Komandante Jerál Polísia Nasionál Timor-Leste (PNTL), Komisáriu, Faustino da Costa no Segundu Komandante, Komisáriu Mateus Fernandes, fó pose ba ofisiál superiór polísia na’in-25 iha Kuartel Jerál PNTL iha Caicoli, Dili, kuarta (01/07/2020). Imajen/Eugénio Pereira

DILI, 01 jullu 2020 (TATOLI)- Komandante Jerál Polísia Nasionál Timor-Leste (PNTL), Komisáriu Faustino da Costa, akompaña hosi Segundu Komandante, Komisáriu Mateus Fernandes, ohin, fó pose ba ofisiál superiór polísia na’in-25 ne’ebé hetan rotasaun servisu.

Notísia Relevante : Komandu Jerál PNTL “Muda” Komandante Na’in-25

Serimónia pose ho termu juramentu no entrega rota komandu ne’e hala’o tuir despaxu númeru 193/CG-PNTL/VI/2020 ho objetivu lori membru polísia halo servisu tuir interese instituisaun PNTL bazeia ba Konstituisaun RDTL artigu 147.

Foto hamutuk Komandante Jerál PNTL, Komisáriu Faustino da Costa ho enposadu sira. Imajen/Eugénio Pereira

Komisáriu Faustino dehan, mudansa ba rotasaun servisu ne’e halo hodi aplika no dezempeña kapasidade ne’ebé ofisiál PNTL sira iha atu kontribui ba fatin servisu ho ambiente ne’ebé diferente hodi membru sira aplika sira-nia matenek ne’ebé sira iha hodi akomoda no jere kontrola administrasaun servisu di’ak liután iha fatin foun.

“Atu klarifika ba ita hotu katak, rotasaun no nomeasaun transferénsia ne’e ita halo ho objetivu atu kontinua implementa programa ne’ebé iha tinan 2017 Governu aprova vaga promosaun diviza ba membru sira hodi prienxe estrutura ne’ebé sei mamuk,” hateten Komisáriu Faustino da Costa, iha nia diskursu.

Rotasaun no transferénsia ne’e halo, tuir Komisáriu Faustino da Costa, atu evita mós kolokasaun komandante ida ne’ebé hela iha unidade, iha munisípiu ida ho durasaun tempu ne’ebé barak demais.

“Ita hotu nota, komandante balun ne’ebé ohin ha’u foin muda ita halo rotasaun hela iha fatin ida ne’ebé dezde 2012 no balun iha 2013 nafatin ho pozisaun hanesan too 2020,” dehan Faustino da Costa, iha Komandu Jerál PNTL, Caicoli, Dili.

Faustino hato’o parabéns ba enposadu sira atu kontinua presta servisu ho profisionál hodi halo mudansa ba servisu PNTL nian atu lori hakmatek no dame ba povu no nasaun.

Faustino mós  klarifika ba komandante sira katak, iha komandante munisípiu balun sei muda ba Komandu Jerál PNTL la’ós atu izola sira-nia knaar ho podér servisu, maibé atu promove komandante ne’ebé iha kapasidade atu ajuda Komandu rezolve problema barak ne’ebé iha.

“Komandante sira keta iha duvida katak, se ha’u iha komandu territoriál ida, ha’u mai asume fali kargu balun iha komandu diresaun xefia ne’ebé konsidera ninia postu ne’e tun, ida ne’e laloos.  Komandante sira ne’ebé komandu dada mai ne’e ho lian Indonézia katak, sira ne’e maka sei sai hanesan pemikir atu suporta komandu ida ne’e oinsá fó idea konstrutivu atu dezenvolve PNTL di’ak liután,” tenik Komisariu Faustino da Costa.

Komandu PNTL mós agradese ba komandante sesante Polísia Munisípiu Dili, Superintendente  Armando Monteiro ne’ebé assume kargu tinan ida hodi kontrola Dili nu’udar kapitál nasaun atu sai hosi problema krime no violénsia la’ós buat fasil.

Nia hatutan, durante tinan 2017 too mai agora nasaun ne’e hasoru impase polítika, maibé PNTL koopera ho F-FDTL garante nafatin seguransa la’o ho di’ak.

Iha parte seluk, Komandante PNTL mós agradese ba servisu hotu ne’ebé komandante sira halo ona hodi koopera ho Governu Timor-Leste sosializa informasaun no apela povu hodi kumpre regra Estadu Emerjénsia nu’udar esforsu  luta kontra propagasaun surtu Coronavirus ka COVID-19 iha Timor-Leste.

Durante Estadu Emerjénsia (EE), Faustino hateten, PNTL mós simu keixa barak husi komunidade, inklui Provedoria Direitus Umanu no Justisa (PDHJ) kona-ba kazu krime balun ne’ebé envolve husi membru polísia sira balun. 

Enposadu sira promote sei halo servisu ho responsabilidade reprezenta komandu jerál PNTL atu jere rekursu ne’ebé iha hodi garante moris pás ba sosiedade sira iha Timor-Leste.

Komandante sira ne’ebé simu pose kompostu Superintendente Xefe ema na’in-ualu (8), Superintendente 12, no Superintendente Asistente na’in-lima (5).

Serimónia tomada pose ba ofisiál polísia sira-ne’e tuir ajenda hala’o ba komandante na’in-28, maibé ohin komandante na’in-rua hanesan, Superintendente Xefe, Arnaldo de Jesus Almeida D.C. Araujo, Komandante Polísia RAEAO ho ID 10310 no Superintendente, Ludgerio Picancio Madeira Lay ho ID 10213 la marka prezensa tanba okupa ho servisu balun.

Komandu Jerál mós adia serimónia pose ba Diretór Jerál foun Servisu Migrasaun Ministériu Interiór, Superintendente João Belo dos Reis, atu hala’o fali iha Ministériu Interiór iha tempu besik.

Enposadu sira ne’ebé simu pose, kompostu hosi Superintendente Xefe, Hendrique ho ID 10058 husi Komandante Servisu Investigasaun Kriminál Nasionál (SIKN) transfere ba Komandante Munisípiu Dili, Superintendente José Maria Neto Mok (ID 10483) hosi Servisu Informasaun Polísia (SIP) muda ba Komandante Servisu Investigasaun Kriminál Nasionál (SIKN), Superintendente Xefe Agostinho da Silva Gomes (ID 10722) Diretór Jerál Servisu Migrasaun Ministériu Interiór (DJRM-MI) muda ba Komandante Munisípiu Ermera, Superintendente Xefe, Mateus Asunção Mendes ,komandante Operasaun muda Komandante Polísia RAEOA.

Superintendente Xefe, Armando Monteiro,  komandante Polísia Munisípiu Dili muda ba Munisípiu Baucau, Superintendente Xefe Hermenegildo Gonçalves da Crus (ID 10108) komandante Munisípiu Baucau muda ba Komandu Jerál Servisu Informasaun Polísia (SIP), Superintendente, João da Costa (ID 10010)  komandante Munisípiu Bobonaro muda ba Munisípiu Manatuto, Superintendente,  Umbelina dos Santos Soares (ID 10042) komandante Polísia Munisípiu Aileu muda ba Munisípiu Liquiça, Superintendente, António do Rego Fernandes (ID 10275) Servisu Informasaun Polísia muda ba Munisípiu Lautem, Superintendente Antoninho Mauluta (ID 10469) Komandante Departamentu Justisa muda ba Munisípiu Bobonaro.

Superintendente Calisto Gonzaga (ID 10909) Komandu Operasaun muda ba Komandu Administrasaun DAP, Superintendente Sebastião Alves Quintão (ID 10236) komandante Munisípiu Lautem muda ba  Munisípiu Viqueque, Superintendente, Paulino Carmo Pereira (ID 10131) komandante Polísia RAEOA muda ba Komandu Jerál SIKN, Superintendente Nicolau F. da Costa (ID 10155 GIG) muda fali ba RAEOA, Superintendente, Julia da Gama, Komandante Munisípiu Manatuto muda ba Komandu Jerál Gender,  Superintendente, Ismael da Costa  (ID 10109) Diretór Jerál Servisu Protesaun Sivíl Sekretáriu Estadu Protesaun Sivíl (SEPS) muda ba DTRN.

Superintendente Asistente Pascoal Ferreira Guterres (ID 10130) Komandu Operasaun muda ba Munisípiu Luatem, Superintendente Asistente  António Lourenço da Costa Soares (ID 10931) Komandante Munisípiu Ermera muda ba Munisípiu Aileu, Superintendente Asistente Luis da Silva (ID 10013) Komandante Munisípiu Liquiça muda ba Komandu Jerál Tezouru,  Superintendente Asistente, Agosto Tilman da Costa (ID 11082) GCCRI muda ba CON no Superintendente Asistente Fasio de Jesus Lima (ID 10069) Servisu Migrasaun muda ba Komandante Unidade Patrullamentu Fronteira (UPF).

Jornalista   : Eugénio Pereira

Editór        : Francisco Simões

HAKEREK NO HATÁN

Please enter your comment!
Please enter your name here