Superintendente Xefe, Armando Monteiro no Superintendente Xefe, Agostinho da Silva Gomes. Imajen/Eugénio Pereira

DILI, 29 juñu 2020 (TATOLI)-Komandante Polísia Nasionál Timor-Leste (PNTL) Munisípiu Dili, Superintendente Xefe, Armando Monteiro no Diretór Jerál Servisu Migrasaun, Superintendente Xefe, Agostino da Silva Gomes, hato’o agradese ba konfiansa servisu ne’ebé komandu PNTL fó ba sira durante ne’e.

Notísia Relevante : Komisáriu Faustino Dezafia Komandante Armando Lori Dili Sai Hosi Konflitu

Komandu Jerál  PNTL rasik hasai ona desizaun hodi halo mudansa  ka transferénsia servisu ba ofisiál komandante PNTL na’in-25 inklui mós komandante Na’in-rua ne’e.

Komandante Munisípiu Dili, Superintendente Xefe, Armando Monteiro, sei transfere fali ba servisu komandu nian iha Polísia Munisípiu Baucau hodi troka Superintendente Xefe Hermenegildo Gonçalves da Crus no Komandante Servisu Migrasaun (MI), Superintendente Xefe, Agostinho da Silva Gomes, muda ba Munisípiu Ermera no Komandante Unidade Patrullamentu Fronteira (UPF), Superintendente, João Belo dos Reis, muda ba Servisu Migrasaun.

“Ha’u hato’o agradese ba knaar ne’ebé Komandu PNTL fó ba ha’u hodi lidera Komandu Dili hodi aban muda fali ba Munisípiu Baucau,” hateten Armando Monteiro, ohin, ba jornalista iha Komandu PNTL Caicoli, Dili.

Komandante Armando Monteiro mós hato’o agradese ba ekipa jornalista sira ne’ebé koopera tebes ho nia hodi fó sai informasaun loroloron kona-ba knaar servisu PNTL Dili nian.

“Agradese mós ba servisu média sira ne’ebé kuaze loroloron akompaña Komandu Dili nia servisu hahú husi ha’u nia mandatu 18 Jullu 2019 too aban remata hodi hala’o knaar foun iha Baucau,” nia hateten.

Komandante Armando mós agradese ho kooperasaun servisu organizasaun hotu-hotu ne’ebé suporta nia servisu durante tinan ida liu hodi garante seguransa iha kapitál Dili.

Iha fatin hanesan, Superintendente Agostinho da Silva Gomes, apresia kuaze tinan ida resin hala’o servisu koopera tebes ho membru sira hodi dezenvolve servisu iha Migrasaun nian ho kuidadu no di’ak tebes.

Notísia Relevante : Agostinho da Silva Troka Boavida Ribeiro Lidera Servisu Migrasaun

“Ha’u agradese, mezmu hala’o servisu tinan ida hanesan Diretór Jerál Servisu Migrasaun la halo buat barak, maibé ho membru sira kontinua planu ne’ebé hala’o ona no hodi halo servisu ho profisionál no responsabilidade no ha’u prontu nafatin atu hala’o knaar iha fatin foun tuir knaar ne’ebé komandu fó,”  Agostinho Gomes hateten.

Nia espera, Komandante Migrasaun foun, Superintendente João Belo dos Reis, sei kontinua lidera Servisu Migrasaun ho di’ak liután.

Antes ne’e, Komandante UPF, João Belo dos Reis hato’o agradese tebes, tanba kuaze tinan-haat liu nia lidera Komandu UPF halo ona buat barak hodi garante seguransa metin iha liña fronteira terrestre nian.

Jornalista       : Eugénio Pereira

Editór             : Francisco Simões

HAKEREK NO HATÁN

Please enter your comment!
Please enter your name here