Diretór Nasionál Servisu Migrasaun foun, Superintendente Polisia Agostinho da Silva Gomes, kaer liman ho Diretór Jerál Servisu Migrasaun sesante Superintendente Asistente Polisia, Boavida Ribeiro. Imajen/Mistériu Interiór

DILI, 01 agostu 2019 (TATOLI)-Ministériu Interiór (MI) hahú halo mudansa servisu hodi halo nomeiasaun titulares foun ba kargu diresaun no xefia sira iha Ministériu Interiór hodi bele reforsa servisu  di’ak liután.

Mudansa servisu ne’e hala’o bazeia ba desizaun Komisaun Funsaun Publika (CFP-sigla portugés) númeru 3247/2019/PCFP, hodi nomeia titulares foun ba kargu diresaun no xefia tama iha vigor hahú, ohin, loron 01 agostu 2019.

Refere  ba desizaun ne’e, Ministériu Interiór nomeia Komandante Komandu Polisia Munisípiu Manufahi, Superintendente Polisia Agostinho da Silva Gomes ba Diretór Nasionál Servisu Migrasaun foun hodi troka fali Diretór Jerál Servisu Migrasaun sesante Superintendente Asistente Polisia Boavida Ribeiro.

Alende ida ne’e, Cândida do Rosário da Costa Soares ne’ebé antes ne’e asume kargu Inspetora Jerál ba Gabinete Inspesaun no Auditoria (GIA) nomeia ba Diretora Jerál Administrasaun Finansas hodi troka fali Guilhermina F.S Ribeiro ne’ebé antes ne’e asume knaar Diretora Jerál Servisu Kooperativu.

Nomeasaun seluk tan mak promove, João da Cruz asume fali kargu nu’udar Diretór Nasionál Aprovizionamentu, Paulina Maria Ximenes de Jesus nu’udar Diretór Nasionál ba Rekursu Umanu, Fernando da Silva Cardoso ba fali Diretór Nasionál Lojístika, Jestaun Patrimóniu no Arkivu, Abel Abreu da Costa Belo nu’udar Diretór Nasionál Finansas no Orsamentu, Lidia Lopes de Carvalho Xefe Gabinete ba Estudu Polítika Planeamentu no Estratéjika no António Viegas ba fali kaer kargu Diretór Nasionál Prevensaun Konflitu Komunitária (DNPKK).

Nomeasaun ne’e hala’o asiste direita hosi Sekretáriu Estadu Protesaun Sivíl (SEPS), Alexandrino de Araújo liuhosi termu asinatura inklui entrega mós relatóriu servisu hosi kargu xefia sesante ba diretór/a foun sira.

Sekretáriu Estadu Protesaun Sivíl, Alexandrino de Araújo, husu ba kargu xefia tuan no foun sira iha Ministériu Interiór tomak atu servisu hamutuk hodi fó susesu ba servisu tomak iha Ministériu Interiór.

“Iha ne’e hakarak hato’o agradese ba imi tomak ne’ebé servisu di’ak tebes ho responsabilidade. Ami ema polítika, maibé imi hanesan funsionáriu tenke hatene no halo tuir lei Funsaun Publika nian,” dehan Alexandrino iha salaun Ministériu Interiór Vila-Verde, Dili.

Alexandrino hato’o agradese ba diretór antigu sira tanba tinan  barak sira presta servisu barak la’o ona no diretór foun sira sei kontinua hala’o nafatin servisu tuir programa ne’ebé trasa ona.

“Saida maka imi halo di’ak tebes ba rai ida ne’e. Servisu ne’ebé hala’o todan tebes, maibé imi fó nafatin forsa ba sira ne’ebé simu kargu foun. Laiha intensaun ida katak, imi ladi’ak sira mak di’ak liu. Dala ruma ita hakilar malu, maibé ida ne’e ba interese nasaun nian. Ba imi ne’ebé foun, ha’u fiar katak hosi mudansa ida ne’e laiha intensaun ida entre imi hodi tau barreira katak ne’e grupu ketak. Maibé tenke hanoin katak, ita ne’e grupu ida de’it hodi hamutuk nafatin  buka koopera no apoiu malu liuhosi halo komunikasaun ba malu entre kargu foun no tuan,” Alexandrino afirma.

Hafoin nomeiasaun diretór foun sira simu kedas relatóriu hosi diretór sesante hodi esplika mós servisu ne’ebé sira hala’o ona ho esperansa kargu xefia foun sira bele ezekuta ho di’ak.

 Jornalista   : Eugénio Pereira

Editór          : Francisco Simões

HAKEREK NO HATÁN

Please enter your comment!
Please enter your name here