Deputada CNRT, Carmelita Caetano Moniz. Imajen/dok.TATOLI

DILI, 25 juñu 2020 (TATOLI)- Deputadu sira husi partidu Opozisaun ne’ebé integra iha Komisaun A Asuntu Konstitusionál no Justisa vota afavór ba Proposta Projetu Lei númeru 1/V/I-Lei Anti Korrupsaun  kapítulu Primeiru (I), kona-ba medida Jerál Sira Prevensaun Nian, ho nia sesaun hitu (VII), ne’ebé kompostu hosi artigu 25 tanba interese estadu.

Notísia Relevante: CAC Kongratula Komisaun A Aprova Ona Dispozisaun Legál Medida Preventiva LAC

Deputada proponenete hosi partidu opozisaun CNRT Carmelita Caetano Moniz hateten lia hirak ne’e, hafoin Deputadu sira hosi Komisaun A Parlamentu Nasionál (PN) halo aprovasaun ho unanimidade ba artigu 25 ne’e, iha Otél Uma Liurai, Ailok Laran, Babulo Same-Manufahi.

“Maski ami hosi partidu opozisaun maibé ami vota a-favór tanba ba interese estadu ninian. Ida-ne’e hanesan opozisaun ida-ne’ebé konstrutivu,” Deputada Carmelita hateten.

Deputada ne’e esplika, durante ne’e projetu lei ne’e pendente tanba iha razaun barak ne’ebé presiza kompleta mak hanesan, ezeijensia ema hotu katak tenke inklui medida prevensaun nian.

“Ami hakarak hateten, durante ne’e ita pendente prosesu diskusaun ba projetu LAC kuaze tinan ida tanba ezijénsia hosi ema hotu, katak tenke inklui medida prevensaun nian iha kombate korrupsaun nian. Ne’e mak durante ne’e ami hala’o hela servisu tékniku hodi prepara projetu ba medida sira kona-ba prevensuan nian ho artigu hamutuk 25,” nia dehan.

Ohin, nia dehan, deputadu sira halo diskusaun ida-ne’ebé mak di’ak tebe-tebes, diskusaun ne’e involve entidade hotu  ne’ebé aban-bainrua sei implementa Lei ne’e rasik. Deputadu sira fó duni sira-nia ideia konstrutivu no diak tebes.

“Ami tau hamutuk ideia sira-ne’e hodi halo aprovasaun ba artigu hamutuk 25 ho unanimidade. Ida-ne’e, nu’udár servisu importante no kontribuisaun ida ne’ebé mak importantísimu ba ita-nia rain, ba iha prevensaun no kombate krime korrupsaun,”  Carmelita esplika.

Nia dehan, hanesan deputadu proponente ba projetu Lei ne’e, durante ne’e dezenvolve liuhosi estudu no análiza no iha rohan sei aprova Lei Antí Corrupção (LAC) ho artigu hamutuk 100 resin.

“Projetu lei ida-ne’e akumula ideia hosi parte hotu nian, sosiedade sivil, entidade publika sira, jornalista sira-ne’ebé mak fó sira-nia ideia durante ami halo audiénsia públika iha tinan kotuk. Liuhosi audiénsia públika iha komisaun rasik mós ami halo ho tipu rona ema-ninia hanoin, liuhosi semináriu ne’ebé mak uluk komisaun A halo dala rua. Alende nee’ ami mós akumula ideia sira ne’ebé mak komisaun A rasik ba halo estudu traballu iha Macau, tanba sira mós iha lei ida kona-ba medida preventiva liuliu kona-ba deklasarun riku soin ne’ebé di’ak tebes ho ninia implementasaun mós di’ak,” deputada ne’e konta tuir.

Tanba ne’e, hanesan deputada proponente ba projetu Lei ne’e konsidera katak maizoumenus ladi’ak liu maibé pelumenus iha ona órgaun judisiáriu sira, autoridade sira bele uza ida-ne’e hodi prevene no kombate krime korupsaun.

“Ha’u nu’udár proponente, tuir ami-nia hanoin katak ne’e mais do que sufisiente ba rai ida iha ne’ebé mak ita sei iha hela konstrusaun estadu. Tanba ita hare katak, ida-ne’e forte tebes,”  nia konsidera.

Entretantu Deputadu proponente hosi partidu Opozisaun hamutuk na’in haat ne’ebé integra iha Komisaun A no fó votus a-favór ba Proposta Projetu Lei númeru 1/V/I-Lei Antí Corrupção (LAC)   kapítulu Primeiru (I), kona-ba medida Jerál Sira Prevensaun  mak hanesan deputada Carmelita Moniz (CNRT), deputadu Patrocínio Fernandes dos Reis (CNRT), deputadu Óscar de Araújo CNRT) no deputadu Francisco David Xavier Carlos (UDT).

Aprovasaun ne’e liuhosi votasaun ho votu unanimidade a-favór 10, kontra 0 no abastensaun 0, depois de halo diskusaun hamutuk ho entidade relevante sira hanesan CAC, PSIK, PDHJ, no parte Ministériu Justisa no Sosiedade Sivil hanesan JSMP-FONGTIL iha espesialidade no jeneralidade durante loron rua, hahú hosi loron 24-25 fulan juñu.

Tuir ajenda, aban deputadu sira husi komisaun A hamutuk ho entidade relevante sira sei kontinua halo diskusaun kona-ba titulu I medidas kombate korrupsaun, kapitulu II kona-ba Rejime Deklarasaun Bens no Interese Sira ne’ebe iha sesaun VIII, ho nia artigu hamutuk 39.

Jornalista : Cipriano Colo

Editór        :  Cancio Ximenes

HAKEREK NO HATÁN

Please enter your comment!
Please enter your name here