DILI, 29 juñu 2020 (TATOLI)-Ministra Negósiu Estranjeiru no Kooperasaun (MNEK), Adaljiza Albertina Xavier Reis Magno, hateten nasaun membru ASEAN hotu fó apresiasaun ba Timor-Leste ninia preparasaun atu adere ba The Association of Southeast Asian Nations (ASEAN) durante simeira ASEAN iha nasaun Vietname foinlalais.
Simeira ASEAN ba dala-36 ne’e, hala’o iha loron 26 fulan-juñu 2020, Vietname maka toma responsabilidade hanesan Prezidensia Simeira ASEAN ba tinan 2020.
Notísia Relevante :2020, ASEAN Avalia Adezaun TL Iha Área Kultura No Ekonomia
“Rekoñesimentu ne’ebé ASEAN fó ba ita hanesan sira enkoraza ita atu servisu liutan hodi bele kumpre lalais rekezitu ne’ebé ita iha, maibé seidauk hatete dehan bainhira (adere ba ASEAN) maibé sira fó atensaun ona mai ita ba pedidu ne’ebé hatama,” dehan Ministra ba jornalista sira iha Palacio do Governo Dili, segunda ne’e.
Notísia Relevante :Nasaun Membru ASEAN Rekoñese Progresu Timor-Leste
Entretantu, tuir komunikadu imprensa ne’ebé Agência TATOLI asesu segunda ne’e informa misaun esploratóriu husi ASEAN sei mai Timor-Leste iha tinan 2020 hodi finaliza sira-nia avaliasaun ba preprasaun iha pilár ekonómika no Sosiu Kultura.
“Timor-Leste simu ho haksolok ASEAN nia rekoñesimentu ba momentu pozitivu liga ho Timor-Leste nia adezaun ba ASEAN, hanesan haktuir iha deklarasaun Prezidente Simeira,”tenik tan.
Notísia Relevante :Maiu, ASEAN Sei Avalia Tan TL Nia Preparasaun
Estadu Timor-Leste reprezenta husi Ministériu Negósiu Estranjeiru no Kooperasaun agradese ba Nasaun Membru ASEAN hotu tanba espresa ona sira-nia protidaun hodi simu adezaun TL ba ASEAN.
Tanba ne’e Governu iha kompromisu atu atinje prosesu adezaun ba The Association of Southeast Asian Nations.
Governu mós sei haforsa koordenasaun ho nasaun membru ASEAN hotu-hotu hodi fó kontribuisaun ba Timor-Leste ninia preparasaun téknika nune’e bele suporta nasaun ne’e ninia adezaun ba ASEAN iha futuru.
Notísia Relevante :Ministra Adaljiza Sei Esforsu Lori TL Adere ba ASEAN
TL mós apresia ho responsabilidade ne’ebé maka nasaun membru ASEAN halo liliu liga ba prevensaun pandemia COVID-19 no kestaun disputa fronteira.
“Ami rekoñese katak ASEAN nia koordenasaun no lideransa hodi responde ba pandemia COVID-19 haforsa tebes rejiaun nia reziliénsia durante tempu defisil ne’e, no subliña importánsia hosi kooperasaun transforteirisu hodi rekonstrui fali rejiaun iha tempu tuir mai,” katak iha komunikadu ne’e.
Entretantu, Nasaun Membru ASEAN hamutuk 10 maka Indonézia, Malázia, Singapura, Brunei Darusalam, Tailándia, Filipina, Kambódia, Vietname.Mianmar no Laos.
Jornista : Hortencio Sanchez
Editór : Agapito dos Santos
