Ambiente diskusaun Lei Antí Corrupção (LAC) loron daruak iha Otél Uma Liurai. Ailok-Laran, Babulo Same-Manufahi, kinta (24/06). Imajen Tatoli/Cipriano Colo.

MANUFAHI, 25 juñu 2020 (TATOLI)–Asesor Gabinete Prezidente Parlamentu Nasionál, José António das Neves, hanesan mós eis Komisáriu Adjuntu CAC ba Asuntu Medidas Preventivas, Sensibilizasaun Públika ho Prevensaun Korrupsaun, ne’ebé marka prezensa iha diskusaun Lei Antí Corrupção (LAC) observa katak prosesu diskusaun LAC uza métodu abertu no partisipasaun ativu.

Notísia Relevante: Diskusaun Espesialidade LAC ba Medida Preventiva Kombate Korrupsaun To’o Ona Artigu 11

“Diskusaun seidauk ramata maibé ho métodu diskusaun ne’ebé abertu no hetan partisipasaun ativu hosi entidade hotu ne’ebé partisipa, atu ita bele enkuadra didi’ak ba  LAC iha perspetiva prevensaun,” José Neves fó observsaun ba prosesu diskusaun LAC iha loron dahuluk ne’ebé hala’o iha Otél Uma Liurai, Ailok Laran, Babulo Same-Manufahi, kinta ne’e. 

José Neves fó hanoin, ko’alia koana-ba medida preventiva ba korrupsaun ninian maibé iha medida preventiva lubuk ida maka presiza definisaun klara, atu bele fó kompeténsia la’ós ba CAC de’it, maibé ba mós governu, sosiedade sivíl, públiku no sidadaun hotu nia partisipasaun ba prevensaun korrupsaun.

Eis Komisáiu Adjuntu CAC ne’e hateten, medida preventiva ne’e tenke sai asaun koletiva hosi entidade hotu-hotu. Tanba ne’e mak loke espasu atu medida preventive ne’e, labele depende de’it ba instituisaun estadu nian ka órgaun ne’ebé mak estadu kria.

“Ida-ne’e liga ba kontratu. Liga ba tenderizasaun. Liga ba prosesu rekrutamentu sai funsionáriu, promosaun ba nível oin-oin. Tenke enkuadra iha kritériu atu evita prátika korrupsaun, prátika subornu, prátika ne’ebé halakon tiha meritokrasia. Sira-ne’e mak diskute iha loron dahuluk nian, horisehik,” nia fó hanoin.

Entretantu, diskusaun ba projetu Lei Númeru 1/V/I/-Lei Antí Corrupção (LAC) iha loron dahuluk, Komisaun A ho entidade relevante sira konsege diskute espesialidade iha Dispozisaun legál sira kona-ba medida prevensaun nian, títulu primeiru kona-ba Medida Preventivas Kombate Korrupsaun iha Kapítulu I-medida Jerál Prevensaun.

Iha Kapitulu ne’e, kompostu hosi sesaun Hitu (VII) no ohin konsege diskute sesaun haat ho nia artigu hamutuk sanulu resin ida (11).

Iha sesaun primeiru kona-ba estratejia nasionál ho nia artigu 1 koalia kona-ba politika prevensaun no luta kontra korrupsaun.

Sesaun daruak, kona-ba setór Públiku no kódigu konduta ho artigu 2 koalia kona-ba rekrutamentu iha setór públiku, artigu 3 koa’lia kona-ba kódigu konduta ba ajente públiku no privadu sira, artigu 4 ko’alia kona-ba medida atu fasilita komunikasaun ba aktu korrupsaun nian.

Sesaun datoluk, kona-ba Kontratasaun públiku ho nia artigu 5 ko’alia kona-ba publisidade no transparénsia iha aprovizionamentu ho setór públiku, artigu 6 ko’alia kona-ba aprovizionamentu justu no efisiente.

Sesaun dahaat kona-ba Transparénsia Administrasaun Públika nian ho nia artigu 7 ne’ebé ko’alia kona-ba divulgasaun Administrasaun públika, artigu 8 ko’alia kona-ba simplifikasaun prosedimentu administrasaun nian. Artigu 9 ko’alia kona-ba avaliasaun risku sira korrupsaun nian iha administarsaun públika, artigu 10 ko’alia kona-ba obstrusaun asesu informasaun no artigu 11 ko’alia kona-ba rekursu judisiál.

Diskusaun ba loron daruak, Komisaun A ho entidade relevante sira kontinua diskute espesialidade iha Dispozisaun legál sira kona-ba medida prevensaun nian, Títulu primeiru-kona-ba Medida Preventivas Kombate Korrupsaun iha Kapítulu I-medida Jerál Prevensaun, sesaun V kona-ba integridade judisiária no predusaun Oportunidade Korrupsaun, artigu 12 kona-ba medida ba esforsu integridade majistradu judisiál sira no Ministériu Públiku.

Partisipa iha dikusaun ne’e, Deputadu sira husi Komisaun A Asuntu Konstitusionais no Justisa kompostu hosi Prezidente Joaquim dos Santos, Vise Prezidente Francisco de Vasconcelos, Sekretáriu José Pacheco Soares, Membru Francisco Miranda Branco, Dário Madeira, Patrocíno Fernandes, Carmelita Moníz, Óscar de Araújo, Adriano do Nascimento, António Nobre Amaral Tilman, no  Francisco David Xavier Carlos.

Entidade relevante sira ne’ebé mak involve direta no iha kompeténsia direta liga ho Korrupsaun ne’e, Komisaun A  konvida mós hodi partisipa iha diskusaun ne’e mak hanesan, reprezentante Ministériu Justisa maka, Jurista Napoleon Bonaparte Ximenes, Komisáriu Komisaun Anti Korrupsaun (KAK), Sérgio Hornay, Provedora Provedoria Direitus Humanos no Justia (PDHJ) Jesuinha Gomes, Peskizador JSMP Mateus Xavier,  Diretór PSIK Vicente F.Brito, Reprezentante GMPTL.

Jornalista : Cipriano Colo

Editór       :  Cancio Ximenes

HAKEREK NO HATÁN

Please enter your comment!
Please enter your name here