iklan

NASIONÁL, DILI, HEADLINE, LEI, POLÍTIKA

Komisaun A Sei Diskute Lei Antí Korrupsaun iha Manufahi

Komisaun A Sei Diskute Lei Antí Korrupsaun iha Manufahi

Prezidente Komisaun A PN, Joaquim dos Santos. Imagen Antonio Goncalves.

DILI, 18 juñu 2020 (TATOLI)—Komisaun Espesializada A (Justisa no Konstitusionál) iha Parlamentu Nasionál sei halo diskusaun kontinuasaun ba Lei Antí Korrupsaun (LAK) iha kapitál Manufahi, Same.

Prezidente Komisaun A, Deputadu Joaquim dos Santos, fó-sai katak membru komisaun halo ona konsensu hodi deskuti LAK hahú hosi 23 juñu to’o ba 15 jullu 2020.

Notísia Relevante: Komisaun A Aprova Ona Kalendáriu Debate Lei Antí Korrupsaun

“Ne’ebé, ami-nia konsentrasaun durante semana rua nia laran bele aprova métade hosi atrigu 100-resin ne’e, foin mak aprova artigu 22, agora sei hela artigu 90-resin. Razaun Komisaun A deside debate iha Same tanba iha Dili ladún iha konsentrasaun. Iha loron tersa, 23 juñu lorokraik, membru komisaun A hahú sai hosi Dili ba konsentra iha Same. Desizaun Komisaun A ne’e hakarak ba uluk Same, iha ne’ebá fatin balu fresku hodi deputadu sira diskute kada artigu, depois semana tuir-mai mak eskolla fali fatin seluk,” Prezidente Komisaun A, Deputadu Joaquim dos Santos, informa ba jornalista sira iha resintu Parlamentu Nasionál, kinta ne’e.

Nia dehan, artigu balun sei debate iha komisaun A, iha Dili maibé presiza eskolla munisípiu hodi fó konsentrasaun másimu.

Prezidente Komisaun A ne’e fó-sai katak, debate ne’e nakloke ba públiku, instituisaun ne’ebé interesante bele partisipa no jornalista sira mós bele akompaña hodi habelar ba públiku.

Prezidente Komisaun A ne’e sei aprezenta karta ba Prezidente Parlamentu Nasionál, Aniceto Longuinhos Guterres Lopez, katak membru komisaun eskolla kapitál Same, Munisípiu Same, sai hanesan diskusaun kontinuasaun ba Lei Antí Korrupsaun.

“Ne’e deputadu sira maioria mak hakarak ba diskute iha Same, nune’e iha konsentrasaun ne’ebé di’ak liu,” nia dehan. 

Jornalista : Evaristo Soares Martins

Editór       :  Cancio Ximenes

iklan
iklan

Leave a Reply

iklan
error: Content is protected !!