Enkontru Ekipa Gabinete Jestaun Krize. Imajen Tatoli/Egas Cristovão

DILI, 02 abríl 2020 (TATOLI) – Primeiru-Ministru Taur Matan Ruak, iha loron  tersa (31/03) asina Diploma Ministeriál númeru 14/2020, loron 31 fulan-marsu, kona-ba estabelesimentu Sala Situasaun Sentru Integradu ba Jestaun Krize (CIGC, sigla portugés) no despaisu ba nomeasaun estrutura sira ba luta kontra COVID-19.

Diploma Ministeriál ne’e estabelese ho baze tuir lei númeru 2/2010, loron 21 fulan-abríl, Lei Seguransa Nasionál, hodi kria CIGC nu’udar órgaun espesializada asesoria no konsulta ba koordenasaun téknika operasionál ba entidade sira ne’ebé kompoin iha Sistema Integradu Seguransa Nasionál.

Dispostu iha númeru 2, artigu 38.º hosi Lei n.o 2/2010, loron 21 fulan-abríl, CIGC bele funsiona hanesan Sala Situasaun iha kazu ezesaun konstitusionál ne’ebé previstu iha lejizlasaun Estadu Sítiu ka Estadu Emerjénsia.

“Durante Estadu Emerjénsia, CIGC sei funsiona nu’udar Sala Situasaun ho kompeténsia sira hanesan, presta apoiu téknika ba Komisaun Interministeriál ne’ebé estabelese ona, koordena no monitoriza ezekusaun forsa tarefa sira, akompaña ba evolusaun situasaun, trata informasaun hotu ne’ebé fó hosi servisu kompetente, elabora estudu no proposta ho determinasaun hosi Komisaun Interministeriál,  presta akonsellamentu ba asuntu relasionadu no ezekuta tarefa sira ne’ebé determina ona hosi Komisaun Interministeriál,” refere nota imprensa ne’ebé Agência Tatoli asesu iha Portál Ofisiál Ezekutivu, kinta ne’e.

Sala Situasaun ne’e, organiza ba unidade ualu hanesan komandu operasionál, estadu maiór koordenadór, forsa tarefa (liña ministeriál sira) ba prevensaun no mitigasaun pandemia Covid-19, koordenasaun ofisiál ligasaun ba forsa tarefa sira, ekipa estudu no análiza ba risku, sekretariadu ba administrasaun no finansa, destakamentu reasaun rápida no unidade informasaun públika.

Atu funsiona Sala Operasaun ne’e, Primeiru-Ministru mós halo despaisu ida, númeru 015/PM/III/2020, hodi nomeia estrutura sira hanesan tuir mai:

1.Brigadeiru Jenerál, João Miranda “Aluk”, atuál Diretór CIGC nu’udar 2º Komandante Operasionál.

2.Kapitaun Mar e Guerra, Pedro Klamar Fuik atuál Diretór Institutu Defeza Nasionál (IDN), nu’udar Estadu Maiór Koordenadór

3.Sérgio Lobo, Eis Ministru Saúde, nu’udar Koordenadór ba Forsa Tarefa ba Prevensaun no Mitigasaun ba Pandemia Covid-19.

4.Rui Maria de Araújo, eis Primeiru-Ministru no eis Ministru Saúde, nu’udar Koordenadór Ligasaun Ofisiál ba Forsa Tarefa.

5.Francisco Guterres, eis Sekretáriu Estadu Seguransa, nu’udar Koordenadór ba ekipa Estudu no Análize Risku.

6.Aurélio Guterres, eis Ministru Negósiu Estranjeiru no Kooperasaun, nu’udar Koordenadór Destakamentu Reasaun Rápida.

7.Dionísio Santos, Gabinete Primeiru-Ministru, nu’udar Koordenadór Administrasaun no Finansa.

8.José da Costa, atuál Prezidente Agência Tatoli.IP, nu’udar Koordenadór ba Unidade Informasaun Públika.

9.Afonso Henriques Corte-Real, Xefe Gabinete Primeiru-Ministru, nu’udar Ligasaun Ofisiál ba Komandu Operasionál (Primeiru-Ministru).

10.Nuno Machado Reis, asesór jurídiku Gabinete Primeiru-Ministru nian nu’udar Asesór Jurídiku ba Sala Situasaun.

PM Taur rasik hanesan Komandante Operasionál ba Sala Situasaun Hosi Sentru Integradu ba Jestaun Krize.

Jornalista: Florencio Miranda Ximenes

Editora: Julia Chatarina

HAKEREK NO HATÁN

Please enter your comment!
Please enter your name here