Komunidade sira tuur hein helaatu simu subsidiu $200 hosi Governu. Imajen/Antonio Goncalves

DILI, 29 juñu 2020 (TATOLI)–Diretór Jerál Ministériu Solidaridade Sosiál no Inkluzaun (MSSI), Rui Manuel Gago Exposto, hateten ekipa pagamentu MSSI rejistu reklamasaun iha Munisípiu 12 la inklui Rejiaun Administrativa Espesiál Oé-cusse Ambeno (RAEOA) hamutuk uma-kain 11.833.

Notísia Relevante: Pagamentu iha Loron 15, Ekipa Pagamentu Rejistu Reklamasaun Hamutuk 11.289

“To’o ohin loron, ita-nia ekipa pagamentu subsídiu $200 rejistu ona reklamasaun hosi Munisípiu 12 hamutuk uma-kain 11.833,” dehan Diretór Jerál MSSI, Rui Manuel Gago Exposto, ba Agência TATOLI iha nia knaar fatin MSSI, Caicoli, Dili, segundu ne’e.

Diretór Jerál ne’e haktuir, reklamasaun hirak ne’e sei hein ba pagamentu RAEOA nian tanba RAEOA mós parese iha reklamasaun hotu.

Tanba ne’e, nia dehan, bainhira pagamentu subsídiu $200 iha RAEOA finaliza ona mak hafoin soma hamutuk, nune’e halo verifikasaun ba naran reklamasaun sira, depois ita idenfikia ida-ne’ebé mak merese atu simu subsídiu $200 ne’e.

“Ita sei hein RAEOA, bainhira RAEOA finaliza hotu mak ita-nia ekipa halo verifikasaun ba lista reklamasaun nian. Katak, ida ne’ebé mak simu no ida ne’ebé mak la simu tanba ita seidauk hatene tipu hosi reklasamasaun ne’e,” nia dehan.

Tuir nia, relatóriu balun ekipa entrega ona mai MSSI no balun seidauk tanba ekipa pagamentu sei halo verifikasaun ba lista naran benefisiáriu sira.

“Tanba iha ne’ebá, ami-nia ekipa ida halo rekonsiliasaun ba relatóriu fíziku no relatóriu eletróniku, katak presiza halo rekonsiliasaun tanba relatóriu eletróniku la 100% loos hotu. Tanba, dalaruma internet online, ita bele atualiza ona dadus maibé dala ruma offline, entaun labele atualiza dadus. Nune’e, ita iha ekipa ida rekonsiliasaun ba relatóriu fíziku para verifika relatóriu hosi munisípu sira,” nia dehan. 

Jornalista : Osória Marques

Editór      :  Cancio Ximenes

HAKEREK NO HATÁN

Please enter your comment!
Please enter your name here