Asessór Prinsipál Gabinete Prezidente Parlamentu Nasionál, José António das Neves ‘Samalarua’, Imajen/Mídia CAC.

AILEU, 04 jullu 2020 (TATOLI)–Asessór Prinsipál Gabinete Prezidente Parlamentu Nasionál, José António das Neves ‘Samalarua’, konsidera Lei Anti Corrupção (LAC) ne’ebé oras ne’e iha hela faze diskusaun, iha ninia konteúdu konvida sosiedade tomak atu partisipa ativamente iha medida prevensaun korrupsaun iha Timor-Leste (TL).

Notísia Relevante: PPN Konsidera Komisaun A ho Entidade Relevante Sira iha Interese Aselera LAC

“Lei ne’e konvida no enkoraja sosiedade tomak atu partisipa iha medida prevensaun ne’ebé la’ós medida ida ne’ebé restritu ka rigorozu, maibé fó hanoin atu halo sensibilizasaun, trava ema nia komportamnetu, trava ema nia hahalok ne’ebé halo ema monu ba krime korrupsaun. Ida-ne’e partisipasaun sosiedade tomak tenke iha. Tanba ne’e mak bainhira iha aprovasaun no Prezidente Repúblika promulga lei ne’e, ita iha avansu lubuk ida-ne’ebé makaas uitoan, atu hakat ba esforsu koletivu estadu tomak hodi halo prevensaun no kombate korrupsaun iha sosiedade Timor-Leste,” Samalarua esplika hafoin partisipa diskusaun LAC iha Mukit Guest House Aisirimou Aileu, sábadu ne’e.

Ho diskusaun no aprovasaun hosi lei ne’e rasik iha aban bainrua, Samalarua hein katak, autoridade kompetete sira iha kbiit boot liután.

“Kbiit rasik de’it la to’o maibé kbiit ne’ebé lei fó boot liután. Ida mesak mós sei la to’o nafatin, presiza apoia hosi entidade hotu no sosiedade tomak liuliu apoiu ho forsa politika sira. Ida-ne’e ita-nia espetativa tanba kombate korrupsaun iha mundu tomak, laiha órgaun ida rua mesak de’it no Governu mós labele hakmatek. Tanba Governu mós tenke partisipa ativamente, autoridade no órgaun judisiáriu sira, órgaun polisiál no sosiedade tomak kontribui,” nia sujere.

Tanba ne’e, nia hatutan, espetativa hosi lejisladór sira no entidade sira ne’ebé partisipa direta iha diskusaun no aprovasaun ida-ne’e, husu atu hotu-hotu book-aan mak bele halakon korrupsaun iha rai laran. Tanba balun tuur hare de’it, balun tuur ko’alia de’it, la kontribui ne’e, la di’ak.

“Tanba ne’e mak iha definisaun hosi lei ne’e, ko’alia buat lubuk ida liga ho setór públiku, balun liga ho setór privadu lukrativu, setór privadu ne’ebé la’ós lukrativu ho Organizasaun Naun Governamentál sira, asosiasaun sira, partidu polítiku sira, sira ne’e hotu tama iha medida preventiva,” Samalarua esplika.

Tuir nia, durante ne’e sosiedade tomak preokupa ho assuntu korrupsaun iha Timor-Leste no oras ne’e komisaun A ho entidade relevante sira tama ona iha faze ida atu dezenvolve tan medida sira hosi LAC ne’ebé mak iha komponente boot tolu mak hanesan medida preventiva ho nia espesifíkasaun ba iha deklarasaun de bens no interese, ho medida represiva.

“Baibain ita halo tiha ona maibé represiva barak liu. Tanba ne’e, agora ita reforsa tan medida preventiva ho deklarasaun de bens ba sidadaun sira ne’ebé kaer funsaun ho kargu públiku. Artigu sira ne’e seidauk ramata maibé to’o ona iha faze ida ita revee fali artigu sira ne’ebé mak iha kódigu penal. Depois hamoris tan artigu foun lubuk ida iha parte represiva investigasaun ninian ho artigu foun hanesan konflitu interese, fraude konstrusaun, korrupsaun iha setór privadu, sira ne’e tama tan hanesan artigu foun ne’ebé mak seidauk temi iha kódigu penal,” nia hateten.

Samalarua rekoñese, objetivu prinsipál hosi lei ne’e atu kompbate korrupsaun, nune’e iha konteúdu lei ne’e rasik  todan tanba krime organizadu no krime ne’ebé kompleksu ninia sansaun ne’e tenke todan duni.

“Ninia todan ida-ne’e rekere mós instituisaun ka órgaun kompetente sira, tenke hakbiit aan, liuliu  pesoál tekniku sira ne’ebé servisu iha área kombate korrupsaun nian tenke iha integridade profisionál, étika, morál, ne’e hanesan bagazen (bekal) ne’ebé kualkér autoridade ida ne’ebé halo servisu iha área ida ne’e tenke iha. Maibé, presiza apoiu tékniku, apoiu finanseiru tanba fasilidade ne’ebé mak presiza uza hodi halo medida prevensaun no medidas represiva ne’e karun tebes no mós buat balun ne’ebé mak ita labele sosa iha Timor,” nia dehan.

Nia fó ezemplu hanesan iha parte investigasaun nian, autoridade direta ida mak CAC, koordena ho óragaun polisiál, koordena ho ministériu públiku, koordena ho tribunál no sosiedade tomak.

“Koordenasaun iha nível setór judisiáriu ho órgaun judisiál tenke la’o di’ak liután, koordenasaun ho ajente públiku sira seluk tenke la’o di’ak tanba iha prosesu investigasaun ema husu prova, testemuñu no mós tenke kontribui. Tanba, iha lei ne’e rasik hateten katak se mak la kontribui nia mós hetan sansaun,” nia hateten.

Jornalista : Cipriano Colo

Editór       :  Cancio Ximenes

HAKEREK NO HATÁN

Please enter your comment!
Please enter your name here