Logotipu MEJD

DILI, 29 juñu 2020 (TATOLI)-Diresaun Jerál Ensinu Sekundáriu, Ministériu Edukasaun Juventude no Desportu (SEJD), daudaun ne’e hapara provizóriu atividade fiskalizasaun no avaliasaun ba eskola sekundáriu sira kona-ba preparasaun ekipamentu hodi prevene COVID-19 antes re-ativa prosesu aprendizajen.

Diretór Jerál Ensinu Sekundáriu, Deolindo da Cruz, informa atividade fiskalizasaun no avaliasaun ne’e aprova husi Eis Ministra Edukasaun Juventude no Desportu, Dulce de Jesus Soares.

“Agora ami hapara fiskalizasaun no avaliasaun ba eskola sira tanba ami tenki hein fali orientasaun foun husi Ministru depois mak ami hala’o fali,” tenik nia ba jornalista sira iha Vila Verde Dili.

Kestaun ne’e, Diresaun Jerál Ensinu Sekundáriu aprezenta ba Gabinete MEJD tanba ne’e, nia  espera katak Ministru bele konsidera hodi aprova iha semana ida ne’e.

Durante ne’e nia parte halo avaliasaun no fiskalizasaun ba preparasaun eskola idaidak hodi kumpre padraun Ministériu Saúde no Organizasaun Mundiál Saúde maka tenki instala tanke bee moos kompleta ho torneira fase liman, máskara, sabaun fase liman, hand sanitizer, prepara fatin lixu, kria distansimentu fisíku iha sala aprendizajen no seluk tan hodi kontribui ba propagasaun COVID-19.

Jornalista : Tomé Amado

Editór       : Agapito dos Santos

HAKEREK NO HATÁN

Please enter your comment!
Please enter your name here