Prezidente Komisaun B, Deputadu José Agostinho Sequeira Somotxo.

DILI, 02 jullu 2020 (TATOLI)—Komisaun B (Negósiu Estranjeiru, Defeza no Seguransa) sei halo fiskalizasaun ba dívida naun-finanseira ne’ebé akontese iha instituisaun Polísia Nasionál Timor-Leste (PNTL).

Notísia Relevante: Komisaun B Sei Fiskaliza Dívida Naun-Finanseira iha PNTL

Fiskalizasaun ne’e bazeia ba orientasaun hosi Komisaun C (Finansa Públika) iha loron 9 juñu 2020 ba Komisaun B (Negósiu Estranjeiru, Defeza no Seguransa) atu “investiga” dívida iha instituisaun Polísia Nasionál Timor-Leste (PNTL) tanba enfrenta dívida naun-finanseira dezde 2013.

Komisaun C rekomenda asuntu ne’e bazeia ba rekomendasaun no pareser hosi Kámara Kontas hosi Tribunál Superiór Administrativu, Fiskál no Kontas (LOCdC-sigla portugés), relata ba Komisaun C argumenta dívida naun-finanseira iha PNTL sai preokupante, tanba iha kazu relasaun ho obrigasaun kontratu iha 2013 susesivamente akumulada ho dívida kontraída iha ikus-ikus ne’e iha tinan 2018 no kuja rezolusaun la hetan solusaun iha tempu dadak.

Ho rekomendasaun ne’e hosi  Kámara Kontas hosi Tribunál Superiór Administrativu, Fiskál no Kontas ne’e, Komisaun C elabora mós relatóriu no pareser ba instituisaun estadu hotu-hotu no husu Komisaun B ne’ebé ne’ebé trata asuntu polísia nian tenke investiga situasaun dívida naun-finanseira iha PNTL ho objetivu atu fó solusaun mais rapidamente posível.

“Ami komisaun B sei hatene loloos para fó-sai iha plenária, tanba hosi parte Komisaun C (Finansa Públika) deteta PNTL iha dívida hahú hosi 2013 mai to’o 2017 karik. Ami halo ho forma rua katak ami bolu ka ami mak ba rasik. Opsaun ida-ne’ebé di’ak liu mak ami tenke ba hodi halo fiskalizasaun,” dehan Prezidente Komisaun B, Deputadu José Agustinho Sequeira “Somotxo”, ba jornalista sira iha resintu Parlamentu Nasionál, kinta ne’e.

Deputadu Somotxo hateten, iha fiskalizasaun ne’e la’ós haree de’it dívida maibé haree mós jestaun no administrasaun iha Polísia Nasionál Timor-Leste (PNTL).

“Tanba relatóriu barak kona-ba dívida iha PNTL ne’e, hatudu momoos katak PNTL iha problema. Ha’u kuandu ministru dívida ne’e ha’u la konsege haree loloos maibé dívida ne’e eziste duni. Ami agora prepara hela atu ba komandu jerál para hatene loloos dívida ne’e, dívida ne’e mai hosi ne’ebé, dívida ba internet ka dívida ba monta CCTV sira iha Dili laran ka oinsá,” Prezidente Komisaun B hateten.

Notísia Relevante: Komisaun C Rekomenda “Investiga” Dívida iha PNTL

Jornalista : Evaristo Soares Martins

Editór       :  Cancio Ximenes

HAKEREK NO HATÁN

Please enter your comment!
Please enter your name here