Estudante Colegio Santo Inacio de LOIOLA, Kasait antri test temperatura antes atu tuir prosesu aprendisasen hafoin priense Kriteria husi Ministeriu Edukasaun no Ministeriu Saude Imajen/Antonio Goncalves

DILI, 29 juñu 2020 (TATOLI)-Diretór Jerál Ensinu Sekundáriu, Ministériu Edukasaun Juventude no Desportu, Deolindo da Cruz, hateten eskola ensinu sekundária Jerál no Tékniku Vokasionál hamutuk 50 maka re-ativa ona prosesu aprendizajen ba estudante sira tanba kumpre ona padraun prevensaun COVID-19 ne’ebé maka rekomenda husi Ministériu Saúde ho Organizasaun Mundiál Saúde.

Ekipa Ministériu Saúde ho Ministériu Edukasaun Juventude no Desportu, antes ne’e halo ona avaliasaun ba eskola hamutuk 50, husi totál eskola 80 iha Timor-leste maka daudaun ne’e instala ona ekipamentu prevensaun moras coronavirus.

“Momentu ne’ebá kuaze eskola hamutuk 80 mak preparadu ona tanba sira instala hotu ona ekipamentu prevensaun COVID-19 maibe, Ministériu Saúde foin mak verifika de’it eskola 50 no agora eskola sira ne’e hahú ona aula prejensiál,” dehan, nia ba Jorsnalista Sira iha MEJD, Vila Verde Dili.

 Notísia Relevante :MEJD Hapara Provizóriu Fiskalizasaun ba Eskola Sekundáriu

Ministériu Edukasaun rejista eskola sekundária jerál hamutuk 101, eskola tékniku vokasionál 58 maka ejiste iha territóriu Timor-Leste.

Tuir relatóriu provizóriu husi Diretór Edukasaun husi Munisípiu 12 inklu Rejiaun Administrativa Espesiál Oé-Cusse Ambeno (RAEOA), katak eskola sira halo ona preparasaun másimu atu re-ativa prosesu aprendizajen.

Maibé nia dehan atu re-ativa prosesu aprendizajen ba estudante sira presiza hetan autorizasaun husi Ministériu Saúde no Ministériu Edukasaun.

“Eskola ensinu sekundáriu hotu iha Munisípiu 12 inklui Rejiaun Administrativu Espesiál Oé-Cusse Ambeno (RAEOA) iha ona preparasaun ida másimu, tanba dirijente eskola sira husi Munisípiu sira ne’e halo ona kontaktu hodi hein bainhira mak Ministériu rua ne’e atu ba halo observasaun no fiskalizasaun,” tenik nia.

Entretantu, iha Dili Governu re-abertura ona prosesu aprendizajen ba estudante sira husi Tékniku Vokasionál Bekora (STM), no eskola sira seluk tan.

Jornalista : Tomé Amado

Editór       : Agapito dos Santos

HAKEREK NO HATÁN

Please enter your comment!
Please enter your name here