Ambiente diskusaun Lei Antí Corrupção (LAC) iha Hotel Uma Liurai, Ailok Laran, Babulo Same-Manufahi, kuarta (24/06/2020). Imajen Tatoli/Cipriano Colo.

MANUFAHI, 24 juñu 2020 (TATOLI)–Diskusaun ba projetu Lei númeru 1/V/I/-Lei Antí Corrupção (LAC) iha loron dahuluk, Komisaun A ho entidade relevante sira konsege diskute espesialidade iha Dispozisaun Legál sira kona-ba medida prevensaun nian, títulu primeiru-kona-ba Medida Preventiva Kombate Korrupsaun iha Kapítulu I-medida jerais Prevensaun.

Notísia Relevante: Diskusaun LAC, PSIK Propoin Estabelese Konsellu Kombate Korrupsaun

Iha Kaputulu ne’e, kompostu hosi sesaun hitu (VII) ho nia artigu hamutuk 25 no ohin konsege diskute sesaun haat ho nia artigu hamutuk sanulu resin ida (11).

Iha sesaun primeiru kona-ba estratejia nasionál ho nia artigu 1 ko’alia kona-ba politika prevensaun no luta kontra korrupsaun.

Sesaun daruak, kona-ba setór Públiku no kódigu konduta ho artigu 2 ko’alia kona-ba rekrutamentu iha setór públiku, artigu 3 koa’lia kona-ba kódigu konduta ba ajente públiku no privadu sira, artigu 4 ko’alia kona-ba medida atu fasilita komunikasaun ba aktu korrupsaun nian.

Sesaun datoluk, kona-ba Kontratasaun públiku ho nia artigu 5 ko’alia kona-ba publisidade no transparénsia iha aprovizionamentu ho setór públiku, artigu 6 ko’alia kona-ba aprovizionamentu justu no efisiente.

Sesaun dahaat kona-ba Transparénsia Administrasaun Públika nian, ho nia artigu 7 ne’ebé ko’alia kona-ba divulgasaun Administrasaun públika, artigu 8 ko’alia kona-ba simplifikasaun prosedimentu administrasaun nian, artigu 9 ko’alia kona-ba avaliasaun risku sira korrupsaun nian iha administarsaun públika, artigu 10 ko’alia kona-ba obstrusaun asesu informasaun no artigu 11 ko’alia kona-ba rekursu judisiál.

Iha loraik tuku 19:30, Prezidente Komisaun A, Joaquim dos Santos, halo rezumu katak ohin komisaun A konklui ninia servisu hosi dadeer to’o lorokraik, ne’ebé diskuasaun ne’e fahe ba parte rua. Iha parte dadeer, halo debate kle’an kona-ba substánsia Lei Anti Korrupsaun, liu-liu iha titulu primeiru, kona-ba medida preventiva hosi kombate korrupsaun nian.

“Ida ne’e iha kapitulu rua, Kapitulu ida kona-ba medida jerál prevensaun no mós kapitulu ida seluk kona-ba Rejimi Deklarasaun Bens no Intereses. Tanba ne’e, iha kapitulu primeiru ne’e, ohin, ita deskute to’o iha lorokraik ne’e konsege to’o artigu sanulu resin ida (11).

Nia hatutan, durante diskusaun deputadu sira ho entidade kompetente  sira ne’ebé partisipa iha diskuasuan ne’e, hotu-hotu fó opiniaun no tékniku sira rezumu kona-ba hanoin sira ne’e ba iha akta, depois tékniku sira, asesór sira, simu ideia sira-ne’e atu halo emendas ba norma sira no prepara aban atu aprova karik, artigu sira ne’ebé ohin diskute ne’e tenke haree fila-fali lai emenda hirak ne’e.

“Ohin, ita to’o iha faze ida-ne’e, aban mak ita kontinua artigu 12 to’o 25 iha sesaun dalima, sei ko’alia kona-ba intergridade judisiáriu no redusaun oportunidade Korrupsaun,” nia dehan. 

Jornalista : Cipriano Colo

Editór       :  Cancio Ximenes

HAKEREK NO HATÁN

Please enter your comment!
Please enter your name here