Eis Ministru Interiór, Filomeno da Paixão de Jesus, ho Primeiru-Ministru no Ministru Interiór, Taur Matan Ruak no Vise Ministru Interiór, António Armindo. Imajen/Eugénio Pereira

DILI, 30 juñu 2020 (TATOLI)- Primeiru-Ministru nu’udar Ministru Interiór, Taur Matan Ruak, dezafia funsionáriu Ministériu Interiór no Komandu Polísia Nasionál Timor-Leste (PNTL) atu presta servisu ho espíritu nasionalizmu no kumpre ierarkia ho dixiplina.

Notísia Relevante : 2015-2019, PNTL Iha Dívida $2.000,000

“Iha vida militár iha buat rua maka ba ami sagradu; primeiru mak espíritu ierarkia, segundu maka dixiplina. Ba servisu too ho tempu, étika, uza rekursu Estadu ho nasionalidade ne’e importante loos. Ha’u fiar, ita sei servisu hamutuk no konta ho ha’u nia apoiu,”  hateten PM Taur Matan Ruak, durante serimónia entrega servisu hosi eis Ministru Interiór  Filomeno da Paixão de Jesus ba Ministru Interiór Taur Matan Ruak no Vise Ministru Interiór, António Armindo  ho Sekretáriu Estadu Protesaun Sivíl (SEPS), Joaquim Gusmão, ohin, iha edifísiu Ministériu Interior, Vila-Verde, Dili.

Taur dehan, iha nasaun boot sira iha mundu, buat hotu ne’ebé atu garante pás no bein estar nasaun nian maka  servisu Ministériu Defeza no Ministériu Interior ne’ebé lidera direita ho servisu Instituisaun Komandu F-FDTL no PNTL nian.

Taur sente priviléjiu boot tebes lidera Ministériu Interiór nu’udar instituisaun ida ne’e importante tebes, kuandu ema haree Estadu hotu-hotu iha mundu buka objetivu rua de’it; ida maka seguransa, ida seluk bein star.

Taur esplika, seguransa no ben star nia objetivu boot ba Estadu hotu iha mundu. Balun hanoin katak, seguransa la presiza, kuandu ema hanoin ben star  ne’e iha, ne’e signifika katak, ema kontente katak seguransa iha. Maibé, hotu- hotu hanoin katak, área rua ne’e importante, tanba seguransa iha relasaun ho estabilidade, soberania no integridade territoriál.

PM Taur hatutan, nasaun ne’e harii ho ema rihun nia mate no terus, tanba ne’e nu’udar lider rezistensia sira sei la husik nasaun ne’e ba ema seluk atu hamonu nasaun ne’e ho asaun saida de’it.

“Se uluk ita lori ema rihun ida atus rua lima nulu resin para konkista ukun aan, ita labele husik ke ema ida ema rua bele halakon fali ukun aan ne’e,” dehan Taur

Nia hatutan, Ministériu Interiór no Ministériu Defeza ne’e importante ba estabilidade seguransa rai ne’e no sira sei la husik forsa rua atu kualkér ema lidera. Tanba Instituisaun Estadu rua ne’e tau matan seguransa no estabilidade no Timor-Leste iha sistema ida defende seguransa integradu, PNTL, F-FDTL no protesaun sivíl.

Xefe Governu ne’e dehan, nia sei hamutuk ho membru Governu tomak atu tau matan di’ak liután ba servisu Ministériu Defeza no Interiór atu bele hasa’e protesaun servisu ho apoiu ekipamentu servisu ne’ebé modernu.

“Ita presiza tau matan di’ak ba sira, tanba too tempu ruma ita uza sira bele disponivel atu defende ita nia nasaun,” nia hateten.

Nia lia tutan, nia sente orgullu tebes bele lidera Ministériu Interiór, mezmu ema balun hanoin Ministru, Filomeno da Paixão de Jesus, sai ona hosi MI maka funsionáriu sira sente livre ona, tanba ema ne’e ukun ho karater siak. Maibé tuir Taur katak, nia siak liu Brigadeiru Filemeno Paixão.

“Sira balun dehan Jenerál Filemeno kuandu sai hosi Interiór ema barak kontente, tanba nia siak ten. Soke imi hetan fali ida (Taur) nia siak liu fali Filomeno,” hateten Taur ho hamnasa.

Xefe Governu Taur hatutan, dala barak nia siak membru Governu sira para atu halo servisu ho ezijénsia no responsabilidade hodi ema hotu-hotu presta servisu ho rezultadu di’ak ba nasaun no povu.

Taur promete sei lori Ministériu Interiór kontinua hadi’a servisu ne’ebé seidauk konsege halo no servisu ne’ebé la kontribui sei hasai hodi kontribui ba servisu hotu la’o ho di’ak.

Nia husu ba Komandu PNTL, Servisu Migrasaun, Sekretáriu Estadu Protesaun Sivíl ho ekipa Bombeiru sira kontinua hatudu servisu di’ak durante ninia mandatu.

Iha fatin hanesan eis Ministru Interiór Interinu, Filemono da Paixão de Jesus, hato’o agradese, tanba tinan-rua lidera Ministériu Interiór konsege halo mudansa barak no husu atu PM Taur no Vise Ministru kontinua hadi’a di’ak liután.

Filomeno Paixão rekoñese durante tinan-rua koordena ho Komandu PNTL konsege aprezenta regulamentu dixiplina PNTL nian aprova ona iha Konsellu Ministru no tuir planu iha tempu besik tan Konsellu Ministru sei aprova tan Estatutu PNTL no F-FDTL nian.

Ministru Defeza Filomeno espera ho knaar foun PM Taur no Vise Ministru Interiór bele dezenvolve dia’k liután servisu Ministériu Interiór, PNTL, Servisu Migrasaun no Protesaun Sivíl.

OJE MI Milaun $1,492.3 Aprovadu

Vise Ministru Interiór, Antonio Armindo rasik halo ona reuniaun Komisaun Interministeriál ne’ebé lidera hosi Primeiru-Ministru Taur Matan Ruak iha Palásiu Governu, hodi aprova tetu Orsamentál tinan fiskál 2020.

Konsellu Ministru rasik aprova ona tetu Orsamentál ho valór Milaun $1,492.3 ba Orsamentu Jerál Estadu (OJE) ba tinan finanseiru 2020.

Prioridade sira ne’ebé define ona ba OJE 2020 nian maka estabilizasaun ba setór sosiál ho foka ba saúde, edukasaun, formasaun, bee no saneamentu, estabilizasaun ba setór ekonómiku ho foka ba promosaun investimentu ba setór privadu, kriasaun ba empregu, ba agrikultura, no ba seguransa alimentár no ba polítika makroekonómiku, reforma ba administrasaun públika, ekonomia, sistema judisiáriu no jestaun ba finansa públika. Bazeia ba prioridade hirak ne’e, 33,8 % hosi valór totál OJE sei aplika ba setór sosiál (8% ba edukasaun, 15% ba protesaun sosiál, 11% ba saúde) no 48,5% ba dezenvolvimentu ekonómiku no infraestrutura (inklui medida ba estabilizasaun ekonómika iha ámbitu COVID-19 nian).

Membru Governu sira aprova mós kalendáriu atu halo preparasaun ba OJE 2020 no 2021. Projetu hosi proposta Lei ida-ne’e sei aprova iha Konsellu Ministru iha loron-26 agostu no sei submete ba Parlamentu Nasionál hahú iha loron-15 setembru.

Kona fali ba kalendáriu ba OJE 2021 nian, prevee tiha katak Konsellu Ministru bele apresia proposta lei ne’e iha loron-25 setembru, tinan ne’e no sei submete ba Parlamentu Nasionál to’o 15 outubru, tinan ne’e.

Jornalista   : Eugénio Pereira

Editór        : Francisco Simões

HAKEREK NO HATÁN

Please enter your comment!
Please enter your name here