Ambiente diskusaun Lei Antí Korrupsaun (LAK) iha Hotel Uma Liurai, Ailok Laran, Babulo Same-Manufahi, kuarta (24/06/2020). Imajen Tatoli/Cipriano Colo.

MANUFAHI, 24 juñu 2020 (TATOLI)–Deputadu sira Komisaun A Parlamentu Nasionál (PN), ohin, hahú diskute Lei Anti Korrupsaun (LAK) ne’ebé foka kona-ba Diszpozisaun Jerál títulu segundu, ne’ebé hala’o iha Otél Uma Liurai, Ailok Laran, Babulo Same-Manufahi.

Notísia Relevante: Komisaun A Sei Diskute Lei Antí Korrupsaun iha Manufahi

Antes hahú diskusaun, Prezidente Komisaun A Joaquim dos Santos loke ofisialmente ho ‘um minutu de silêncio’ ba erói sira Timor-Leste nian ne’ebé mate ba ukun rasik aan, mate ba libertasaun pátria.

Iha introdusaun, Joaquim fó hanoin katak ohin halo re-diskusaun ba Lei Anti Korrupsaun ne’ebé mak para tiha kuaze tinan rua, tanba situasaun obriga, depois de halo estudu komparativu iha Macau-Xina.

Tanba ne’e, nia hatutan, bainhira iha oportunidade ohin, deputadu sira disponível entaun bele halo lalais lei ne’e, nune’e entidade kompetente sira bele servisu ho instrumentu legál.

“Uluk aprova tiha ona dispozisaun jerál titulu primeiru no ohin ita tama iha titulu segundu, kona-ba medida preventiva, hanesan materia foun ne’ebé seidauk halo parte iha estrutura proposta ne’ebé mak komisaun simu hosi Parlamentu Nasionál. Tanba ninia substánsia mai hosi opiniaun públiku enjerál, deputadu sira, profisinais sira katak lei ne’e presiza iha medida preventiva. Tanba ne’e, kalendáriu ne’e hahú ohin to’o 15 Jullu tinan ne’e,” Prezidente Komisaun A introdús.

Nia hatutan, hosi reuni aspirasaun sira ne’e maka, agora sai ona norma proposta, tanba ne’e iha primeira medidas preventiva ne’e iha kapitulu rua, ida medida jerál no medida deklarasaun de bens.

“Tanba ne’e to’o sesta, Diskusaun ne’e sei konsentra liu iha kapitulu rua ne’e no ohin ne’e diskute kona-ba medida jerais Prevensaun ba Anti Korrupsaun. Se ohin la hotu, entaun aban bele kontinua, atu nune’e bainrua, bele tama fali ba kapitulu daruak nian,” ia subliña tan.

Joaquim mós iha esperansa, bainhira diskusaun iha ohin no aban mak konsege iha konsensu entre deputadu sira iha artigu sira ne’ebé iha propsta ne’e, entaun bele aprova artigu 25, nune’e bainrua no bain tolu bele ba halo diskusaun artigu 38  tanba  parte ida-ne’e iha  artigu 58.

Totál artigu hosi Lei ne’e iha artigu 121,  foin mak aprova  artigu 22, falta  artigu 90 resin.

Partisipa iha dikusaun ne’e, Deputadu sira hosi Komisaun A Asuntu Konstitusionais no Justisa kompostu hosi Prezidente Joaquim dos Santos, Vise Prezidente Francisco de Vasconcelos, Sekretáriu José Pacheco Soares, Membru Francisco Miranda Branco, Dário Madeira, Patrocíno Fernandes, Carmelita Moníz, Óscar de Araújo, Adriano do Nascimento, António Nobre Amaral Tilman, no  Francisco David Xavier Carlos.

Entidade relevante sira ne’ebé mak involve direta no iha kompeténsia direta liga ho Korrupsaun ne’e, Komisaun A konvida mós hodi partisipa iha diskusaun ne’e mak hanesan, reprezentante Ministériu Justisa maka, Jurista Napolião Bonaparte Ximenes, Komisáriu Komisaun Anti Korrupsaun (KAK), Sérgio Hornay, Provedora Provedoria Direitus Humanos no Justia (PDHJ) Jesuinha Gomes, Peskizador JSMP Mateus Xavier,  Diretór PSIK Vicente F.Brito, Reprezentante Grupo Mulher Parlamentar Timor-Leste (GMPTL).

Jornalista : Cipriano Colo

Editór   :  Cancio Ximenes

HAKEREK NO HATÁN

Please enter your comment!
Please enter your name here