Komisáriu CAC, Sérgio Hornai. Imajen Tatoli/Cipriano Colo

MANUFAHI, 24 juñu 2020 (TATOLI)–Prezensa Comissão Antí Corrupção (CAC) nu’udár Instituisaun implementadór ba diskusaun Lei Antí Corrupção (LAC) hodi kontribui ideia iha estratejia no mós perspetiva polítika.

Notísia Relevante: Komisaun A Hahú Diskute LAK Foka ba Dispozisaun Jerál Títulu Segundu

Iha introdusaun diskusaun dadeer ne’ebé hahú iha tuku 09:30 otl, Komisáriu CAC Sérgio Hornai hateten, hanesan órgaun implementadór, CAC mai ho ekipa atu kontribui iha diskusaun ba projetu Lei ne’e, liuliu haree hosi perspetiva polítika, estratejia saida mak sei halo.

Nune’e, tuir nia, bele kontribuai ba lei ida-ne’e bainhira deputadu sira sei bele deside, hodi hasai lei ida ba pakote ida de’it, tantu iha politika prevensaun, iha prosesuál, no mós ba iha kriminalizasaun nian.

“Ajendementu ba diskusaun projetu LAC importante, tanba hatuur situasaun tolu importante tebes. Primeiru, ko’alia kona-ba oinsá Timor-Letse bele harii ninia estratejia nasionál ida ba iha kombate kriminalidade no halo erradikasaun ba krime korrupsaun iha Timor-Leste, liuhosi politika prenvensaun,” Sérgio Hornai hato’o iha ninia intervensaun iha sesaun dadeer, kuarta ne’e. 

Nia fó hanoin, antes ne’e diskute ona projetu LAC ne’e no agora daudaun bele tama ba sesaun ida kona-ba polítika prevensaun ninian.

Iha politika prevensaun nian, nia dehan, órgaun ne’ebé sai responsável prinsipál hodi bele ezekuta ka implementa  polítika prevensaun nian, hanesan lei konvensaun internasionál ne’ebé retifika ona Komvensaun Anti Korrupsaun, iha artigu 5 to’o iha artigu 14 kapitulu 2 ninian.

Ida ne’e fó kbiit ida-ne’e ba iha parte estadu membru sira, atu bele elabora no define sira-nia polítika própriu, tuir sira-nia lejislasaun nasionál, haktuir ba iha lei internasionál sira atu bele define sira-nia polítika oinsá bele hola medida sira hotu atu bele halo erradiksaun ba kombate kriminalidade korrupsaun nian.

“Ida-ne’e ita sei haree hosi kontratasaun públiku sira, halo kona-ba rekrutamentu sira, oinsá mak atu eleva étika, kódigu konduta setór públiku sira, liuliu funsionáriu públiku sira, ezekutivu sira lejislativu nian to’o iha órgaun judikativu ninian. Sira-ne’e hotu hola parte atu eleva integridade instituisaun públika no mós instituisaun privadu sira,” nia dehan.

Tanba ne’e, nia esplika, instituisaun privadu sira entre sira mós tenke kontribui ba boa administrasaun ne’ebé di’ak, atu bele fasilita instituisaun públiku sira, karik iha disputa ruma, konflitu ruma ba iha lei tanba iha kontratasaun, ba iha fiskalizasaun ruma, bele fó no fasilita órgaun implementadór sira hanesan Komisaun Anti Korrupsaun. 

Nia hatutan, ohin deputadu sira hosi Komisaun A hamutuk ho instituisaun relevante sira, halibur hamutuk iha fatin ida-ne’e, ba loron tomak, to’o iha loron 27 fulan ne’e, sei halo diskuasuan intensivu ba kapítulu sira ne’ebé mak estabelese tiha ona iha ajenda Komisaun A Parlamentu Nasionál.

Prezensa Komisáriu CAC Sérgio Hornai iha diskusaun proposta Lei Antí Corrupção (LAC) ne’e, akompaña hosi Komisáriu Adjuntu ba Asuntu Prevensaun no Sensibilizasaun, Luis de Oiveira Sampaio, no mós Komisáriu Adjuntu ba Asuntu Investigasaun Kriminál, Augosto Castro.

Jornalista : Cipriano Colo

Editór       :  Cancio Ximenes

HAKEREK NO HATÁN

Please enter your comment!
Please enter your name here