Prezidente Tribunál Rekursu, Deolindo dos Santos. Imajen/Antonio Goncalves

DILI, 24 juñu 2020 (TATOLI) – Prezidente Tribunál Rekursu (PTR), Deolindo dos Santos, informa iha ámbitu implementasaun estadu emerjénsia ba faze datoluk nian, Tribunál sira funsiona julgamentu normál ba atendimentu públiku.

Notísia Relevante :Tribunál Iha Difikuldade Viajen Lokál

Iha faze implementasaun estadu emerjénsia  dahuluk no daruak nian, liuhosi desizaun Konsellu Superior Tribunál Rekursu ba Tribunál Distritál Dili, Baucau, Suai no Oe-Cusse, hala’o de’it julgamentu ba kazu sira ho karater urjente hanesan primeiru interrogatóriu, prosesu sumáriu no providénsia kautela exeptu ba julgamentu normál suspende, ho razaun atu halo prevensaun ba propagasaun surtu Cronavirus ka  COVID-19.

“Iha faze EE datoluk ne’e julgamentu hahú la’o prosesu normál ba atendimentu públiku, inklui julgamentu movel sira iha Tribunál Distritál sira,” hatete Deolindo dos Santos, ohin,  ba jornalista hafoin remata enkontru ho Primeiru-Ministru Taur Matan Ruak iha Palaçio do Governo.

Nia esklarese katak rajaun Tribunál hala’o fali julgamentu normál tanba haree ba iha kazu ativu pasiente COVID-19 iha Timor-Leste rekuperadu hotu ona, inklui iha dekretu Governu fó dalan hodi bele realiza.

Mezmu nune’e, Tribunál kontinua prepara kondisaun no fasilidade sira  tuir orientasaun Ministériu Saúde ho Organizasaun Mundial Saúde nian, hanesan prepara bee fase-liman, sabaun no asegura distansiamentu fízika.

Hatán kona-ba durante iha implementasaun estadu emerjénsia faze dahuluk ho daruak, Tribunál sira atende kazu urjente hira, Deolindo dos Santos lia-tun dehan, nia parte ladún lembra kona-ba númeru kazu ne’ebé tránzitu ein julgadu iha Tribunál iha ámbitu estadu emerjénsia.

Jornalista   : Nelson de Sousa

Editór        : Francisco Simões

 

HAKEREK NO HATÁN

Please enter your comment!
Please enter your name here