Foto hamutuk ho Komandante Jerál PNTL, Komísariu Faustino da Costa ho enposadu sira ne'ebé simu tomada pose, kuarta (01/07/2020). Imajen/Eugénio Pereira

DILI, 01 jullu 2020 (TATOLI)- Komandante Jerál Polísia Nasionál Timor-Leste (PNTL), Komisáriu, Faustino da Costa, apela ba membru polísia hotu-hotu atu tane mensajen xave hosi Primeiru-Ministru no Ministru Interiór, Taur Matan Ruak, atu dedika prestasaun servisu ba dezenvolve PNTL ho profisionál.

Notísia Relevante : PM Taur Dezafia MI ho Komandu PNTL Servisu Kumpre Ierarkia no Dixiplina

Mensajen xave ne’ebé PM Taur husik hela ba komandu jerál PNTL mak servisu ho espíritu ierarkia no dixiplina. Nune’e, bele lori prestasaun servisu ida di’ak no profisionál ba dezenvolve instituisaun PNTL.

“Ita tenke tane metin mensajen hosi Primeiru-Ministru ho Ministru Interiór, Taur Matan Ruak, ne’ebé mai ho prioridade rua; ida maka dixiplina buat ida ne’ebé PNTL labele iha tolera, inísiu tinan ida ne’e hanesan dezafia ba ita hotu katak, dixiplina ne’e úniku kultura ne’ebé instituisaun ne’e implementa. Uza komandante sira-nia kompeténsia atu hola asaun ho responsabilidade,” hateten Komandante Jerál PNTL, Komisáriu Faustino da Costa, iha serimónia pose ba komandante polísia na’i-25 iha Kuartél Jerál PNTL, ohin, iha Caicoli, Dili.

Nia hatutan, bainhira membru sira dixiplina iha servisu ho kumpre regra hotu-hotu sei fó susesu ba servisu membru tomak hodi hamorin naran Komandu PNTL sai di’ak iha sosiedade nia leet.

“Apela ba membru sira atu kumpre, komandante sira tenke kaer mensajen ida ne’e hanesan xave ida ho sentidu de pertensia, katak ita boot sira pertensia duni ba Instituisaun PNTL ida ne’e para ita boot sira hato’o ba subordinadu kumpre sentidu ida ne’e maka ita bele habelar ita nia knaar ho dixiplina,” Faustino da Costa afirma tan.

Antes ne’e, Primeiru-Ministru no Ministru Interiór, Taur Matan Ruak,  dezafia funsionáriu hosi Ministériu Interiór no Komandu PNTL atu kaer metin doutrina militár presta servisu ho espíritu nasionalizmu no kumpre regra hosi ierarkia ho dixiplina.

“Iha vida militár iha buat rua maka ba ami konsidera sagradu, primeiru mak espíritu ierarkia, segundu maka dixiplina. Ba servisu too ho tempu, étika, uza rekursu estadu ho rasionalidade ne’e importante loos. Ha’u fiar ita sei servisu hamutuk konta ho ha’u nia apoiu, ha’u mai atu garante ba ita boot sira katak defeza no seguransa ba nasaun ida ne’e importante tebes,” PM Taur  hateten.

Jornalista  : Eugénio Pereira

Editór        : Francisco Simões

 

HAKEREK NO HATÁN

Please enter your comment!
Please enter your name here