanesan Vise Ministru Justisa, José Edmundo Caetano ho diretór Nasionál Assessoria Jurídika no Lejislasaun (DNAJL sigla Portugés) Ministériu Justisa Nelinho Vital, Adjuntu Prokuradór Jerál Repúblika Alfonso Lopez,  Estrutura KAK kompostu husi komisáriu Sérgio Hornai, Komisáriu Adjuntu Augusto Castro, ho Luis Sampaio, Diretór Jerál Prevensaun no Sensibilizasaun Rosário de Araújo, akompaña husi Asesora Jurídika Mariman Oliveira, Diretór Polisia Sientifika Investigasaun Kriminál (PSIK), Vicente F.Brito, provedora Provedoria Direitus Umanus no Justisa Jesuinha Gomes, Asessór Jurídiku Komissaun A Parlamentu Nasionál, Anildo da Cruz ho Pedro Andrade, Diretora Ezekutiva Organizasaun Naun Governamentál Programa Monitorizasaun ba Sistema judisiária (JSMP), Ana Paula Marçal, Reprezentante Grupu Feto Parlamentár Timor-Leste (GMPTL sigla Portugés).

Entretantu, progresu diskusaun Projetu Lei númeru 1/V/I- Lei Anti Corrupção (LAC), oras ne’e daudaun, Deputadu sira hosi Komisaun A Parlamentu Nasionál (PN), hamutuk ho entidade relevante sira liu-hosi diskusaun kle’an no konsege aprova ona kapítulu Primeiru (I), kona-ba medida Jerál Sira Prevensaun Nian, ho nia sesaun hitu (VII), ne’ebé kompostu husi artigu 25.

ALende ne’e, konsege finaliza no aprova tan titulu I medida kombate korrupsaun,  kapitulu  II kona-ba Rejime Deklarasaun Bens no Interese, ne’ebé iha sesaun VII ho nia artigu hamutuk 33.

Komisaun mós diskute ona lei krime korrupsaun nian, ne’ebé ho nia kapitulu hamutuk VI (neen), iha artigu hamutuk 47, no prosesu diskusaun ne’e, to’o ona kapitulu II kona-ba apresiasaun nian, to’o artigu 25.

Jornalista : Cipriano Colo

Editór        :  Cancio Ximenes

HAKEREK NO HATÁN

Please enter your comment!
Please enter your name here