Diretór Nasionál PCIC, Vicente Fernandes e Brito. Imajen Tatoli/Egas Cristovão

MANUFAHI, 24 juñu 2020 (TATOLI)–Durante sesaun dahuluk diskusaun projetu Lei Antí Corrupção (LAC), Diretór Polisia Sientifika Investigasaun Kriminál (PSIK), Vicente Fernandes Brito, propoin ba deputadu sira atu tetu hodi estabelese Konsellu Kombate Korrupsaun (KKK) ne’ebé submete direta ba iha Governu nia okos tanba ninia servisu barak liu.

Notísia Relevante: CAC Kontribui ba Diskusaun LAC iha Estratejia no Perspetiva Polítika

“Iha proposta LAC nian, prevensaun ne’e ba servisu Comissão Antí Corrupção (CAC) maibé bainhira deputadu sira halo estudu komparativu, nasaun barak gosta opta liu ba medida prevensaun ne’e boot kompara ho kura, hanesan Nova Zelandi, Austrália no seluk tan. Ha’u propoin ba deputadu sira atu tetu hodi estabelese Konsellu Kombate Korrupsaun (KKK) ne’ebé submete direta ba iha Governu nia okos tanba ninia servisu barak liu,” Vicente Fernandes Brito hateten, kuarta ne’e.

Nia fó ezemplu, iha Portugál, prevensaun ne’e sira la tau iha Polisia Judisiáriu maibé sira tau iha konsellu ida ne’ebé hakarak Konsellu Kombate Korrupsaun ne’ebé iha Governu nia okos ho nia servisu boot la halimar.

“Tanba ne’e husu ba deputadu sira atu haree hodi halo took apresiasaun. Tanba proposta ne’e hatuur iha Comissão Antí Corrupção (CAC), enkuantu dokumentu ne’ebé mak PSIK konsege hetan katak, ne’e iha konsellu ida hanesan iha Portugál no nasaun CPLP sira balun ne’e tau iha Tribunál de Kontas nia okos,” nia dehan. 

Nia hatutan, bainhira tau iha CAC nia okos, depois ninia servisu ne’e la efikás tanba presiza rekursu, orsamentu no buat barak tan.

“Nee atu konklui de’it katak se bele, investigasaun kriminál ita fó ba CAC maibé prevensaun ne’e tau iha espésie Konsellu Prevensaun. Tanba ida-ne’e ninia servisu boot la halimar ne’ebé ezije buat barak iha aspetu barak, tanba ida-ne’e liga ho prevensaun. Tanba ne’e, ha’u husu katak keta halo ba ita tau tiha iha CAC maibé depois iha ninia implementasaun liuliu kuadru prevensaun ne’e ladún di’ak,” nia sujere.

Iha diskusaun sesaun dadeer ne’e nia rohan, ne’ebé aemata iha tuku 12:40 otl, Vise Prezidente Komisaun A Francisco de Vasconcelos, halo rezumu katak matéria ne’ebé mak iha dadeersan ne’e Komisaun A Parlamentu Nasionál ho entidade sira diskute, kona-ba medida prevensaun kombate Korrupsaun nian.

Nia dehan, iha diskuasaun uluk haree liu kona-ba aktu penalizasaun maibé agora konsentra ba iha medida prevensaun nian, no seidauk tama ba iha espesialidade kona-ba artigu ba artigu. Tanba, nia dehan, sei rona lai pontu de vista jerál hosi entidade sira ne’ebé mak aban bainrua implementa lei ne’e.

Pontu de vista enjerál kona-ba medida prevensaun korrupsaun ne’e rasik, nia hatutan, mosu diferénsia ideia entre sira liuliu kona-ba implementasaun.

“Bainhira ita konsege aprova lei ne’e maibé bele aprova ho medida ne’ebé mak forte tebes maibé kapasidade implementasaun, ne’e hanesan dezafiu ida. Segundu, iha mós diferénsia ideia kona-ba meiu ka fasilidade ba órgaun implementadór sira liuliu CAC, atu bele introdús medida prevensaun ne’e rasik. Tanba ne’e maka rezumu jerál ne’e katak ohin ne’e haree liu-ba diskusaun prevensaun, haree liu ba ninia substánsia jerál. Karik iha opiniuan sira jerál ne’e bele hamosu tan artigu balun, hodi reforsa tan artigu sira ne’ebé mak deskreve ona kona-ba medida nesesáriu ba prevensaun korrupsaun ne’e rasik,” nia esplika.

Sesaun ida tuir mai, nia dehan, mak foin tama ba artigu ba artigu sira, kompostu hosi  artigu 25 iha medida prevensaun korrupasaun, karik iha proposta ruma. Tanba, nia hateten, ohin mós introdusan balun hosi entidade sira ne’ebé partisipa, ne’e katak seráke bele harei tan konsellu ida atu bele implementa de’it ba medida prevensaun, ida ne’e mós sei tama iha diskusaun espesialidade nian.

Jornalista : Cipriano Colo

Editór       :  Cancio Ximenes

HAKEREK NO HATÁN

Please enter your comment!
Please enter your name here