Defensór Públiku, Sergio Quintas.

DILI, 22 juñu 2020 (TATOLI)- Jurista Timoroan, Sergio Quintas, afirma bainhira Governu liuhosi Ministériu Justisa kriminaliza difamasaun sei fó impaktu boot ba atividade  jornalizmu iha Timor-Leste.

Notísia Relevante : Deputada Carmelita Husu MJ Kriminaliza Mak Kazu Insestu La’ós Difamasaun

Sergio Quintas hateten, lei ne’e kuandu hetan ona aprovasaun, iha posibilidade boot ba meus komunikasaun sosiál, liu-liu ba jornalista sira barak sei assume nia kualidade hanesan arguidu tanba jornalista ho mídia sira mak sei publika  informasaun hotu no oioin ba iha sosiedade.

Defensor Públiku Sergio Quintas, afirma tan krime ne’e semi públiku no mós ba sosiedade sira iha limitasaun ba liberdade espresaun iha país demokrátiku ida ne’e tanba uluk iha tempu UNTAET iha tinan 2000 Governu hasai ona orden ezekutivu atu limite kódigu penal Indonesia nian ne’ebé kriminaliza difamasaun ne’e iha lei 310 no 321 ho iha tempu UNTAET ne’e kriminaliza difamasaun injuria, maibé tanba iha momentu ne’ebá Nasaun Unidus mak ukun entaun hasai ona orden ezekutivu para la bele kriminaliza Injuria ho difamasaun ne’e.

“Ha’u hanoin la nesesáriu kriminaliza difamasaun, tanba Timor-Leste ne’e país ida ne’ebé demokrátika, ita la bele bazeia ba país ne’ebé podér ida no nusa mak ita la mantein, kuandu sidadaun ida sente katak nia vida privada reputasaun ne’e ema viola bele hatama asaun sivíl ida tanba kódigu sivíl ne’e estabelese ona ba iha artigu 340 husi Kódigu sivíl nune’e mós artigu iha artigu 419 iha númeru 01 iha konstituisaun K-RDTL mós iha,’’ hateten Jurista Sergio Quintas, ba Jornalista, ohin, iha nia knar fatin Defensoria Públiku, Balide, Dili.

Sergio Quintas, afirma kona-ba tolok ho uza identidade falsu iha media sosiál ne’e di’ak liu halo lei cyber-netika atu regula la’ós kriminaliza fali difamasaun.

Sergio Quintas hatete, lei próteze ema nia vida privada ba onra reputasaun, tanba ne’e nia konsidera inisiativa hamosu lei difamasaun ne’e atu proteje ukun-nain sira husi kritika.

‘’Kriminaliza difamasaun ho injuria ne’e tanba ne’e konsekuénsia husi Estadu demokrátiku kualkér sidadaun bele halo kritika ba ema ne’ebé mak assume kargu publika,’’ tenik nia.

Nia konsidera argumentu Ministru Justisa nian la relevante ho kondisaun Timor, sosiedade ben edukadu, so ke personalidade ne’ebé assume kargu públiku sira mak la edukadu no mós alerjia ba kritika, ho ida ne’e mak Governu sira hamosu lei difamasaun injuria ne’e atu próteze ba sira nia-aan rasik.

Jurista ne’e dehan tan, kuandu Injuria ho difamasaun ne’e mak sai lei ida nia dezvantajen ba sosiedade sira atu espresa ba sira nia hanoin, liu-liu kritika ba ukun nain sira, nune’e mós ba sosiedade ne’ebé livre hodi hato’o sira espresaun ne’e sira sei barak mak sei asume kualidade hanesan arguidu inklui mós jornalista sira barak mak sei hasuru justisa no fó servisu barak liu ba Ministériu Públiku.

Jornalista   : Nelson de Sousa

Editór        : Francisco Simões

1 KOMENTÁRIU

HAKEREK NO HATÁN

Please enter your comment!
Please enter your name here