Ministru Justisa, Manuel Cárceres da Costa. Imajen/Antonio Goncalves

DILI, 01 jullu 2020 (TATOLI)– Ministru Justisa (MJ), Manuel Cárceres da Costa, sei estuda paresér hosi organizasaun la’ós Governu nian (ONG), Consellho de Imprensa de Timor-Leste (CI), Igreja  no entidade seluk nian tan kona-ezbosu Lei Kriminaliza Difamasaun.

Notísia Relevante : Kriminaliza Difamasaun Sei Fó Impaktu Ba Atividade Jornalizmu

Ministériu Justisa hanesan ‘autór’ ba kriasaun ezbosu Lei Kriminaliza Difamasaun ne’e haruka hotu ona kestionáriu sira kona-ba entidade sira hotu atu bele fó opiniaun ka paresér ba ezbosu lei ne’e nu’udar parte ida hosi konsultasaun públiku molok lori ba Konsellu Ministru diskute no aprova.

“Prosesu sira-ne’e agora barak loos hanesan bíblia ne’ebé ha’u sei lee no estuda hela no tenke analiza ho neineik,” hateten Ministru Manuel Cárceres da Costa, ohin, hodi responde Agência Tatoli, iha  Palaçio do Governo.

Ba preokupasaun sosiedade sivíl, asosiasaun jornalista, CI no públiku rasik ne’ebé la konkorda Lei Kriminaliza Difamasaun iha Timor-Leste, Manuel Cárceres hateten, Governu konsidera preokupasaun hirak ne’e, maibé Estadu tenke la’o ba oin no labele fila-fali ba kotuk.

Ministru Justisa klarifika katak nia-parte sei define loloos Lei Kriminaliza Difamasaun hanesan tolok, bosok no dun matak ema nia onra no dignidade.  Ida ne’e mak difamasaun, maibé ba kritika konstrutiva ne’e la’ós difamasaun.

“Ba ita boot sira-nia liberdade imprensa ne’e lei iha no hatete loloos, tanba ne’e Governante ka polítiku tenke simu kritika no labele alerjia ba kritika di’ak ka aat tenke simu,” hateten Manuel Cárceres

Hatán kona-ba espetativa públiku nian mak presiza kria lei sibernétika atu regula ema insulta no tolok ema seluk iha rede sosiál hanesan Facebook, Manuel Cárceres da Costa, lia-tun dehan, lei sibernétika ne’e ko’alia kona-ba dadus informátika, tanba tolok ema nia onra ne’e la haree tanba ne’e ko’alia lei sibernétika ne’e buat ketak ida.

Jornalista   : Nelson de Sousa

Editór        : Francisco Simões

HAKEREK NO HATÁN

Please enter your comment!
Please enter your name here