Primeiru-Ministru, Taur Matan Ruak prezide reuniaun Konsellu Ministru estraordinária iha Palásiu Governu, segunda (29/06). Imajen Tatoli/Egas Cristovão

DILI, 29 juñu 2020 (TATOLI) – Governu liuhosi reuniaun Konsellu Ministru (KM) estraordinária segunda ne’e aprova tetu Proposta Orsamentu Jeral Estadu (OJE) ba tinan fiskál 2020 ho valór hamutuk Millaun $1.492,3.

“Konsellu Ministru estraordinária aprova proposta ne’ebé aprezenta husi Ministru Finansa, Fernando Hanjam, ba tetu OJE 2020 ho montante millaun $1.492,3”, relata Ministru ba Prezidénsia Konsellu Ministru, Fidelis Manuel Leite Magalhães liuhosi konferénsia imprensa hafoin reuniaun ezekutivu iha Palásiu Governu.

Notísia Relevante: Proposta OJE 2020 La Pasa

Prioridade ne’ebé define ona iha OJE tinan ne’e maka estabilizasaun ba setór Sosiál ne’ebé foka ba Saúde, Edukasaun, Formasaun, Bee no Saneamentu, estabilizasaun ba setór ekonómiku ho foka ba promosaun investimentu ba setór privadu, kriasaun ba empregu, agrikultura, no seguransa alimentár no polítika makro-ekonómiku, reforma ba administrasaun públika, ekonomia, sistema judisiáriu no jestaun ba finansa públika.

Bazeia ba prioridade hirak ne’e, porsentu 33,8 hosi valór totál OJE sei aplika ba setór sosiál, porsentu 8 ba edukasaun, porsentu 15 ba protesaun sosiál, porsentu 11 ba saúde no porsentu 48,5 ba dezenvolvimentu ekonómiku no infraestrutura inklui medida ba estabilizasaun ekonómika iha ámbitu COVID-19 nian.

Biban ne’e, Membru Governu sira aprova mós kalendáriu atu halo preparasaun ba OJE 2020, ne’ebé sei deskute no aprova iha KM iha loron 26 agostu no sei submete ba Parlamentu Nasionál (PN) iha loron 15 setembru.

Kalendáriu ba OJE 2021 nian, prevee katak KM bele apresia Proposta Lei ne’e iha loron 25 setembru no sei submete ba PN iha loron 15 outubru.

Governu Aprezenta Proposta OJE 2020 ba Datoluk

Bainhira Governu aprezenta Proposta OJE 2020, maka aprezentasaun ne’e ba datoluk ona tanba antes ne’e Governu aprezenta ona maibé la pasa.

Iha loron 15 outubru, Governu liuhosi Ministra Finansa ein ezersísiu, Sara Lobo Brites, hamutuk ho Ministru Fidelis submete Proposta Lei OJE 2020 ba Parlamentu hodi diskute.

Proposta dahuluk ne’ebé Governu submete ho montante biliaun $1,950 (inklui impréstimu $73), bainhira esklui impréstimu hamutuk biliaun $1,887, no bainhira fahe tuir kategoria saláriu no vensimentu millaun $241,271, bens no servisu millaun $738,428, transferénsia públika millaun $457,773, kapitál menór millaun $53,267 no kapitál dezenvolvimentu millaun $459,260.

Maski nune’e, iha loron 3 dezembru 2019, Primeiru-Ministru, Taur Matan Ruak, retira Proposta OJE 2020 husi PN tanba rona opiniaun no preokupasaun husi deputadu sira ne’ebé konsidera montante boot liu no kontra Lei Jestaun Finanseira.

Nune’e, Governu lori hikas proposta ba daruak hodi diskute maibé iha loron 17 janeiru 2020, Proposta OJE 2020 la pasa iha diskusaun jeneralidade ho rezultadu votasaun a-favór 13, kontra 15 no abstensaun 25.

Proposta foun OJE 2020 ne’ebé la pasa ho montante biliaun $1,668, kompostu hosi sálariu no vensimentu millaun $235,6, bens no servisu millaun $561,8, transferénsia públika millaun $329,706, kapitál menór millaun $31,548 no kapitál dezenvolvimentu millaun $488,837.

Jornalista: Antónia Gusmão

Editora: Julia Chatarina

HAKEREK NO HATÁN

Please enter your comment!
Please enter your name here